រាជធានីភ្នំពេញ ៖ កាលពីព្រឹកថ្ងៃទី១២ ធ្នូ ឆ្នាំ២០១៥នេះ ក្រុមគ្រូពេទ្យស្ម័គ្រចិត្តរបស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា ដោយមានការចូលរួមពីអាជ្ញាធរខណ្ឌមានជ័យ ដឹកនាំដោយលោកឌី រ័ត្នខេមរុណ អភិបាលរងខណ្ឌមានជ័យ លោកសេង សាញ់ ចៅសង្កាត់ស្ទឹងមានជ័យ បានសហការគ្នាចុះត្រួតពិនិត្យជំងឺដោយឥតបង់ថ្លៃ ជូនបងប្អូនប្រជាពលរដ្ឋចំនួន៥០០នាក់ មកពីតាមសង្កាត់ទាំង៤ ក្នុងមូលដ្ឋានខណ្ឌមានជ័យ ក្នុងនោះ ប្រជាពលរដ្ឋ៣០០នាក់ មកពីសង្កាត់ស្ទឹងមានជ័យ១០០នាក់ មកពីសង្កាត់បឹងទំពុន និង១០០នាក់ផ្សេងទៀត មកពីសង្កាត់ចាក់អង្រែលើ និងក្រោម ។
ឆ្លៀតក្នុងឱកាសខាងលើ លោកឌី រ័ត្នខេមរុណ បានមានឱ្យដឹងថា សាលាខណ្ឌមានជ័យ ពិតជាមានកិត្តិយសបំផុត ដែលបានសហការរៀបចំពិធីពិនិត្យ និងព្យាបាលជំងឺដោយឥតគិតថ្លៃ ដែលរៀបចំឡើងដោយក្រុមគ្រូពេទ្យស្ម័គ្រចិត្តសម្តេចវិបុលសេនាភក្តីសាយ ឈុំ ជូនបងប្អូនប្រជាពលរដ្ឋក្រីក្រ៥០០ ក្នុងខណ្ឌមានជ័យ ។ លោកអភិបាលរងខណ្ឌបន្តថា ការចុះពិនិត្រសុខភាពជូនបងប្អូនប្រជាពលរដ្ឋនៅពេលនេះ គឺជាការចុះលើកទី៥ហើយ សម្រាប់កំឡុងឆ្នាំ២០១៥នេះ របស់អាជ្ញាធរខណ្ឌមានជ័យ រួមជាមួយក្រុមគ្រូពេទ្យស្ម័គ្រចិត្ត មកពីតាមបណ្តាអង្គភាព និងស្ថាប័ន្តពាក់ព័ន្ធ នានា ។
ហើយវត្តមានរបស់ក្រុមគ្រូពេទ្យស្ម័គ្រចិត្តសម្តេចវិបុលសេនាភក្តីសាយ ឈុំ នៅពេលនេះដែរ គឺជាសក្ខីភាពសបញ្ជាក់ឱ្យឃើញពីមនោសញ្ចេតនាយកចិត្តទុកដាក់ខ្ពស់ ចំពោះវិស័យសុខាភិបាល ដែលជាវិស័យអាទិភាពក្នុងគោលនយោបាយ និងយុទ្ធសាស្ត្រអភិវឌ្ឍន៍របស់រដ្ឋាភិបាលកម្ពុជា ដើម្បីកាត់បន្ថយភាពក្រីក្ររបស់ប្រជាពលរដ្ឋ ក្រោមការដឹកនាំដ៏ឈ្លៀសវៃប្រកបទៅដោយគតិបណ្ឌិត ដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
លោកដួង សុជាតិ ទីប្រឹក្សាផ្ទាល់ និងជាអនុប្រធានក្រុមគ្រូពេទ្យស្ម័គ្រចិត្តរបស់សម្តេចវិបុលសេនាភក្តី សាយ ឈុំ បានមានមាតិសំណេះសំណាល និង បានផ្ញើរក្តីនឹករលឹកយ៉ាងខ្លាំពីសម្តេចសម្តេចវិបុលសេនាភក្តីសាយ ឈុំ ប្រធានព្រឹទ្ធសភា ជូនចំពោះបងប្អូនប្រជាពលរដ្ឋទាំងអស់ដែលកំពុងមានវត្តមាននៅពេលនេះ ។ លោកអោយដឹងទៀតថា ការព្យាបាលជូនបងប្អូននៅពេលនេះ គឺមិនប្រកាន់ទៅលើជម្ងឺអ្វីទាំងអស់ ក្រុមគ្រូពេទ្យនឹងព្យាបាលអោយអស់ពីសមត្ថភាព ប៉ុន្តែក្នុងករណីថ្វីបើជំងឺ ឬអាការៈរបស់បងប្អូនមានសភាពធ្ងន់ធ្ងរខ្លាំង ក្រុមគ្រូពេទ្យជំនាញ និងបញ្ចូនគាត់ទៅសម្រាកព្យាបាលបន្តទៀតនៅមន្ទីរពេទ្យធំៗ ក្នុងរាជធានីដូចជាមន្ទីរពេទ្យមិត្តភាពខ្មែរសូវៀត ឬ កាល់ម៉ែត្រជាដើម ដោយមិនមានការគិតថ្លៃដូចគ្នា ។
ជាចុងក្រោយ បងប្អូនប្រជាពលរដ្ឋ បានសម្តែងនូវទឹកចិត្តត្រេកអរយ៉ាងក្រៃលែង និងបានថ្លែងអំណអរគុណបំផុត ចំពោះអាជ្ញាធរខណ្ឌមានជ័យ ក៏ដូចជាក្រុមគ្រូពេទ្យស្ម័គ្រចិត្តរបស់សម្តេចវិបុលសេនាភក្តីសាយ ឈុំ ប្រធានព្រឹទ្ធសភា ដែលតែងតែយកចិត្តទុកដាក់ ខ្នះខ្នែង គិតគូរ ដល់សុខភាពរបស់ប្រជាពលរដ្ឋ ដោយបានចុះមកពិនិត្យជំងឺដោយគ្មានការបង់ថ្លៃដល់មូលដ្ឋាន ជាក់ស្តែងដូចក្នុងពេលនេះតែម្តង ៕
ចែករំលែកព័តមាននេះ