រាជធានីភ្នំពេញ ៖ បន្ទាប់ពីរដ្ឋបាលរាជធានីភ្នំពេញចេញសេចក្តីសម្រេចបើកដំណើរការឡើងវិញចំពោះផ្សារឯកជនដែលមានសណ្តាប់ធ្នាប់របៀបរៀបរយ និងអនាម័យ បរិស្ថាន ក្នុងរាជធានីភ្នំពេញ អាជីវករ ផ្សារមួយចំនួន មានសេចក្តីត្រេកអរ ហើយបានរៀបចំតូប និងបើកដំណើរការលក់ដូរនៅក្នុងផ្សាររបស់ខ្លួនបណ្តើរៗហើយ។ ដោយឡែក ផ្សារធំទួលសង្កែហៅផ្សារសាំហាន់ដែលជាផ្សារឯកជនធំមួយក្នុងចំណោមផ្សារជាច្រើន ដែលមានសណ្តាប់ធ្នាប់ស្ថិតនៅក្នុងសង្កាត់ទួលសង្កែ១ ខណ្ឌឫស្សីកែវក៏បានរៀបចំបោសសម្អាត និងបើកលក់ដូរជាបណ្តើរៗហើយដែរ។
ប្រភពព័ត៌មានបានឲ្យដឹងថា នៅររសៀលថ្ងៃទី២៤ ខែមិថុនានេះ ដែលជាថ្ងៃរដ្ឋបាលរាជធានីភ្នំពេញចេញសេចក្តីសម្រេច បើកដំណើរការផ្សារឡើងវិញ គេឃើញអាជីវករផ្សារធំទួលសង្កែ ហៅផ្សារសាំហាន់មួយចំនួនបានរៀបចំបោសសម្អាតជូតូបឡើងវិញ និងខ្លះទៀតក៏បានបើកលក់ដូរបណ្តើរៗដែរ និងមួយចំនួនទៀត ក៏មិនទាន់បានរៀបចំនៅឡើយ។ អាជីវរករម្នាក់ដែលកំពុងរៀបចំបោសសម្អាត បានឲ្យកោះសន្តិភាពដឹងថា គាត់មានសេចក្តីត្រេកអរណាស់ បន្ទាប់ពីទទួលដំណឹងថា រដ្ឋបាលរាជធានីភ្នំពេញបានបើកដំណើរការផ្សារឡើងវិញនៅថ្ងៃទី២៥ ខែមិថុនាស្អែកនេះ។ គ្រាន់តែទទួលបានដំណឹងភ្លាមគាត់ និងភរិយាក៏បាននាំគ្នា មករៀបចំបោសសម្អាតជូតតូប ដើម្បីបើកលក់ដូរ ព្រោះថ្ងៃស្អែកនេះជាថ្ងៃសុក្រដែលជាថ្ងៃល្អ។
ចំណែក អាជីវករផ្សេងៗទៀតក៏មានក្តីរីករាយណាស់ ដែលបានរកស៊ីឡើងព្រោះមួយរយៈក្នុងស្ថានភាពកូវីដពួកគាត់ស្ថិតនៅតំបន់ក្រហម បិទខ្ទប់ បានជួបនូវបញ្ហាជីវភាពលំបាកខ្លាំង លក់របស់របរខ្ទេចខ្ទី ដើម្បីបង់ថ្លៃតូបអត់បានលក់ដូរ ៥០ភាគរយ ,ថ្លៃផ្ទះជួល និងខ្លះទៀតបង់ធានាគារជាដើម។ ពេលផ្សារដំណើរការលក់ដូរឡើងវិញអាចរកចំណូល ដើម្បីកាត់បន្ថយការលំបាកឡើងវិញ។ គួរបញ្ជាក់ថា ដោយសារតែបញ្ហាជីវភាពកាលពីព្រឹកម្សិលមិញថ្ងៃទី២៣ ខែមិថុនា អាជីវករផ្សារធំទួលសង្កែ សាំហាន់ប្រមាណ៥០នាក់ក្នុងចំណោមអាជីវករប្រមាណជាង៤០០នាក់ ដែលបានផ្តិតមេដៃទទូចសុំឲ្យរដ្ឋបាលរាជធានីភ្នំពេញក៏ដូចជាអាជ្ញាធរខណ្ឌឫស្សីកែវ មេត្តាបើកដំណើរផ្សារសាំហាន់នេះឡើងវិញដោយលើកហេតុផលពីបញ្ហាជីវករ និងផ្សាររដ្ឋខ្លះមិនសូវមានសណ្ដាប់ធ្នាប់ផងបានដំណើរការឡើងវិញ។
បន្ទាប់ពីតវ៉ាស្នើសុំបានមួយថ្ងៃរដ្ឋបាលរាជធានីភ្នំពេញក៏បានសម្រេចបើកដំណើរផ្សារឯកជនឡើងវិញ តាមសេចក្តីសម្រេចរបស់រដ្ឋបាលរាជធានីភ្នំពេញ លេខ១៧៣/២១សសរ ចុះថ្ងៃទី២៤ ខែមិថុនា ឆ្នាំ២០២១។ ប្រការ១.ត្រូវបានអនុញ្ញាតឲ្យបើកដំណើរការផ្សារឯកជនដែលមានសណ្តាប់ធ្នាប់របៀបរៀបរយ និងអនាម័យ បរិស្ថាន ក្នុងមូលដ្ឋាន រាជធានីភ្នំពេញចាប់ពីថ្ងៃ ទី២៥ ខែមិថុនា ឆ្នាំ ២០២១ តទៅ លើកលែងតែផ្សារមិនរៀបរយ មិនត្រូវបានអនុញ្ញាតឲ្យបើកដំណើរការឡើយ ដើម្បីបង្ការ និងទប់ស្កាត់ការឆ្លងរាលដាលធ្ងន់ធ្ងរនៃជំងឺកូវីដ-១៩ ក្នុងសហគមន៍។ ទោះបីជាយ៉ាងណា ផ្សារសាំហាន់ត្រូវបានអាជីវករអះអាងថា មានតូចរបៀបរៀបរយ និងមានផ្លូវធំទូលាយ និងមានសណ្តាប់ធ្នាប់ល្អផងដែរ៕ ដោយ ៖ ម៉េង ធា
ចែករំលែកព័តមាននេះ