ខេត្តបន្ទាយមានជ័យ ៖ ប្រជាពលរដ្ឋក្រុងសិរីសោភ័ណ ក៏ដូចជាប្រពលរដ្ឋខេត្តបន្ទាយមានជ័យ បានធ្វើការរិះគន់ត្រង់ៗថា អាជ្ញាធរក្រុង និងអាជ្ញាធរខេត្តពុំបានយកចិត្តទុកដាក់ពីបញ្ហាសម្រាមដែលត្រូវបានជនខិលខូចមួយចំនួនលួចយកទៅចាក់ចោលនៅចំណុចក្បាលស្ពានទឹកថ្លា ជាប់ផ្លូវជាតិលេខ៥ ដែលបណ្ដាលឲ្យជះក្លិនស្អុយយ៉ាងខ្លាំង ។
ប្រជាពលរដ្ឋបានធ្វើការរិះគន់ទៀតថា អាជ្ញាធរខេត្តបន្ទាយមានជ័យ និងអាជ្ញាធរក្រុងសិរីសោភ័ណ ហាក់ដូចជាគ្មានយកចិត្តទុកដាក់ពីបញ្ហាសម្រាមទាល់តែសោះ ខណៈដែលអាជ្ញាធរបានកាយយកអាចម៍ដីលក់រាប់ខែមកហើយនៅភូមិពង្រ សង្កាត់កំពង់ស្វាយ ថាយកធ្វើជាកន្លែងចាក់សម្រាម ។
ប្រជាពលរដ្ឋបន្តទៀតថា ចំណុចក្បាលស្ពានទឹកថ្លា ដែលត្រូវជនមិនស្គាល់មុខលួចចាក់សម្រាមយូរមកហើយរហូតជះក្លិនស្អុយដល់អ្នកធ្វើដំណើរឆ្លងកាត់នោះ គឺជាផ្លូវជាតិដែលភ្ញៀវជាតិ និងអន្តរជាតិតែងតែធ្វើដំណើរឆ្លងកាត់ពីច្រកទ្វារអន្តរជាតិប៉ោយប៉ែតមកប្រទេសកម្ពុជា ដើម្បីទៅលេងប្រាសាទអង្គរវត្ត ។
ពាក់ព័ន្ធបញ្ហានេះ លោក លី សារី អភិបាលរងខេត្ត បានឲ្យ«កោះសន្តិភាព»ដឹងថា ចំពោះបញ្ហាសម្រាមនេះ អាជ្ញាធរខេត្តបានឲ្យសាលាក្រុងសិរីសោភ័ណ ត្រូវចាត់វិធានការ ដោយឲ្យសមត្ថកិច្ចចាំឃ្លាំមើល ហើយបើឃើញអ្នកណាយកសម្រាមទៅចោលនៅកន្លែងនោះ នឹងចាប់មកចាត់វិធានការតាមផ្លូវច្បាប់ ។
ប្រជាពលរដ្ឋមានតែរង់ចាំមើលថា តើអាជ្ញាធរក្រុងសិរីសោភ័ណ អាជ្ញាធរខេត្តបន្ទាយមានជ័យ មានវិធានការបែបណាចំពោះសម្រាមដែលគេយកទៅចោលរហូតដល់មានក្លិនស្អុយដល់អ្នកធ្វើដំណើរ និងធ្វើឲ្យប៉ះពាល់មុខមាត់ខេត្តទាំងមូល ក៏ដូចជាប៉ះពាល់ដល់មុខមាត់ប្រទេសជាតិទាំងមូលបែបនេះ ដែលសម្រាមនេះត្រូវគេចាក់នៅក្បែរផ្លូវជាតិដែលជាផ្លូវតែងតែមានភ្ញៀវជាតិ និងអន្តរជាតិឆ្លងកាត់ជារៀងរាល់ថ្ងៃបែបនេះ ៕
ចែករំលែកព័តមាននេះ