រាជធានីភ្នំពេញ ៖ មន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានធ្វើការសំណូមពរ៤ចំណុចទៅដល់ភាគីជប៉ុន ដើម្បីជម្រុញឲ្យសិក្ខាកាមទទួលការបណ្តុះបណ្តាល និងធ្វើការនៅប្រទេសជប៉ុនមានចំនួនកើនឡើងបន្ថែមទៀត ។
ក្នុងពិធីបើកសិក្ខាសាលាផ្សព្វផ្សាយសម្រាប់ទីភ្នាក់ងារបញ្ជូនសិក្ខាកាមទៅប្រទេសជប៉ុនកាលពីរសៀលថ្ងៃទី២៧ វិច្ឆិកា ២០១៥កន្លងទៅនេះនៅទីស្តីការក្រសួង លោក សេង សក្តា អគ្គនាយក នៃអគ្គនាយកដ្ឋានការងារ នៃក្រសួងការងារ បានលើកឡើងថា ក្នុងរយៈពេល៨ឆ្នាំកន្លងមកនេះក្រសួងបានបញ្ជូនសិក្ខាកាមទៅបណ្តុះបណ្តាល និងធ្វើការនៅប្រទេសជប៉ុននៅតែមានកម្រិតតិចតួចនៅឡើយបើធៀបទៅនឹងប្រទេសចំនួន៥មានប្រទេសចិន វៀតណាម ឥណ្ឌូនេស៊ី មីយ៉ាន់ម៉ា និងថៃ ។
លោក សេង សក្តា បានលើចំណុចទាំង៤ដល់ភាគីជប៉ុនមានដូចជា ទី១-ជួយសម្រួលការបន្ថយលក្ខខណ្ឌ ឬនិតិវិធីក្នុងការបញ្ជូនកម្មសិក្ខាការីទៅធ្វើកម្មសិក្សា និងធ្វើការនៅជប៉ុន ជាពិសេសសិស្សដែលចេញពីសាលាបណ្តុះបណ្តាលវិជ្ជាជីវៈរបស់ក្រសួង ។ ទី២-ជួយជម្រុញការបញ្ជូនកម្មសិក្ខាការីទៅធ្វើកម្មសិក្សា និងធ្វើការនៅប្រទេសជប៉ុនឲ្យបានច្រើន ពិសេសសិក្ខាកាម ដែលបានទទួលការបណ្តុះបណ្តាលជំនាញរួចហើយ ។ ទី៣-សំណើសុំជួបជាមួយថ្នាក់ដឹកនាំក្រសួងការងារ នៃប្រទេសជប៉ុនសម្រាប់ប្រតិភូថ្នាក់ដឹកនាំក្រសួងការងារកម្ពុជានៅប្រទេសជប៉ុន និងទី៤-គឺសំណើសុំរៀបចំឲ្យមានជំនួបរវាងទីភ្នាក់ងារបញ្ជូនកម្ពុជា និងទីភ្នាក់ងារទទួលជប៉ុន ដើម្បីពិភាក្សា ចែករំលែក និងផ្លាស់ប្តូរបទពិសោធន៍ ក៏ដូចជាព័ត៌មានទៅវិញទៅមក ។
លោកបានបញ្ជាក់ថា រហូតមកដល់ពេលនេះទីភ្នាក់ងារជ្រើសរើសឯកជនមានចំនួន៦៥ ត្រូវបានទទួលស្គាល់ដោយក្រសួងការងារ និងបណ្តុះបណ្តាលវិជ្ជាជីវៈ ធ្វើការងារនៅប្រទេសជប៉ុន ប៉ុន្តែទោះជាយ៉ាងណាក៏ដោយការបញ្ជូនសិក្ខាកាមទៅបណ្តុះបណ្តាល និងធ្វើការនៅប្រទេសជប៉ុននៅតែមានកម្រិតតិចនៅឡើយ ពោលគឺគិតចាប់ពីឆ្នាំ២០០៧ រហូតមកដល់ត្រឹមខែតុលា ឆ្នាំ២០១៥នេះ មានចំនួនសរុប១៨៧៣នាក់តែប៉ុណ្ណោះ ក្នុងនោះស្រីមានចំនួន១១៣៦នាក់ ។
