រាជធានីភ្នំពេញ ៖ កម្លាំងនគរបាលអន្តោប្រវេសន៍ដឹកនាំផ្ទាល់ដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត អនុវត្តន៍និតិវិធី នៃអគ្គនាយកដ្ឋានអន្តោប្រវេសន៍ បានចុះត្រួតពិនិត្យនៅក្នុងបុរីទំនើបមួយកន្លែងស្ថិតក្នុងសង្កាត់ភ្នំពេញថ្មី ខណ្ឌសែនសុខ ដោយរកឃើញជនជាតិវៀតណាមស្នាក់នៅ និងធ្វើការខុសច្បាប់ចំនួន២១នាក់ កាលពីវេលាម៉ោង២ និង២០នាទីរសៀល ថ្ងៃទី៣០ វិច្ឆិកា ២០១៥ ។
លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត អនុវត្តន៍និតិវិធី នៃអគ្គនាយកដ្ឋានអន្តោប្រវេសន៍ បានឲ្យដឹងថា ក្រោយធ្វើការស្រាវជ្រាវ និងទទួលបានព័ត៌មានថា មានជនជាតិវៀតណាមជាច្រើននាក់បានមកលួចស្នាក់នៅដោយខុសច្បាប់ និងធ្វើជាជាងសំណង់នៅក្នុងបុរីមួយកន្លែងស្ថិតនៅក្នុងសង្កាត់ភ្នំពេញថ្មី ខណ្ឌសែនសុខនោះ លោកក៏បានដឹកនាំកម្លាំងប៉ូលិសចុះត្រួតពិនិត្យ និងធ្វើការឆែកឆេរ ដោយរកឃើញជនជាតិវៀតណាមចំនួន២១នាក់ ក្នុងនោះមានស្ត្រីម្នាក់ ។ លោកឧត្តមសេនីយ៍ទោ អ៊ុក ហៃសីឡា បានបន្តទៀតថា ក្រោយពេលរកឃើញរួច សមត្ថកិច្ចលោកក៏បានធ្វើការឃាត់ខ្លួនបញ្ជួនទៅអគ្គនាយកដ្ឋានអន្តោប្រវេសន៍ដើម្បីធ្វើការអប់រំណែនាំឲ្យធ្វើសៀវភៅកាងារ និងធ្វើការផាកពិន័យតាមច្បាប់ ដោយធ្វើផាកពិន័យថវិកាចូលរដ្ឋចំនួន៥០ម៉ឺនរៀលសម្រាប់ជនជាតិបរទេសម្នាក់ ។
ពាក់ព័ន្ធនឹងករណីនេះផងដែរ លោកក៏បានធ្វើការអំពាវនាវ និងសុំឲ្យជនបទេស ដែលស្នាក់នៅ និងធ្វើការសុំច្បាប់ និងគោរពច្បាប់ប្រទេសកម្ពុជាផង បើពុំនោះទេសមត្ថកិច្ចនឹងចាត់វិធានការដោយពុំលើកលែងឡើយ ។
លោកឧត្ដមសេនីយ៍ទោបានបន្តបន្ថែមទៀតថា កន្លងមកលោកបានធ្វើការអំពាវនាវដល់ម្ចាស់រោងចក្រ សហគ្រាស់ និងសិប្បកម្មនានាទាំងអស់ ឲ្យបញ្ឈប់ការជួលកម្មករបរទេសដែលចូលមកដោយខុសច្បាប់មកធ្វើការបន្តទៀតនៅក្នុងការដ្ឋាន និងសិប្បកម្ម ឬហាងផ្សេងៗរបស់ខ្លួន បើពុំនោះទេសមត្ថកិច្ចនឹងចាត់វិធានការទៅតាមផ្លូវច្បាប់ចំពោះអ្នករឹងទទឹង ។
យោងតាមមាត្រាទី២៩ ច្បាប់ស្តីពីអន្តោរប្រវេស បានចែងថា ជនបរទេសណាដែលគ្មានការអនុញាតិ ហើយចូលមកក្នុងព្រះរាជាណាចក្រកម្ពុជាដោយលបលួច លាក់បន្លំ ឬល្បិចផ្សេងទៀតដែល ផ្ទុយពីបទបញ្ញាតិនៃច្បាប់នេះ ត្រូវផ្តន្ទាទោសដាក់គុកពី៣ខែ ដល់៦ខែ មុននឹងបណ្តេញចេញ ត្រូវផ្តន្ទាទោសដូចគ្នានឹងជនល្មើស ចំពោះជនណាដែលផ្តល់ជំនួយ ឬជួយលាក់បាំងក្នុងការបញ្ចូលជនបរទេសដែលគ្មានការអនុញាតិមកក្នុងព្រះរាជាណាចក្រកម្ពុជា មន្ត្រីភ្ញាក់ងាររាជការមានសមត្ថកិច្ចរូបណា ដែលជាអ្នកសមគំនិត ឬជួយសម្រួលក្នុងការប្រព្រឹត្តបទល្មើសខាងលើ ត្រូវផ្តន្ទាទោសដាក់គុកពី១ខែដល់១ឆ្នាំ ហើយមន្ត្រីរាជការមានសមត្ថកិច្ចរូបណា ដែលធ្វើមានការធ្វេសប្រហែស ខ្វះការប្រុងប្រយត្ន័ ឬមិនគោរពបទបញ្ជា ត្រូវទទួលការផ្តន្ទាទោស ផ្នែករដ្ឋបាល មធ្យោបាយ សម្ភារប្រើប្រាស់ សម្រាប់ប្រព្រឹត្តបទល្មើស ត្រូវរឹមអូសទុកជាសម្បត្តិរដ្ឋដោយតុលាការ ៕
ចែករំលែកព័តមាននេះ