លោកយាយមហាឧបាសិកា ទ្បោ លាងហ័ន ជាមាតាបង្កើតលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានទទួលមរណភាពកាលពីវេលាម៉ោង១៦រសៀល ថ្ងៃទី២៦ វិច្ឆិកា ក្នុងជន្មាយុ៨៨ឆ្នាំ ដោយជរាពាធ
រាជធានីភ្នំពេញ ៖ លោកយាយមហាឧបាសិកា ទ្បោ លាងហ័ន ជាមាតាបង្កើតលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានទទួលមរណភាពកាលពីវេលាម៉ោង១៦រសៀល ថ្ងៃទី២៦ វិច្ឆិកា ក្នុងជន្មាយុ៨៨ឆ្នាំ ដោយជរាពាធ ។
សពមហាឧបាសិកា បានតម្កល់ធ្វើបុណ្យទក្ខិណានុប្បទានតាមប្រពៃណីព្រះពុទ្ធសាសនា ដែលតាមកម្មវិធីមានរយៈពេល៣ថ្ងៃ ចាប់ពីថ្ងៃទី២៦ ដល់ថ្ងៃទី២៨ វិច្ឆិកា នៅគេហដ្ឋាននៃសព ស្ថិតនៅផ្ទះលេខ៣ ផ្លូវលេខ៣៣៤ សង្កាត់បឹងកេងកងទី១ ខណ្ឌចំការមន រាជធានីភ្នំពេញ ជាប់ស្ថានទូត ប៊ុលហ្គារី ។
តាមកម្មវិធីដដែល សពត្រូវដង្ហែនិងប្រារព្ធពិធីបូជា នៅព្រឹកថ្ងៃអាទិត្យ ទី២៩ វិច្ឆិកា នៅឈាបនដ្ឋានវត្តលង្ការ ព្រះកុសមារាម ។
គួរកត់សម្គាល់ថា ក្នុងឱកាសប្រារព្ធពិធីតម្កល់ ធ្វើបុណ្យទក្ខិណានុប្បទាន យើងសង្កេតឃើញវត្តមានឯកឧត្តម លោកជំទាវ លោកឧកញ៉ា អស់លោក លោកស្រី អ្នកនាងកញ្ញាអញ្ជើញមកពីគ្រប់មជ្ឈដ្ឋានច្រើនកុះករ ទាំងមន្ត្រីរាជការ ទាំងវិស័យឯកជន មកចូលរួមរំលែកទុក្ខដ៏ក្រៀមក្រំនេះ ។
លោក ខៀវ កាញារីទ្ធ និងលោកជំទាវជាភរិយា និងលោកខៀវ ថវិកា ព្រមទាំងញាតិមិត្តជិតស្និទ្ធ បាននៅប្រចាំការស្វាគមន៍ទទួលភ្ញៀវប្រកបដោយកិត្តិយសជាទីបំផុត ។
ឆ្លើយតបវិញ នោះគឺជាការចូលរួមរំលែកមរណទុក្ខដ៏ក្រៀមក្រំជាមួយឥស្សរជនមួយរូប ដែលជាបុត្រនៃសព និងស្ទើរពេញមួយជីវិតរបស់លោក ជាអ្នកដែលទទួលបាននូវការគោរពស្រទ្បាញ់រាប់អាន ពោរពេញទៅដោយប្រជាប្រិយភាពពីគ្រប់មជ្ឈដ្ឋានក្នុងសង្គម ។
ក្នុងនាមគណគ្រប់គ្រង ព្រមទាំងសហការីសារព័ត៌មាន«កោះសន្តិភាព»ទូទាំងប្រទេស សូមចូលរួមរំលែកនូវមរណទុក្ខដ៏ក្រៀមក្រំនេះ ជាមួយគ្រួសារនៃសព និងសូមបួងសួងដល់បារមីស័ក្តិសិទ្ធិក្នុងលោក សូមឱ្យវិញ្ញាណក្ខន្ធ មហាឧបាសិកា ទ្បោ លាងហ័ន អញ្ជើញទៅកាន់សុគតិភព កុំបីឃ្លៀងឃ្លាតទ្បើយ ៕
ចែករំលែកព័តមាននេះ