រាជធានីភ្នំពេញ ៖ កម្លាំងគយ និងរដ្ឋាកររាជធានីភ្នំពេញ ដែលដឹកនាំដោយលោក ភេ មុនី ប្រធានការិយាល័យគយរាជធានីភ្នំពេញ សហការជាមួយកម្លាំងកងរាជអាវុធហត្ថរាជធានីភ្នំពេញ ដោយមានការសម្របសម្រួលពីលោក ខាំ សុផារី ព្រះរាជអាជ្ញារងអមសាលាដំបូងរាជធានីភ្នំពេញ បានចុះត្រួតពិនិត្យស្នាក់ការកណ្តាលចែកចាយទូរស័ព្ទដៃម៉ាក SINGTECH ដ៏ធំមួយកន្លែង ដែលមានអាសយដ្ឋានផ្ទះលេខ៧៥-៧៧ តាមបណ្តោយផ្លូវលេខ៤៣០ ក្នុងសង្កាត់ទំនប់ទឹក ខណ្ឌចំការមន កាលពីវេលាម៉ោង៩ និង៣០នាទីព្រឹក រហូតល្ងាច ថ្ងៃទី០១ ធ្នូ ២០១៥ ។
តាមប្រភពព័ត៌មានពីមន្ត្រីគយម្នាក់បានប្រាប់ឱ្យដឹងថា ដោយឆ្លងកាត់ទៅតាមការស្រាវជ្រាវរបស់កម្លាំងជំនាញ នៃការិយាល័យគយរាជធានីភ្នំពេញ ដោយមានការសង្ស័យថា ទីតាំងចែកចាយទូរស័ព្ទដៃដ៏ធំខាងលើនេះបានធ្វើការលួចនាំចូល និងចែកចាយនូវទូរស័ព្ទដៃម៉ាក SINGTECH ដោយខុសច្បាប់ ទើបកម្លាំងរបស់លោកធ្វើការសហការជាមួយកម្លាំងកងរាជអាវុធហត្ថរាជធានីភ្នំពេញ និងអមដោយព្រះរាជាអាជ្ញារងអមសាលាដំបូងរាជធានីភ្នំពេញ ចុះមកធ្វើការត្រួតពិនិត្យ ។
ប្រភពបានបន្តទៀតថា រហូតមកទល់ពេលនេះ ម៉ោងជាង៣រសៀលនេះសមត្ថកិច្ចបានរកឃើញទូរស័ព្ទមួយចំនួនហើយដែលមិនបានបង់ពន្ធ តែចំពោះតួលេខពិតប្រាកដយ៉ាងណានោះមិនអាចបញ្ជាក់បាននៅឡើយទេ ៕
ចែករំលែកព័តមាននេះ