រាជធានីភ្នំពេញ៖ យុវជនម្នាក់ត្រូវបានក្រុមចោរប្លន់ប្រដាប់អាវុធបាញ់មួយគ្រាប់រងរបួសធ្ងន់ប្លន់យកម៉ូតូមួយគ្រឿងបានសម្រេច ដោយមិនញញើតខ្លាចសមត្ថកិច្ចសូម្បីតែបន្តិច កាលវេលាម៉ោងជាង៣ និង២០ទៀបភ្លឺ ថ្ងៃទី៣០ វិច្ឆិកា ២០១៥ នៅចំណុចក្បែរវត្តឃ្មូញ ស្ថិតតាមបណ្តោយផ្លូវ ហាណូយ ក្នុងសង្កាត់ឃ្មូញ ខណ្ឌសែនសុខ ។
បើតាមសំដីយុវជនរងគ្រោះ និងជាម្ចាស់ម៉ូតូ មានឈ្មោះ រី មករា ភេទប្រុស អាយុជាង២៨ឆ្នាំ មុខរបរជាងដែក ស្នាក់នៅភូមិស្តុកក្រោម ឃុំវាលពង់ ខេត្តកំពងស្ពឺ បាននិយាយប្រាប់ថា មុនពេលកើតហេតុ រូបគេ ទើបតែចេញពីក្លិបមួយនៅម្តុំផ្លូវលេខ១៩៨៦ ហើយបានជិះម៉ូតូមួយគ្រឿងម៉ាកហុងដាឌ្រឹម សេ១២៥ ពណ៌ខ្មៅ មិនចាំស្លាកលេខ ដោយជិះដឹកនារីម្នាក់ត្រូវជាសង្សារផង ខណៈមកដល់ចំណុចកើតហេតុខាងលើ ស្រាប់តែលេចមុខជនសង្ស័យ៥នាក់ ជិះម៉ូតូធំមួយគ្រឿងម៉ាក FZ មិនចាំពណ៌ និងស្លាកលេខ និងមួយគ្រឿងទៀត បានសំឡុតយកម៉ូតូ តែជនរងគ្រោះមិនឱ្យធ្វើឱ្យជនសង្ស័យទាំង៥នាក់មានការខឹងសម្បារ បានដកកាំភ្លើងខ្លីពីចង្កេះបាញ់ប្រហារមកលើជនរងគ្រោះចំនួន៣គ្រាប់ តែក្នុងចំណោមទាំង៣គ្រាប់ ត្រូវជនរងគ្រោះតែមួយគ្រាប់ប៉ុណ្ណោះគឺចំចង្កេះផ្នែកខាងក្រោយហើយធ្លុះបៀមគ្រាប់ជាប់ ។
ជនរងគ្រោះបានបន្តទៀតថា បន្ទាប់ពីក្រុមចោរចេញទៅបាត់ ខ្លួនបានខំប្រឹងស្រែកហៅឱ្យគេឯងជួយ។ បន្ទាប់មកបុរសរងគ្រោះបានទូរសព្ទ័ទៅវិទ្យុABC ដើម្បីសុំឱ្យសមត្ថកិច្ចចុះមកអន្តរាគមន៍នៅកន្លែងកើតហេតុ ។
លុះបានជាងកន្លះម៉ោងទើបមានសមត្ថកិច្ចចុះមកអន្តរាគមន៍បានត្រឹមតែសួរនាំ និងហៅរថយន្តសាមុយដឹកជនរងគ្រោះទៅព្យាបាលតែប៉ុណ្ណោះ ។
សកម្មភាពបាញ់ប្លន់កើតឡើងសាជាថ្មី ក្នុងភូមិសាស្ត្រខណ្ឌសែនសុខ ដែលជាតំបន់ស្មុគស្មាញ ហើយសកម្មភាពថ្មីនេះ ក៏ជាការពញ្ញាក់ស្មារតីដល់អាជ្ញាធរ សមត្ថកិច្ចខណ្ឌទាំងមូល ឈានទៅទប់ស្កាត់កុំឲ្យកើតមានតទៅទៀតនៅក្នុងទឹកដីរបស់ខ្លួន ៕
ចែករំលែកព័តមាននេះ