ខេត្តព្រះវិហារ ៖ ជនសង្ស័យម្នាក់ក្នុងចំណោម២នាក់ត្រូវបានកម្លាំងកងរាជអាវុធហត្ថខេត្តព្រះវិហារឃាត់ខ្លួនពីបទមនុស្សឃាតដោយចេតនាក្នុងជម្លោះពេលផឹកស៊ីជាមួយគ្នានៅចំណុចមុខវត្តកណ្តោលកោះ ភូមិទី១០ ឃុំកោះសុទិន ស្រុកកោះសុទិន ខេត្តកំពង់ចាម កាលពីថ្ងៃទី២៨ វិច្ឆិកា ២០១៥កន្លងទៅនេះ ដែលការចាប់ខ្លួននេះធ្វើឡើងកាលពីវេលាម៉ោង៨ និង៣០នាទីព្រឹក ថ្ងៃទី០១ ធ្នូ ២០១៥ នៅផ្ទះបងស្រីជនសង្ស័យស្ថិតក្នុងភូមិស្រអែមជើង ឃុំស្រឯម ស្រុកជាំក្សាន្ត ខេត្តព្រះវិហារ ។
ជនសង្ស័យដែលត្រូវចាប់ខ្លួនឈ្មោះ សុំ ពិសី ភេទប្រុស អាយុ២៨ឆ្នាំ រស់នៅក្នុងភូមិទី១០ ឃុំកោះសូទិន ស្រុកកោះសូទិន ខេត្តកំពង់ចាម ។ ចំណែកជនសង្ស័យម្នាក់ទៀតបានរត់គេចខ្លួនបាត់មានឈ្មោះ សុំ លាប ត្រូវជាបងប្រុងបង្កើតរបស់ជនសង្ស័យ សុំ ពិសី ។
លោកវរសេនីយ៍ត្រី ជូ ប៊ុនសុង មេបញ្ជាការរង ទទួលបន្ទុកយុត្តិធម៌ នៃកងរាជអាវុធហត្ថខេត្តព្រះវិហារ បានឲ្យដឹងថា ក្រោយពីទទួលបានការស្នើសុំជួយសហការពីកម្លាំងកងរាជអាវុធហត្ថខេត្តកំពង់ចាម នៅព្រឹកថ្ងៃទី០១ ខែធ្នូ ឆ្នាំ២០១៥នេះ លោកបានដឹកនាំកម្លាំងចុះឃាត់ខ្លួនជនសង្ស័យបានម្នាក់ ក្នុងចំណោម២នាក់ ដែលបានយកដំបងវ៉ៃជនរងគ្រោះឈ្មោះ ថន វត្ថា ភេទប្រុស អាយុ៣០ឆ្នាំ រស់នៅភូមិ-ឃុំជាមួយជនសង្ស័យខាងលើ បណ្តាលឲ្យស្លាប់ ក្រោយពីក្រុមគ្រួសារបានបញ្ជូនជនរងគ្រោះដល់មន្ទីពេទ្យ ។
លោក ជូ ប៊ុនសុង បន្តទៀតថា ចំណែកបក្ខពួកជនសង្ស័យម្នាក់ទៀតឈ្មោះ សុំ លាប ជាបងប្រុសបង្កើតបានគេចខ្លួនបាត់មុនពេលដែលសមត្ថកិច្ចចុះទៅដល់ទីតាំងជនសង្ស័យលាក់ខ្លួន ។
ក្រោយពីសមត្ថកិច្ចឃាត់ខ្លួនជនសង្ស័យឈ្មោះ សុំ ពិសី ក៏បានឆ្លើយសារភាពថា មុនពេលកើតហេតុរូបគេជាមួយបងប្រុសបានអង្គុយផឹកទឹកត្នោតជូរជាមួយអ្នកភូមិ និងជនរងគ្រោះ បន្តិចក្រោយមកបានទាស់ពាក្យសំដីគ្នា ស្រាប់តែជនរងគ្រោះជិះម៉ូតូទៅផ្ទះយកកាំបិតប៉័ងតោមករកកាប់ខ្លួន ដោយឃើញដូច្នេះបងប្រុសខ្លួនឈ្មោះ សុំ លាប បានស្ទុះទៅយកដំបងមកវ៉ៃជនរងគ្រោះចំដៃ និងក្បាល ក្រោយពេលបញ្ជូនទៅសង្គ្រោះនៅមន្ទីរពេទ្យជនរងគ្រោះក៏ស្លាប់តែម្តង ពេលនោះខ្លួន និងបងប្រុសក៏បានរត់មកស្នាក់នៅជាមួយបងស្រីបង្កើតនៅភូមិស្រអែមជើង ឃុំស្រអែម ស្រុកជាំក្សាន្ត ខេត្តព្រះវិហារ ។
សូមបញ្ជាក់ថា ក្នុងការចុះឃាត់ខ្លួនជនសង្ស័យខាងលើ សមត្ថកិច្ចដកហូតបានម៉ូតូម៉ាកស្មាស់១គ្រឿង ទូរស័ព្ទដៃ១ លុយខ្មែរចំនួន១១ម៉ឺនរៀល ។
បច្ចុប្បន្ន ជនសង្ស័យត្រូវបានកម្លាំងកងរាជអាវុធហត្ថខេត្តព្រះវិហារកសាងសុំណុំរឿងប្រគល់ទៅឲ្យកម្លាំងកងរាជអាវុធហត្ថខេត្តកំពង់ចាមដើម្បីចាត់ការតាមនិតិវិធីច្បាប់បន្ត ៕
ចែករំលែកព័តមាននេះ