ខេត្តស្វាយរៀង ៖ តាមសេចក្តីរាយការណ៍ពីអ្នកឆ្លើយឆ្លងព័ត៌មានកោះសន្តិភាពបានឱ្យដឹងថា បុរសជនជាតិវៀតណាមស្រវឹងស្រាដែលចូលមកវាយមន្ត្រីយោធាខ្មែរម្នាក់
ខេត្តស្វាយរៀង ៖ តាមសេចក្តីរាយការណ៍ពីអ្នកឆ្លើយឆ្លងព័ត៌មានកោះសន្តិភាពបានឱ្យដឹងថា បុរសជនជាតិវៀតណាមស្រវឹងស្រាដែលចូលមកវាយមន្ត្រីយោធាខ្មែរម្នាក់(លោកអនុសេនីយ៍ឯក ម៉ុំ ដារា នាយប៉ុស្តិ៍ច្រករបៀង២០១) ឱ្យរបួសធ្ងន់ធ្ងរ ត្រូវបានសាលាដំបូងខេត្តសម្រេចឃុំខ្លួនជនដៃដល់ជាបណ្តោះអាសន្ន ។
ប្រភពព័ត៌មានបានបន្តថា ខាងភាគីជនដៃដល់វៀតណាមបានសុំធ្វើការសម្រុះសម្រួលដើម្បីឱ្យដោះលែងជនដៃដល់ត្រឡប់ទៅប្រទេសវៀតណាមវិញ ប៉ុន្តែខាងជនរងគ្រោះ ក៏ដូចជាកងរាជអាវុធខេត្តមិនព្រមសម្របសម្រួល ក៏បានកសាងសំណុំរឿងបញ្ជូនទៅសាលាដំបូងខេត្ត ហើយព្រះរាជអាជ្ញាអមសាលាដំបូងខេត្តសម្រេចឃុំខ្លួនជាបណ្តោះអាសន្នពីបទបង្ករបួសស្នាមដោយចេតនា កាលពីល្ងាចថ្ងៃទី១ ធ្នូ ២០១៥ ។
គួររំឭកដែរថា លោកអនុសេនីយ៍ឯក ម៉ុំ ដារា នាយប៉ុស្តិ៍ច្រករបៀង២០១ ត្រូវជនជាតិវៀតណាមចូលមកវាយបណ្តាលឱ្យរងរបួសក្បាលធ្ងន់ធ្ងរ ដែលជនដៃដល់ត្រូវបានគេស្គាល់ថា ជាក្មួយលោកប្រធានគណៈកម្មការប្រជាជនស្រុកបេនកូវ ខេត្តតៃនិញ ប្រទេសវៀតណាម កាលពីវេលាម៉ោង១និង១៥នាទីរសៀលថ្ងៃទី៣០ វិច្ឆិកា ២០១៥ នៅខាងមុខច្រករបៀងវរៈការពារព្រំដែនលេខ២០១ ស្ថិតនៅភូមិតាបិប សង្កាត់បាវិត ក្រុងបាវិត ។
មុនពេលកើតហេតុ គេឃើញជនជាតិវៀតណាមរូបនេះ ជិះម៉ូតូចេញពីប្រទេសវៀតណាមចូលមកកម្ពុជាតាមច្រករបៀង២០១តាបិប ក្នុងស្ថានភាពស្រវឹង ហើយលោកអនុសេនីយ៍ឯក ម៉ុំ ដារា ក៏ឃាត់ដើម្បីសួរនាំ និងត្រួតពិនិត្យបែបបទរដ្ឋបាល ស្រាប់តែជនសង្ស័យវៀតណាមរូបនេះ ចុះពីលើម៉ូតូដោះមួកសុវត្ថិភាពស្ទុះមកវាយក្បាលលោក ម៉ុំ ដារា តែម្តង បណ្តាលឲ្យរងរបួសធ្ងន់ធ្ងរ ត្រូវបានមន្ត្រីយោធានាំគ្នាមកជួយអន្តរាគមន៍ និងបញ្ជូនជនរងគ្រោះទៅកាន់មន្ទីរពេទ្យ ៕
ចែករំលែកព័តមាននេះ