ខេត្តកណ្ដាល ៖ ផ្ទះឈើប្រក់ស័ង្កសីមួយខ្នង ត្រូវអគ្គិភ័យឆេះហ្មត់ដោយសារទុស្សេខ្សែភ្លើង ពេលម្ចាស់មិននៅកាលពីម៉ោង១០និង៥០នាទីព្រឹកថ្ងៃទី២៨ វិច្ឆិកា ស្ថិតនៅភូមិចំបក់ត្រប់ ឃុំព្រែករកា ស្រុកកណ្ដាលស្ទឹង ។
មន្ត្រីនគរបាលស្រុកកណ្ដាលស្ទឹងបានឲ្យដឹងថា បុរសជាម្ចាស់ផ្ទះឈ្មោះ សុខ សិរី អាយុ៤៧ឆ្នាំ និងប្រពន្ធឈ្មោះ ឆេង ស្រីលាង អាយុ៣៧ឆ្នាំ ជាកសិករនៅភូមិឃុំកើតហេតុខាងលើ ។ នៅពេលកើតខាងលើ ម្ចាស់ផ្ទះបានចាក់សោផ្ទះទៅអង្គុយលេងនៅផ្ទះឪុពុកដែលនៅក្បែរគ្នា ស្រាប់តែឃើញភ្លើងឆេះផ្ទះហុយផ្សែងទ្រលោម ក៏ស្រែកឆោឡោហៅអ្នកជិតខាងឲ្យជួយពន្លត់ ។ ប៉ុន្តែដោយសារតែពេលភ្លើងឆេះមានខ្យល់បក់ខ្លាំងធ្វើឱ្យផ្ទះឆេះយ៉ាងសន្ធោសន្ធៅកាន់តែលឿនមិនអាចជួយពន្លត់បានទាន់នោះទេ ។ ផ្ទះដែលឆេះនោះធ្វើអំពីឈើប្រក់ស័ង្កសីទំហ៧ម៉ែត្រគុណ៦ម៉ែត្រ ។ ចំណែកទ្រព្យសម្បត្តិដែលរងការខូចខាត មាន ប្រាក់អាមេរិក១១.០០០ដុល្លារ និងប្រាក់ខ្មែរ១០លានរៀល ព្រមទាំងសម្ភារនៅក្នុងផ្ទះទាំងប៉ុន្មានត្រូវអគ្គិភ័យបំផ្លាញអស់គ្មានសល់ ។
មន្ត្រីនគរបាលបានបន្តថា មូលហេតុដែលនាំឲ្យកើតមានអគ្គិភ័យកើតឡើងខាងលើនេះ គេសង្ស័យថាប្រហែលមកការទុស្សេខ្សែភ្លើងនៅក្នុងផ្ទះ ៕
ចែករំលែកព័តមាននេះ