រាជធានីភ្នំពេញ ៖ បន្ទាប់ពីជាប់គាំងអស់មួយរយៈពេលមក ថ្នាក់ដឹកនាំតំណាងរាស្ត្រភាគតិច និងថ្នាក់ដឹកនាំតំណាងរាស្ត្រភាគច្រើនក្នុងរដ្ឋសភា គ្រោងនឹងជួបពិភាក្សាគ្នានៅក្នុងខែធ្នូ ឆ្នាំ២០១៥ ខាងមុខ ដើម្បីដោះស្រាយបញ្ហានយោបាយ ។ ទោះជាយ៉ាងណា គម្រោងជួបគ្នារវាងថ្នាក់ដឹកនាំតំណាងរាស្ត្រទាំងពីរគណបក្សក្នុងរដ្ឋសភា គឺគណបក្សប្រជាជនកម្ពុជា និងគណបក្សសង្គ្រោះជាតិ មិនទាន់ត្រូវបានកំណត់ថ្ងៃច្បាស់លាស់នៅឡើយទេ ។ នេះបើតាមមន្ត្រីជាន់ខ្ពស់របស់គណបក្សសង្គ្រោះជាតិ ។
លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ ថ្លែងថា ថ្នាក់ដឹកនាំគណបក្សសង្គ្រោះជាតិ គ្រោងនឹងជួបចរចាជាមួយថ្នាក់ដឹកនាំគណបក្សប្រជាជនកម្ពុជា នៅអំឡុងសប្តាហ៍ក្រោយគឺដើមខែធ្នូ ដើម្បីដោះស្រាយស្ថានភាពនយោបាយនៅក្នុងប្រទេស ប៉ុន្តែទោះជាយ៉ាងនេះក្តី មិនទាន់មានចម្លើយពីថ្នាក់ដឹកនាំតំណាងរាស្ត្រខាងគណបក្សប្រជាជនកម្ពុជា នៅឡើយទេ ។
លោក យ៉ែម បុញ្ញឫទ្ធិ ថ្លែងថា គណបក្សសង្គ្រោះជាតិបានជូនដំណឹងក្រៅផ្លូវការទៅគណបក្សប្រជាជនកម្ពុជារួចហើយ អំពីការសុំជួបចរចាគ្នានេះ ប៉ុន្តែការសរសេរជាលាយល័ក្ខណ៍អក្សរនៅមិនទាន់មាននៅឡើយទេ ហើយរហូតមកដល់ពេលនេះ មិនទាន់មានចម្លើយពីគណបក្សប្រជាជននៅឡើយ ។ លោកបញ្ជាក់ពីមូលហេតុនៃជំនួបនេះ គឺចង់រក្សាស្ថានភាពនយោបាយ និងស្ថិរភាព ក្រោយកិច្ចព្រមព្រៀងថ្ងៃទី២២ ខែកក្កដា ឆ្នាំ២០១៤ ដើម្បីយើងបំពេញការងារបម្រើផលប្រយោជន៍ជាតិ ដោះ
ស្រាយបញ្ហារវាងខ្មែរនឹងខ្មែរឱ្យបានជោគជ័យ ។
ចំណែកលោក សុខ ឥសាន្ត អ្នកនាំពាក្សគណបក្សប្រជាជនកម្ពុជា មិនទាន់បញ្ជាក់ឲ្យដឹងទេ ប៉ុន្តែលោកថ្លែងថា គណបក្សប្រជាជនកម្ពុជា និងថ្នាក់ដឹកនាំតំណាងរាស្ត្រភាគច្រើនក្នុងរដ្ឋសភា ស្វាគមន៍ និងបើកទ្វារចំហជានិច្ចចំពោះវប្បធម៌សន្ទនាជាមួយគណបក្សសង្គ្រោះជាតិ ។
លោក សុខ ឥសាន្ត ថ្លែងថា បើមានសំណើពីគណបក្សសង្គ្រោះជាតិនោះ អាចនឹងមានជំនួបនៅដើមសប្តាហ៍ក្រោយ ឬដើមខែធ្នូ។ ទោះបីជាមានមានចរចាគ្នាយ៉ាងណាក្តី ចំពោះសំណុំរឿងរបស់លោក សម រង្ស៊ី ក្នុងការដាក់ចរចានោះ វាហួសពេលទៅហើយ គឺវាដូចជារថភ្លើងអុីចឹងបានហូសទៅហើយ មិនអាចត្រឡប់ក្រោយបានទេ ។
