ខេត្តត្បូងឃ្មុំ ៖ ជនពុំស្គាល់មុខ២នាក់ប្រុសម្នាក់ស្រីម្នាក់ បានចូលទៅប្រើអំពើហិង្សាវាយទៅលើស្ត្រី២នាក់ ដែលកំពុងតែដេកនៅក្នុងផ្ទះឡើងខៀវភ្នែក និងថែមទាំងបានយកម្ជុលស៊ីរាំងចាក់ត្រូវពោះថែមទៀត ។ ហេតុការណ៍នេះបង្កឲ្យមានការភ្ញាក់ផ្ទើលកាលពីវេលាម៉ោង៤ និង១០នាទីទាបភ្លឺ ថ្ងៃទី៣ ធ្នូ ២០១៥ ស្ថិតនៅភូមិសំពៅផុសថ្មី ឃុំជីរោទិ៍ទី២ ស្រុកត្បូងឃ្មុំ ហើយត្រូវបានកម្លាំងសមត្ថកិច្ចចុះទៅសួរនាំ និងបានពិនិត្យកន្លែងកើតហេតុផងដែរ ។
លោកវរសេនីយ៍ត្រី ឡុង សារិន អធិការរងនគរបាលស្រុកត្បូងឃ្មុំ បានប្រាប់ឲ្យដឹងថា ត្រង់ចំណុចផ្ទះរបស់ស្ត្រីរងគ្រោះឈ្មោះ ពាង ស្រីអូន នៅភូមិ-ឃុំខាងលើ ត្រូវបានជនមិនស្គាល់មុខ មានគ្នាយ៉ាងតិចក៏២នាក់ បានធ្វើសកម្មភាពវាយទាត់ធាក់ ព្រមទាំងបានប្រើម្ជុលស៊ីរ៉ាងពេទ្យចាក់ស្ត្រីរងគ្រោះឈ្មោះ ស្រីអូន ហៅឡី ភេទស្រី អាយុ២៩ឆ្នាំ និងបានវាយទៅលើឈ្មោះ ឡេង ស្រី ភេទស្រី អាយុ៤៥ឆ្នាំ មានទីលំនៅភូមិដូនកឹង ឃុំដូនកឹង ស្រុកកំចាយមារ ខេត្តព្រៃវែង មានស្នាមត្រូវរបួសលើផ្ទៃមុខ ដោយក្រចកក្រញ៉ៅជាច្រើនកន្លែង ។
លោកអធិការរងនគរបាលស្រុកត្បូងឃ្មុំ បានប្រាប់បន្តឲ្យដឹងទៀតថា នៅពេលល្ងាចថ្ងៃទី២ ធ្នូ ឈ្មោះ ស្រីអូន បានទៅចូលរួមមង្គលការអ្នកភូមិម្រាមទាឃ ឃុំជីរោទិ៍ទី២ លុះប្រហែលម៉ោង៧យប់ទើបត្រឡប់មកផ្ទះវិញ ដោយបានទាញទ្វារបិតត្រឹមត្រូវដេកតែគ្នា២នាក់ជាមួយនឹងបងស្រីជូនមួយស្រីឈ្មោះ ឡេង ស្រី បន្ទាប់មកក៏ស្រាប់តែមានជនមិនស្គាល់មុខបាននាំគ្នាមកចូលវាយយ៉ាងចាស់ដៃដល់ក្នុងផ្ទះតែម្តង រួចបាននាំគ្នារត់គេចខ្លួនចេញទៅក្រៅវិញ ចំពោះទ្រព្យសម្បត្តិនៅក្នុងផ្ទះមិនត្រូវបានក្រុមទាំងនោះយកឡើយ ។
ស្ត្រីរងគ្រោះ ពាង ស្រីអូន បានបំភ្លឺប្រាប់សមត្ថកិច្ចថា ចំពោះជនដែលបានធ្វើសកម្មភាពវាយរូបគាត់នោះគឺជាមនុស្សស្រី ស្លៀកពាក់ខោអាវខ្មៅ បានវាយទាត់ធាក់ ថែមទាំងបានយកម្ជុលមកចាក់លើគាត់បណ្តាលឲ្យរងរបួសចំនួន៣កន្លែង ។ ស្ត្រីរងគ្រោះបន្តថា កាលពីរសៀលថ្ងៃទី២ ធ្នូ គាត់បានមានទំនាស់ជាមួយនឹងប្រពន្ធរបស់មន្ត្រីទាហានម្នាក់នៅថ្នល់ទទឹងពីរឿងលុយកាត់ រហូតដល់ពេលយប់ក៏កើតមានអំពើហឹង្សាខាងលើតែម្តង ។
ស្ត្រីរងគ្រោះឈ្មោះ ឡេង ស្រី បានបំភ្លឺថា ចំពោះជនដែលបានធ្វើសកម្មភាពវាយមកលើរូបគាត់នោះជាមនុស្សប្រុសមានមាឌរាងស្គម ពាក់អាវខ្មៅខោជើងវែង ខណៈពេលដេកនៅក្នុងបន្ទប់តែម្នាក់ឯងនៅជាន់ខាងលើ ចំណែកប្អូនស្រីឈ្មោះ ស្រីអូន វិញដេកនៅជាន់ខាងក្រោម ។
លោកវរសេនីយ៍ត្រី ឡុង សារិន បញ្ជាក់ថា ចំពោះមូលហេតុខាងលើនេះគេមិនទាន់ដឹងថា តើអំពើហិង្សានេះផ្តើមចេញពីអ្វីឲ្យបានច្បាស់លាស់នៅឡើយទេ ។ ក្រោយកើតហេតុជំនាញព្រហ្មទណ្ឌបានចុះទៅដល់ផ្ទះកើតហេតុ ពិនិត្យតាមទ្វារ និងរបងបេតុង មិនឃើញមានស្នាមជើងមនុស្សឡើងនោះទេ រូបលោកនឹងបន្តអង្កេតករណីនេះបន្ថែមទៀត ដើម្បីឈានរកការពិត ៕
ចែករំលែកព័តមាននេះ