ខេត្តបាត់ដំបង ៖ ក្រុមចោរដៃស្អិតដែលធ្វើសកម្មភាព«ឆក់» ទ្រព្យសម្បត្តិអ្នកដំណើរនៅតាមដងផ្លូវយ៉ាងសកម្មបំផុតនៅក្នុងក្រុងបាត់ដំបង ត្រូវកម្លាំងនគរបាលផ្នែកបង្ការ-បង្ក្រាបនៃការិយាល័យព្រហ្មទណ្ឌកំរិតស្រាលឃាត់ខ្លួនបានចំនួន៣នាក់ជាបន្តបន្ទាប់ ចាប់តាំងពីរសៀលថ្ងៃទី២៩ រហូតដល់ព្រឹកថ្ងៃទី៣០ វិច្ឆិកា នេះ គ្រាដែលពួកគេកំពុងជិះម៉ូតូតាមដងផ្លូវក្នុងក្រុងបាត់ដំបងក្នុងបំណងធ្វើសកម្មភាពបន្តទៀត។
ប្រធានក្រុមបង្ការ-បង្ក្រាប លោកឈឿង គឹមសុង បានឲ្យដឹងថា ជនសង្ស័យទាំង៣នាក់ ដែលត្រូវឃាត់ខ្លួនពាក់ព័ន្ធក្នុងអំពើ«ឆក់»នោះមាន ១-ឈ្មោះហម ដាវ័ន្ត ហៅប៉ូច អាយុ១៩ឆ្នាំ នៅភូមិកាប់គោថ្មី សង្កាត់អូរចា ស្រុងបាត់ដំបង ២-ឈ្មោះយឿង ហៅម៉ាប់ អាយុ៣០ឆ្នាំ នៅស្រុកមោងឬស្សី និង៣-ឈ្មោះហាក់ លីហៀង ហៅតាក់ អាយុ១៧ឆ្នាំ។
លោកឈឿង គឹមសុង បានបញ្ជាក់ថា ក្រុមនេះនៅមានបក្បពួកជាច្រើននាក់ទៀត ដែលជាប់ពាក់ព័ន្ធក្នុងករណី«ឆក់»យកទ្រព្យសម្បត្តិពីអ្នកដំណើរតាមដងផ្លូវនានា ក្នុងក្រុងបាត់ដំបងកន្លងមក តែពេលនេះកំពុងសម្ងំលាក់ខ្លួន។
ជុំវិញការឃាត់ខ្លួនជនសង្ស័យទាំង៣នាក់ខាងលើនេះ បើតាមមន្ត្រីជំនាញការិយាល័យព្រហ្មកំរិតស្រាលបានឲ្យដឹងថា ក្រុមចោរដៃស្អិតនេះបានធ្វើសកម្មភាព«ឆក់»ខ្សែ-ក ពីស្ត្រីម្នាក់ឈ្មោះមាស បុប្ផារ័ត្ន អាយុ៣៣ឆ្នាំ នៅភូមិឡឥដ្ធ សង្កាត់ព្រែកព្រះស្ដេច ក្រុងបាត់ដំបង កាលពីព្រឹកថ្ងៃទី០៨ វិច្ឆិកា ពេលកំពុងជិះម៉ូតូតាមផ្លូវត្រង់ចំណុចភូមិរំចេក៤ សង្កាត់រតនៈ ក្រុងបាត់ដំបង។ នៅក្នុងបណ្ដឹងស្ត្រីរងគ្រោះបាននិយាយប្រាប់សមត្ថកិច្ចថា ខ្សែ-កមាសដែលក្រុមចោរខាងលើបាន«ឆក់»យកទៅនោះមានទម្ងន់៥ជី និងមានតម្លៃ៨៣០ដុល្លារ៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