ខេត្តកំពត ៖ កម្លាំងនគរបាលស្នងការខេត្តដឹកនាំចុះបង្ក្រាបផ្ទាល់ដោយលោកឧត្តមសេនីយ៍ ម៉ៅ ចន្ទ័មធុរឹទ្ឋ ស្នងការនគរបាលខេត្ត និងដឹកនាំសម្របសម្រួលដោយលោក ខៃ សម្ផ័ស្ប ព្រះរាជអាជ្ញារងអមសាលាដំបូងខេត្ត…
ខេត្តកំពត ៖ កម្លាំងនគរបាលស្នងការខេត្តដឹកនាំចុះបង្ក្រាបផ្ទាល់ដោយលោកឧត្តមសេនីយ៍ ម៉ៅ ចន្ទ័មធុរឹទ្ឋ ស្នងការនគរបាលខេត្ត និងដឹកនាំសម្របសម្រួលដោយលោក ខៃ សម្ផ័ស្ប ព្រះរាជអាជ្ញារងអមសាលាដំបូងខេត្ត បានចុះបង្ក្រាបទីតាំងជួញដូរ និងប្រើប្រាស់គ្រឿងញៀនមួយកន្លែងក្នុងផ្ទះជនសង្ស័យ ស្ថិតក្នុងភូមិត្រពាំងរាំង ឃុំអង្គរមាស ស្រុកដងទុង ដោយឃាត់ខ្លួនជនសង្ស័យបាន៤នាក់ ក្នុងនោះមានមុខសញ្ញាមេខ្លោងម្នាក់ និងអ្នកប្រើប្រាស់៣នាក់ រួមនិងវត្ថុតាងថ្នាំញៀន៨កញ្ចប់តូច និងវត្ថុតាងសម្ភារចែកចាយ និងជក់មួយចំនួន ។ ក្រៅពីថ្នាំញៀន និងសម្ភារប្រើប្រាស់ និងជក់ថ្នាំញៀន កម្លាំងសមត្ថកិច្ចបានឆែកឆេរក្នុងផ្ទះ និងក្រៅផ្ទះជនសង្ស័យ បានប្រទះឃើញម៉ូតូមិនប្រក្រតីចំនួន៣គ្រឿង និងអាវម៉ូតូ ព្រមទាំងកាងម៉ូតូជាច្រើនទៀតដែលលាក់ក្នុងផ្ទះជនសង្ស័យជាមេខ្លោងជួញដូរគ្រឿងញៀនទៀតផង ។
លោកឧត្តមសេនីយ៍ត្រី ម៉ៅ ចន្ទ័មធុរឹទ្ឋ បានឲ្យដឹងថា លោកចុះប្រតិបត្តិការបង្ក្រាបគ្រឿងញៀននេះរយពេល២ថ្ងៃ(២៩-៣០វិច្ឆិកា២០១៥) ចាប់បានវត្ថុតាងគ្រឿងញៀន ហើយយើងប្រទះឃើញវត្ថុតាងបទល្មើសករណីប្លន់ម៉ូតូ និងកាច់កម៉ូតូ ជាករណីដែលកម្លាំងសមត្ថកិច្ចកំពុងតែធ្វើការស៊ើបអង្កេតយ៉ាងដុតដៃដុតជើងផងដែរ ។ លោកបន្តទៀតថា កាលពីយប់ថ្ងៃទី២៩ វិច្ឆិកា ២០១៥ កម្លាំងសមត្ថកិច្ចបានឃាត់ខ្លួនជនប្រើប្រាស់គ្រឿងញៀនបានម្នាក់ ក្រោយពីធ្វើការសាកសួរ ជនសង្ស័យបានសារភាពប្រាប់មុខសញ្ញាមេខ្លោងម្នាក់ទៀត ពេលនោះលោកបានបញ្ជាឲ្យលោកវរសេនីយត្រី លក ញ៉ាវ នាយរងការិយាល័យព្រហ្មទណ្ឌកម្រិតធ្ងន់ នៃស្នងការនគរបាលខេត្ត ដឹកនាំកម្លាំងសមត្ថកិច្ចដោយសហការជាមួយលោក ខៃ សម្ផ័ស្ប ព្រះរាជអាជ្ញារងអមសាលាដំបូងខេត្ត ចុះបង្ក្រាបដល់ទីតាំងសំបុកជួញដូរតែម្តង ពេលនោះយើងចាប់ឃាត់ខ្លួនបានមេខ្លោងម្នាក់ និងជនសង្ស័យ២នាក់ទៀតដែលកំពុងប្រើប្រាស់ ព្រមទាំងប្រមូលបានវត្ថុតាងថ្នាំញៀន និងវត្ថុតាងដែលសង្ស័យជាសម្ភារប្លន់ផងដែរ ។
ជនសង្ស័យទាំង៤នាក់មាន ១-ឈ្មោះ តឹង គឹមសែន ភេទប្រុស អាយុ២៥ឆ្នាំ មានទីលំនៅភូមិល្អាង ឃុំល្អាង ស្រុកដងទង់ ចាប់ឃាត់ខ្លួននៅយប់ថ្ងៃទី២៩ វិច្ឆិកា ២០១៥, ២-ឈ្មោះ ហ៊ិន ដារ៉ូ ភេទប្រុសអាយុ១៧ឆ្នាំ មានទីលំនៅភូមិបើន ឃុំល្អាង ស្រុកដងទង់, ៣-ឈ្មោះ សន សុភា ភេទប្រុស អាយុ២៣ឆ្នាំ មានទីលំនៅភូមិត្រពាំងបី ឃុំល្បើក ស្រុកឈូក និង ៤-ឈ្មោះ ហ៊ីម ធូ ភេទប្រុស អាយុ៣១ឆ្នាំ មានទីលំនៅភូមិត្រពាំងរាំង ឃុំអង្គរមាស ស្រុកដងទង់ ជាមេក្លោងជួញដូរថ្នាំញៀន និងជាមុខសញ្ញាសង្ស័យករណីប្លន់ និងកាច់កម៉ូតូ ដែលសមត្ថកិច្ចកំពុងស៊ើបអង្កេត និងស្រាវជ្រាវមុខសញ្ញាខាងលើយ៉ាដុតដៃដុតជើងប៉ុន្មានថ្ងៃបន្តបន្ទាប់នេះផងដែរ ។
បច្ចុប្បន្ន ជនសង្ស័យទាំង៤នាក់ សមត្ថកិច្ចកំពុងធ្វើការសាកសួរនៅការិយាលយ័ព្រហ្មទណ្ឌ នៃស្នងការនគរបាលខេត្ត ដើម្បីវែកមុខសញ្ញាជនល្មើសក្នុងករណីប្លន់បន្តទៀត ៕
ចែករំលែកព័តមាននេះ