ខេត្តសៀមរាប ៖ នារសៀលថ្ងៃទី២៨ និងព្រឹកថ្ងៃទី២៩ ខែវិច្ឆិកា ឆ្នាំ២០១៥ នេះ ក្រោយពីអាជ្ញាធរជាតិអប្សរា បានសាងសង់ផ្លូវក្រាលក្រួសក្រហម១ខ្សែចម្ងាយ១.៦០០ម៉ែត្រ
ខេត្តសៀមរាប ៖ នារសៀលថ្ងៃទី២៨ និងព្រឹកថ្ងៃទី២៩ ខែវិច្ឆិកា ឆ្នាំ២០១៥ នេះ ក្រោយពីអាជ្ញាធរជាតិអប្សរា បានសាងសង់ផ្លូវក្រាលក្រួសក្រហម១ខ្សែចម្ងាយ១.៦០០ម៉ែត្រ ចូលទៅកាន់ភូមិលាងដៃ ស្ថិតនៅឃុំលាងដៃ ស្រុកអង្គរធំ បំពាក់ដោយសំណង់សិល្បការ រួមមានទំនប់ទ្វារទឹកមួយកន្លែង និងលូកាត់ទទឹងផ្លូវជាច្រើនកន្លែងទៀត ជាប្រយោជន៍សម្រាប់ប្រជាពលរដ្ឋ និងភ្ញៀវទេសចរធ្វើដំណើរឆ្លងកាត់ និងបានប្រើប្រាស់ជាប្រយោជន៍ទប់ស្កាត់ទឹកជំនន់ក្នុងតំបន់អង្គរ ឬក៏ជាប្រយោជន៍សម្រាប់ការធ្វើកសិកម្មនោះ ប្រជាពលរដ្ឋភូមិលាងដៃបានមូលមតិគ្នា ប្រារព្វធ្វើពិធីឆ្លងសមិទ្ធផលនោះ ដោយស្ថិតក្នុងជំនឿជឿថានឹងទទួលបានសេចក្តីសុខ សមិទ្ធផលនោះនឹងផ្តល់ផលប្រយោជន៍ ដូចដែលការរំពឹងទុក នាពេលបច្ចុប្បន្ននិងទៅអនាគត ។
ប្រជាពលរដ្ឋភូមិលាងដៃ គឺជាមូលដ្ឋានប្រជាសហគមន៍ ស្ថិតនៅក្នុងតំបន់អភិរក្ស និងអភិវឌ្ឃន៍រមណីយដ្ឋានអង្គរ ដែលការរស់នៅរបស់ប្រជាពលរដ្ឋនៅក្នុងតំបន់នេះ ត្រូវបានដឹកនាំគ្រប់គ្រងដោយអាជ្ញាធររដ្ឋបាលមូលដ្ឋាន ជាមួយនឹងកិច្ចសហការរបស់អាជ្ញាធរជាតិអប្សរា ដែលពាក់ព័ន្ធទៅនឹងកិច្ចគាំពារ និងអភិវឌ្ឍន៍តំបន់អង្គរនេះ ប្រកបដោយនិរន្តភាព ផ្សារភ្ជាប់ទៅនឹងវិស័យទេសចរណ៍ជាតិផងដែរ ។
លោក ស៊ឺង គង់ ទីប្រឹក្សាអាជ្ញាធរជាតិអប្សរា នៅក្នុងពេលដែលនាំយកបច្ច័យ៤០ម៉ឺនរៀល របស់អាជ្ញាធរជាតិអប្សរា ចូលរួមក្នុងពិធីបុណ្យឆ្លងនោះ មានប្រសាសន៍ថា តាមរយៈនៃការប្រារព្ធពិធីបុណ្យឆ្លងផ្លូវថ្នល់ និងទំនប់ទ្វារទឹកនេះ គឺជាសក្ខីភាពនៃអំណរសាទររបស់ពលរដ្ឋដែលរស់នៅក្នុងតំបន់អង្គរនោះ ។ លោកបានលើកឡើងថា មរតកមនុស្សរស់ បានបន្តវេនគ្នា រក្សាជំនឿទំនៀមទម្លាប់ប្រពៃណីរបស់ដូនតា តាំងពីបរមបុរាណរហូតដល់បច្ចុប្បន្ននេះ ។ មរតកជំនឿអរូបី គឺមានប្រយោជន៍ខ្លាំងណាស់ សម្រាប់ការរក្សាទុកអត្តសញ្ញាណនៃវប្បធម៌ខ្មែរ ។ ខ្មែរមិនអាចបាត់បង់មរតកទាំងនេះបានទេ បើទោះជាមនុស្សនៅលើសាកលលោកបានរកឃើញបច្ចេកវិទ្យាទំនើបៗ យ៉ាងណាក៏ដោយ ៕
ចែករំលែកព័តមាននេះ