ខេត្តកំពត ៖ ក្រុមប្រជាពលរដ្ឋបាននាំគ្នារិះគន់ថា សមត្ថកិច្ចស្រុកដងទង់អនុញ្ញាតឱ្យមានសង្វៀនបញ្ជល់មាន់ធំមួយ ធ្វើឱ្យប៉ះពាល់ដល់គោលនយោបាយភូមិឃុំមានសុវត្ថិភាព របស់រាជរដ្ឋាភិបាល ។ តើភូមិឃុំមានសុវត្ថិភាពនៅក្រហែងមេឃណាទៅ បើក្នុងមូលដ្ឋានមានល្បែងចេញមុខបែបនេះ ។
យោងតាមសេចក្តីរាយការណ៍ឱ្យដឹងថា សង្វៀនបញ្ជល់មាន់ដុះស្លែ ព្រោះគ្មានការបង្ក្រាបពីសមត្ថកិច្ចនោះ គឺមានទីតាំងទល់មុខរោងចក្រស៊ីម៉ង់ត៍ ស្ថិតក្នុងភូមិព្រៃគគីរ ឃុំដងទង់ ស្រុកដងទង់ មានម្ចាស់ឈ្មោះ សាយ ដែលគេស្គាល់ថាជាគ្រូបង្រៀន ឈ្មោះ វុធ ឈ្មោះ តាង ឈ្មោះទ្រល និងម្នាក់ទៀតឈ្មោះ វណ្ណារ៉ា ធ្វើពេទ្យ ។ សង្វៀនបញ្ជល់មាន់នេះកំពុងតែបើកលេងយ៉ាងគគ្រឹកគគ្រេង ដោយគ្មានសមត្ថកិច្ចណាអើពើបង្ក្រាបទាល់តែសោះ ។
ពាក់ព័ន្ធនឹងបញ្ហានេះ លោកស្នងការនគរបាលខេត្ត បានប្រាប់តាមទូរស័ព្ទថា លោកមិនបានដឹងទេ ចាំលោកឱ្យខាងស្រុកចុះទៅពិនិត្យមើល ។ ចំណែកលោក ទូច ឌន អធិការនគរបាលស្រុកដងទង់ បានឱ្យដឹងថា រឿងគេបើកលេងល្បែងបញ្ជល់មាន់នេះ លោកធ្លាប់ប្រាប់ម្ចាស់ទាំងនោះថាកុំឱ្យលេង តែគេនៅតែបើកលេង ។ លោកអធិការអះអាងថា លោកមិនពាក់ព័ន្ធនឹងការស៊ីសំណូកបើកដៃឱ្យលេងដូចការលើកទ្បើងនោះទេ ។ បើគេលេងមិនដឹងធ្វើម៉េចទេ ។
មជ្ឈដ្ឋានប្រជាពលរដ្ឋលើកទ្បើងថា ការមានល្បែងនេះហើយដែលនាំឲ្យកើតមានអំពើប្លន់មិនចេះចប់មិនចេះហើយ ។ អស់លោកថ្នាក់លើគួរចាត់វិធានការបង្ក្រាបម្តងហើយ បើរំពឹងលើអាជ្ញាធរមូលដ្ឋាន ដូចជាមិនហ៊ានបង្ក្រាបទេ គឺបានត្រឹមឆ្លើយដាក់គ្នាប៉ុណ្ណោះ ។ បើអាជ្ញាធរឆ្លើយថាមិនដឹង តើមានខ្មោចបិសាចណាជឿដែរទេ? សូម្បីក្មេងក៏អត់ជឿដែរ… ហេ! ហេ!
ចែករំលែកព័តមាននេះ