ជាមួយគ្នានោះដែរតំណាងអង្គការ JOTCO លោក YUZO HAYASHI បានលើកឡើងថា ភាគីបញ្ជូន ឬសិក្ខាកាមដែលត្រូវទៅសិក្សា និងទៅធ្វើការនៅប្រទេសជប៉ុន ត្រូវតែដឹងឱ្យបានច្បាស់ពីប្រព័ន្ធច្បាប់នៅក្នុងប្រទេសនោះ បើទោះជាយើងជាពលករក្តី ជាសិក្ខាកាមក្តី ត្រូវតែដឹងពីស្ថានភាពជុំវិញច្បាប់ និងលក្ខខណ្ឌការងារ ត្រូវមានការប្រុងប្រយ័ត្នជាប់ជានិច្ច កុំឱ្យមានបទល្មើសណាមួយកើតឡើងផ្ទុយពីច្បាប់ប្រទេសជប៉ុនបានកំណត់ ទោះបទល្មើសនោះធ្ងន់ក្តី ស្រាលក្តី ត្រូវតែចៀសឱ្យបាន ពិសេសគឺការចាប់ខ្លួនតែម្តង ។
លោកបន្តថា នាយកដ្ឋានអន្តោប្រវសន៍ជប៉ុន គេធ្វើការម៉ឹងម៉ាត់ណាស់ បើគេរកឃើញថា មានការកែប្រែ មានការសូកប៉ាន់ មានករណីរំលោភសិទ្ធិមនុស្ស ឬមួយករណីល្មើសច្បាប់ផ្សេងៗទៀត ដែលខុសពីលក្ខណៈការងារនោះ នឹងប្រឈមមុខចំពោះផ្លូវច្បាប់ ហើយនិងត្រូវផ្អាកការងាររបស់ក្រុមហ៊ុននោះរហូតដល់ទៅ៥ឆ្នាំ ។
ជាមួយគ្នានោះដែរលោកបានឲ្យដឹងថា ថ្មីៗនេះរដ្ឋសភាប្រទេសជប៉ុនបានធ្វើវិសោធនកម្មលើខ្លឹមសារច្បាប់មួយចំនួន ប៉ុន្តែមកដល់ពេលនេះរដ្ឋសភាមិនទាន់បានអនុម័តនៅឡើយទេ ដូច្នេះមានតែយើងទាំងអស់គ្នា(ភាគីបញ្ជូន ភាគីទទួល) ប្រុងប្រយ័ត្នកុំប្រព្រឹត្តអ្វីខុសពីលក្ខខណ្ឌការងារឱ្យសោះ ។
សូមរំលឹកថា ក្នុងការអនុវត្តអនុក្រឹត្យលេខ១៩០អនក្រ.បក ស្តីពីការគ្រប់គ្រងលើការបញ្ជូនពលករខ្មែរទៅធ្វើការនៅបរទេសតាមរយៈទីភ្នាក់ងារជ្រើសរើសឯកជន ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយអង្គការពលកម្មការងារ និងអង្គការពាក់ព័ន្ធនានា រៀបចំប្រកាសបានចំនួន៨ ក្នុងនោះប្រកាសស្តីពីការដាក់ឲ្យប្រើពាក្យគន្លឹះ, ប្រកាសស្តីពីដំណើរការជ្រើសរើស និងការណែនាំតម្រង់ទិសពលករមុនពេលចាកចេញដំណើរ, ប្រកាសស្តីពីទីភ្នាក់ងារជ្រើសរើសឯកជន, ប្រកាសស្តីពីការដាក់ឲ្យអនុវត្តបទដ្ឋានអប្បបរមា នៃកិច្ចសន្យាសេវារកការងារឲ្យធ្វើ, ប្រកាសស្តីពីអធិការកិច្ចទីភ្នាក់ងារជ្រើសឯកជន, ប្រកាសស្តីពីយន្តការទទួលពាក្យបណ្តឹងពលករទេសន្តរប្រវេសន៍ការងារ, ប្រកាសស្តីពីសេវារបស់ភ្នាក់ងារជ្រើសរើសឯកជននៅកន្លែងធ្វើការ និងការធ្វើមាតុភូមិនិវត្តន៍ និងប្រកាសស្តីពីការលើកសរសើរ និងការដាក់វិន័យទីភ្នាក់ងារជ្រើសរើសឯកជន ៕
ចែករំលែកព័តមាននេះ