រាជធានីភ្នំពេញ ៖ តាំងពីព្រឹកព្រលឹមថ្ងៃទី២៩ វិច្ឆិកា ២០១៥ លោកគួច ចំរើន អភិបាលនៃគណៈអភិបាលខណ្ឌដូនពេញដឹកនាំមន្ត្រីក្រោមឱវាទ និងមានការចូលពីកម្លាំងកងរាជអាវុធហត្ថ កម្លាំងប្រជាការពារ ប្រជាពលរដ្ឋប្រមាណជា៣០០នាក់នាំគ្នារើសសំរាម កាត់ព្រៃត្រែង និងលាងច្រាំងទន្លេចាប់ពីមុខផ្សាររាត្រីរហូតដល់របងសាលសន្និសីទចតុមុខ បន្ទាប់ពីពិធីបុណ្យអុំទូកត្រូវបានបញ្ចប់ ។
លោកគួច ចំរើន អភិបាលខណ្ឌដូនពេញបានមានប្រសាសន៍ថា ការធ្វើអនាម័យ បរិស្ថាននេះ គឺដើម្បីថែរក្សាបរិស្ថាន និងបង្កើតហេដ្ឋារចនាសម្ព័ននៅតាមដងផ្លូវសាធារណៈឲ្យបានល្អហើយ ដើម្បីធ្វើការប្រឡង ប្រណាំងទីក្រុងស្អាត រមណីយដ្ឋានស្អាត សេវាល្អនៅតាមបណ្តាខេត្ត ស្រុក ជាពិសេសធ្វើយ៉ាងណា ទាក់ទាញទេសចរ ជាតិ និងអន្តរជាតិឱ្យមានការចាប់អារម្មណ៍។
កន្លងមក អាជ្ញាធរខណ្ឌដូនពេញ និងសង្កាត់ទាំង១១បានធ្វើការផ្សព្វផ្សាយដល់ប្រជាពលរដ្ឋដែលដើរកំសាន្តតាមរមណីយដ្ឋាន និងមុខព្រះបរមរាជវាំងត្រូវតែចូលរួមរក្សាបរិស្ថាន និងអនាម័យពេលហូបចំណីអាហាររួចត្រូវយកកាកសំណល់បោះចោលក្នុងធុងសំរាមតាមការកំណត់របស់អាជ្ញាធរ។
ក៏ប៉ុន្តែនៅតែមានប្រជាពលរដ្ឋមួយចំនួនបានបោះចោលសំរាមក្រៅធុង មិនតែប៉ុណ្ណោះបានបន្ទោរបង់តាមទីសាធារណៈទៀតដែលធ្វើឲ្យជះក្លិនមិនល្អមកលើភ្ញៀវជាតិ និងអន្តរជាតិដែលដើរកំសាន្ត៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