ខេត្តកណ្ដាល ៖ កម្លាំងល្បាតប៉ុស្តិ៍នគរបាលរដ្ឋបាលដីឥដ្ឋជិះម៉ូតូល្បាតតាមមូលដ្ឋាននានាពេលយប់ បានធ្វើការឃាត់ខ្លួនជនសង្ស័យ២នាក់ ដកហូតបានវត្ថុតាងថ្នាំញៀនប្រភេទម៉ាទឹកកក១កញ្ចប់តូច រួមនឹងឧបករណ៍ប្រើប្រាស់គ្រឿងញៀនមួយចំនួនទៀតកាលពីវេលាម៉ោង១០ និង៤០នាទីយប់ ថ្ងៃទី៣០ វិច្ឆិកា ២០១៥ នៅចំណុចលើផ្លូវជាតិលេខ១ ស្ថិតក្នុងភូមិស្តៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្ដាល ។
ជនសង្ស័យទាំង២នាក់ដែលសមត្ថកិច្ចឃាត់ខ្លួនមាន ១-ឈ្មោះ សំ ច័ន្ទសូយ៉ា ភេទប្រុស អាយុ២៣ឆ្នាំ ជនជាតិខ្មែរ មុខរបរជាមន្ត្រីប៉ូលិស មានស្រុកកំណើតភូមិវត្តបូណ៌ សង្កាត់សាលាកំរើក ក្រុងសៀមរាប បច្ចុប្បន្នស្នាក់នៅបណ្ដោះអាសន្នជាសិក្ខាកាមរៀននៅបណ្ឌិត្យសភានគរបាលជាតិកម្ពុជា ស្ថិតនៅភូមិស្តៅកន្លែង៣ ឃុំដីឥដ្ឋ ស្រុកកៀនស្វាយ និង ២-ឈ្មោះ សូ ចំរ៉ុង ហៅម៉ុង ភេទប្រុស អាយុ១៦ឆ្នាំ ជនជាតិខ្មែរ មានទីលំនៅភូមិស្ដៅកន្លែង២ ឃុំដីឥដ្ឋ ស្រុកកៀនស្វាយ ។
លោកអនុសេនីយ៍ឯក អ៊ិង ស៊ីឡាក់ នាយប៉ុស្តិ៍នគរបាលរដ្ឋបាលដីឥដ្ឋ បានប្រាប់អ្នកយកព័ត៌មានឲ្យដឹងថា ខណៈកម្លាំងរបស់លោកជិះម៉ូតូល្បាត ដើម្បីរក្សាការពារសុវត្ថិភាព សន្តិសុខសណ្ដាប់ធ្នាប់ជូនប្រជាពលរដ្ឋក្នុងមូលដ្ឋានដូចសព្វដង ក៏បានជួបជនសង្ស័យ២នាក់កំពុងជិះកង់ឌុបគ្នានាពេលយប់ងងិត ដោយមានការសង្ស័យកម្លាំងក៏បានហៅសួរនាំ ប៉ុន្តែជនទាំង២នាក់នោះមិនព្រមឈប់ទេ ហើយកម្លាំងបានជិះម៉ូតូដេញតាមដល់ចំណុចខាងលើចាប់ឆែកឆេររកឃើញថ្នាំញៀនប្រភេទម៉ាទឹកកក១កញ្ចប់តូចនៅក្នុងកាបូបលុយ រួមនិងឧបករណ៍សម្រាប់ជក់មួយចំនួន ព្រមទាំងដកហូតបានទូរស័ព្ទដៃ២គ្រឿង ម៉ាក Kokian និងម៉ាក HTC, ដែកកេះ១, ស្ករកៅស៊ូ១ដុំ, កាតអេធីអឹម១សន្លឹក, អត្តសញ្ញាណប័ណ្ណសញ្ជាតិខ្មែរ១សន្លឹកឈ្មោះ សំ ច័ន្ទសូយ៉ា ។
បន្ទាប់ពីធ្វើការសាកសួរនៅប៉ុស្តិ៍រួច ជនសង្ស័យទាំង២នាក់ត្រូវបានកសាងសំណុំរឿងបញ្ជូនទៅអធិការដ្ឋាននគរបាលស្រុកកៀនស្វាយចាត់ការបន្តតាមនិតិវិធីច្បាប់ ៕
ចែករំលែកព័តមាននេះ