ខេត្តត្បូងឃ្មុំ ៖ ពិធីមង្គលការកូនកំលោះកូនក្រមុំមួយដែលបានប្រព្រឹត្តទៅយ៉ាងសប្បាយរីករាយ ព្រមទាំងមានញាតិមិត្តជិតឆ្ងាយមកចូលរួមជូនពរជ័យយ៉ាងច្រើនកុះករ ខណៈនោះគ្រោះអកុសលក៏មកដល់ដែរ ដោយឪពុកមារបស់កូនក្រមុំ ត្រូវខ្សែភ្លើងឆក់ស្លាប់ ចំណែកប្រពន្ធស្ទុះទៅជួយក៏ត្រូវខ្សែភ្លើងឆក់រងរបួសធ្ងន់ធ្ងរដែរ បង្កឲ្យមានការភ្ញាក់ផ្អើលពេញរោងការ និងសមត្ថកិច្ចចុះទៅពិនិត្យភ្លាមៗកាលពីវេលាម៉ោង៩និង៣០នាទីយប់ថ្ងៃទី២៨ វិច្ឆិកា ២០១៥ ក្នុងភូមិសោយ ឃុំមៀន ស្រុកអូររាំងឪ ។
លោកវរសេនីយ៏ទោ លឿង រដ្ឋា អធិការនគរបាលស្រុកអូររាំងឪ បានឲ្យដឹងថា នៅផ្ទះរបស់ឈ្មោះ គិន ធី ភេទប្រុស អាយុ៤៥ឆ្នាំ នៅភូមិឃុំកើតហេតុខាងលើមានរៀបចំពិធីមង្គលការកូន នៅពេលល្ងាចមានទទួលភ្ញៀវញាតិមិត្តជិតឆ្ងាយចូលរួមពិសាភោជនាហារយ៉ាងច្រើនកុះករ ព្រមទាំងមានការរាំធុងបាស់លេងកម្សាន្តសប្បាយផងដែរ រហូតដល់ម៉ោងកើតហេតុ ស្រាប់តែបុរសចំណាស់ ឈ្មោះ ប្រាក់ សុខឃឿន អាយុ៦០ឆ្នាំ ត្រូវជាឪពុកមារបស់កូនក្រមុំ ដើរចុះពីលើផ្ទះតាមជណើ្តរខាងមុខ ដោយយកដៃកាន់បង្គោលរោងដែកទីបក៏បណ្តាលឲ្យឆក់ជាប់នឹងបង្គោលនោះតែម្តង ។ ឃើញបែបនេះ អ្នកនៅក្បែរក៏ស្ទុះទៅជួយទាញឆក់ទាំងអ្នកជួយ បន្ទាប់ប្រពន្ធឈ្មោះ លីវ វុទ្ធី អាយុ៥៨ឆ្នាំ ស្ទុះមកជួយក៏ត្រូវចរន្តអគ្គិសនីឆក់រងរបួសធ្ងន់ ក៏ប្រញាប់ដឹកទៅសង្ក្រោះនៅមន្ទីរពេទ្យបង្អែកស្រុកអូររាំងឪទាន់ពេលវេលា ចំណែកឪពុកមាក៏បានស្លាប់គួរឱ្យសង្វេគក្រៃលែង ។
លោកអធិការនគរបាលស្រុកអូររាំងឪ បានបញ្ជាក់ថា រហូតមកដល់ព្រឹកថ្ងៃទី២៩ វិច្ឆិកា នេះ ម្ចាស់ដើមការបានរៀបចំធ្វើបុណ្យសពឪពុកមាក្រោមសម្រែកយំសោកស្តាយពីក្រុមគ្រួសារគ្រប់ៗគ្នា ៕
ចែករំលែកព័តមាននេះ