រាជធានីភ្នំពេញ ៖ នារីវ័យក្មេងអ្នកបាយម្ហូបស្រាប់២នាក់បានរងរបួសធ្ងន់ និងស្រាល ត្រូវបានដឹកទៅសង្គ្រោះនៅមន្ទីរពេទ្យលោកសង្ឃភ្លាមៗ ដោយសាររថយន្ត១គ្រឿងបត់ស្តាំជ្រុលចង្កូតទៅបុកកន្លែងលក់បាយ…
រាជធានីភ្នំពេញ ៖ នារីវ័យក្មេងអ្នកបាយម្ហូបស្រាប់២នាក់បានរងរបួសធ្ងន់ និងស្រាល ត្រូវបានដឹកទៅសង្គ្រោះនៅមន្ទីរពេទ្យលោកសង្ឃភ្លាមៗ ដោយសាររថយន្ត១គ្រឿងបត់ស្តាំជ្រុលចង្កូតទៅបុកកន្លែងលក់បាយ ដែលហេតុការណ៍នោះកើតឡើងកាលពីវេលាម៉ោង៩ និង០០នាទីយប់ ថ្ងៃទី២៩ វិច្ឆិកា ២០១៥ នៅក្រោមស្លាកផ្សារសំណង់១២ ចំណុចផ្លូវលេខ១៨២ កែងផ្លូវលេខ២៦៥ ស្ថិតក្នុងសង្កាត់ទឹកល្អក់៣ ខណ្ឌទួលគោក ។
ប្រភពនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្ត១គ្រឿងម៉ាក Rav4 ពណ៌ទឹកប្រាក់ ពាក់ស្លាកលេខ ភ្នំពេញ 2AE-0471 បើកបរដោយបុរសម្នាក់តាមបណ្ដោយផ្លូវលេខ១៨២ ខណៈដល់ចំណុចកែងផ្លូវលេខ២៦៥ ក្រោមស្លាកផ្សារសំណង់១២ ក៏បត់ស្ដាំជ្រុលទៅបុកកន្លែងលក់បាយម្ហូបស្រាប់មួយកន្លែងបណ្ដាលឲ្យនារីវ័យក្មេងអ្នកលក់បាយ២នាក់រងរបួសធ្ងន់ និងស្រាល ហើយជ្រុលទៅប៉ះម៉ូតូកង់៣មួយគ្រឿងទៀត និងជ្រុលទៅជាប់ចិញ្ចើមថ្នល់ ។
ប្រភពបន្តទៀតថា ពេលបុកភ្លាមៗម្ចាស់រថយន្តមានការភ័យតក់ស្លុតយ៉ាងខ្លាំង ហើយក៏បានស្ទុះចុះមកជួយហៅម៉ូតូកង់បីដឹកនារីរងគ្រោះទៅមន្ទីរពេទ្យភ្លាមៗ និងរង់ចាំដោះស្រាយតាមផ្លូវច្បាប់ផងដែរ ។
អ្នកដែលបានឃើញហេតុការណ៍នេះបានឲ្យដឹងដែរថា នេះសំណាងហើយដែលពេលនេះយប់បន្តិចទៅហើយ ហើយកន្លែងលក់បាយនេះក៏កំពុងរៀបចំអីវ៉ាន់ទុកដាក់ដែរ បើសិនជាកើតហេតុពេលព្រលប់វិញ មិនដឹងជាយ៉ាងណានោះទេ ព្រោះមនុស្សម្នាអង្គុយញ៉ាំបាយនៅទីនេះច្រើនណាស់ ។
ក្រោយពេលកើតហេតុ សមត្ថកិច្ចបានចុះមកធ្វើការវាស់វែង និងយករថយន្តទៅរក្សាទុកនៅអធិការដ្ឋាននគរបាលខណ្ឌទួលគោកដើម្បីដោះស្រាយគ្នានៅពេលក្រោយ ៕
ចែករំលែកព័តមាននេះ