រាជធានីភ្នំពេញ ៖ អាវុធហត្ថខណ្ឌដូនពេញបានធ្វើការឃាត់ខ្លួនជនសង្ស័យ២នាក់ពាក់ព័ន្ធករណីឆក់ទូរស័ព្ទដៃជនបរទេសកាលពីវេលាម៉ោង២ និង២០នាទីរសៀល ថ្ងៃទី២៩ វិច្ឆិកា ២០១៥ នៅចំណុចផ្លូវលេខ៥១ កែងផ្លូវលេខ១០៨ សង្កាត់វត្តភ្នំ ខណ្ឌដូនពេញ ។
ប្រភពពីមន្ត្រីអាវុធហត្ថខណ្ឌដូនពេញបានឲ្យដឹងថា ជនសង្ស័យ២នាក់ដែលត្រូវឃាត់ខ្លួនមាន ១-ឈ្មោះ ឈុន ឌី ភេទប្រុស អាយុ២៥ឆ្នាំ មុខរបរជាងសំណង់ ស្នាក់នៅផ្ទះជួលម្តុំរោងចក្រសាំហាន់ សង្កាត់ទួលសង្កែ ខណ្ឌឫស្សីកែវ ជាអ្នកឆក់ និង ២-ឈ្មោះ ង៉ូវ ធានីន ភេទប្រុស អាយុ២៩ឆ្នាំ ស្នាក់នៅផ្ទះជួលម្តុំរោងចក្រសាំហាន់ សង្កាត់ទួលសង្កែ ខណ្ឌឫស្សីកែវ ជាអ្នកបើកម៉ូតូ ។ ចំណែកជនរងគ្រោះឈ្មោះ MARKKU SARANPAA ភេទប្រុស អាយុ៤៥ឆ្នាំ ជនជាតិហ្វាំងឡង់ ស្នាក់នៅសណ្ឋាគារ ELEVEN ផ្លូវលេខ១៨៤ សង្កាត់ជ័យជំនះ ខណ្ឌដូនពេញ ។ ខណៈពេលចាប់ខ្លួន សមត្ថកិច្ចដកហូតបានម៉ូតូ១គ្រឿងម៉ាកវីវ៉ា ពណ៌ក្រហម ពាក់ស្លាកលេខ ភ្នំពេញ 1F-0386 និងទូរស័ព្ទដៃ១គ្រឿង ម៉ាកសាំស៊ុង ពណ៌ខ្មៅ ។
ប្រភពបានឲ្យដឹងទៀតថា មុនពេលកើតហេតុ ជនរងគ្រោះបានឈប់ម៉ូតូចុចទូរស័ព្ទនៅចំណុចផ្លូវលេខ៥៣ កែងផ្លូវលេខ១១៨ ស្ថិតក្នុងសង្កាត់ផ្សារថ្មី១ ស្រាប់តែជនសង្ស័យ២នាក់ខាងលើជិះម៉ូតូ១គ្រឿងម៉ាកវីវ៉ា ពណ៌ក្រហម ក្នុងទិសដៅពីត្បូងទៅជើង ហើយជនសង្ស័យដែលអង្គុយខាងក្រោយបានឆក់យកទូរស័ព្ទដៃរបស់ជនរងគ្រោះ១គ្រឿងម៉ាក សាំសុង J7 ពណ៌ស ។ ភ្លាមៗនោះជនរងគ្រោះក៏បានជិះដេញតាមពីក្រោយបណ្តាលឲ្យដួលខ្លួនឯង និងបានស្រែកឆោឡោឡើង ហើយក្រុមសមត្ថកិច្ចល្បាតស៊ីវិលក៏បានជួយដេញបន្ត រហូតដល់ចំណុចផ្លូវលេខ១០៨ កែងផ្លូវលេខ៥១ សង្កាត់វត្តភ្នំ ម៉ូតូរបស់ជនសង្ស័យក៏បានបុកជាមួយម៉ូតូរបស់ប្រជាពលរដ្ឋដែលធ្វើដំណើរតាមផ្លូវបណ្តាលឲ្យដួល ក៏ត្រូវសមត្ថកិច្ចឃាត់ខ្លួនបានជនសង្ស័យម្នាក់ជាអ្នកបើកម៉ូតូ រីឯជនសង្ស័យម្នាក់ដែលអង្គុយក្រោយបានរត់ថ្មើរជើងរហូតដល់ចំណុចវត្តភ្នំ ក៏ត្រូវបានកម្លាំងសមត្ថកិច្ចឃាត់ខ្លួនបានតែម្តង ។
ក្រោយពេលឃាត់ខ្លួន ជនសង្ស័យទាំង២នាក់បានឆ្លើយសារភាពថា ពួកគេពិតជាបានឆក់ទូរស័ព្ទរបស់ជនបរទេសខាងលើពិតប្រាកដមែន រីឯទូរស័ព្ទរបស់ជនរងគ្រោះគឺបានជ្រុះបាត់នៅពេលដែលពួកគេបុកគ្នាជាមួយអ្នកដំណើរ ៕
ចែករំលែកព័តមាននេះ