លោក សុខ ឥសាន្ត បញ្ជាក់ថា «ដើម្បីកុំឲ្យកម្តៅនយោបាយនៅកម្ពុជាកាន់តែក្តៅ ឬមួយលទ្ធិប្រជាធិបតេយ្យធ្លាក់ចុះ ទាមទារឲ្យអ្នកនយោបាយ ពិសេសនោះមេបក្សប្រឆាំងអនុវត្តឲ្យបានត្រឹមត្រូវ តាមស្មារតីនៃកិច្ចព្រមព្រៀងនយោបាយ និងសេចក្តីថ្លែងការណ៍រួមរវាងគណបក្សទាំងពីរនាពេលកន្លងមក» ។
ទោះជាយ៉ាងណាក្តី អ្នកនាំពាក្យគណបក្សប្រជាជនកម្ពុជាមិនទាន់បញ្ជាក់ច្បាស់ថា មានជំនួបពិតប្រាកដនោះទេ ។ ជាងនេះទៀត លោកថ្លែងថា នឹងរង់ចាំពិនិត្យជាមួយគ្នាថា គណបក្សប្រឆាំងនឹងលើកយកបញ្ហាអ្វីសម្រាប់ដាក់លើតុចរចា ។ ផ្ទុយទៅវិញ ប្រសិនបើភាគីគណបក្សសង្គ្រោះជាតិ លើកយកករណីលោក សម រង្ស៊ី ចរចានោះ វាហួសពេលហើយ ព្រោះថាច្បាប់បានកំណត់រួចហើយ។ ជាងនេះទៀត មិនអាចប្រទេសណាមួយចាប់បង្ខំប្រទេសកម្ពុជា ដែលជាប្រទេសឯករាជ្យនិងអធិបតេយ្យភាពឲ្យអនុវត្តល្មើសច្បាប់បានទេ ។
គួរបញ្ជាក់ថា គណបក្សជាប់ឆ្នោតទាំងពីរបានចោទប្រកាន់គ្នាទៅវិញទៅមកថា មិនគោរពកិច្ចព្រមព្រៀងដំណោះស្រាយនយោបាយថ្ងៃទី២២ ខែកក្កដា ឆ្នាំ២០១៤ ដែលធ្វើឲ្យស្ថានភាពនយោបាយចុងក្រោយប្រេះឆាគ្នា ។ ប៉ុន្តែទោះជាមានការចោទប្រកាន់គ្នាទៅវិញទៅមកបែបនេះក្ដី ក៏តំណាងគណបក្សទាំងពីរស្វះស្វែងជួបគ្នាដើម្បីវិលមករកតុចរចា ហើយបន្តប្រើប្រាស់វប្បធម៌សន្ទនា ដូចដែលគណបក្សទាំងពីរបានព្រមព្រៀងគ្នារួចហើយនោះដែរ ។
ជាមួយគ្នានេះ មន្ត្រីនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ថ្លែងថា តំណាងគណបក្សទាំងពីរកំពុងទាក់ទងគ្នាដើម្បីកំណត់កាលបរិច្ឆេទច្បាស់លាស់អំពីការជួបគ្នា ដោយប្រើប្រាស់យន្តការវប្បធម៌សន្ទនារវាងថ្នាក់ដឹកនាំតំណាងរាស្ត្រភាគច្រើន និងថ្នាក់ដឹកនាំតំណាងរាស្ត្រភាគតិចនៅរដ្ឋសភា ។ លោកបញ្ជាក់ថា ការគ្រោងជួបគ្នានេះនឹងជជែកពីការវិវឌ្ឍនយោបាយចុងក្រោយ និងករណីលោក សម រង្ស៊ី ពិសេសគឺចង់ឲ្យគណបក្សប្រជាជនកម្ពុជា គោរពកិច្ចព្រមព្រៀងដំណោះស្រាយនយោបាយកាលពីថ្ងៃទី២២ ខែកក្កដា ឆ្នាំ២០១៤ ។
សួមរំឭកថា តំណាងរាស្ត្រសំឡេងភាគច្រើនដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងតំណាងរាស្ត្រសំឡេងភាគតិចដឹកនាំដោយលោក សម រង្ស៊ី ត្រូវបានរដ្ឋសភាបោះឆ្នោតអនុម័តកាលពីចុងឆ្នាំ២០១៤ ក្នុងគោលបំណងអនុវត្តបន្តនូវកិច្ចព្រមព្រៀងបញ្ចប់ជម្លោះនយោបាយ កាលពីថ្ងៃទី២២ ខែកក្កដា ឆ្នាំ២០១៤ និងដើម្បីឲ្យក្រុមភាគតិចមានឱកាសជួបសន្ទនាដោយផ្ទាល់អំពីកិច្ចការប្រទេសជាតិ ។
ក្រុមភាគតិចនិងក្រុមភាគច្រើននេះ កន្លងមកបានជួបគ្នាជាញឹកញាប់ ពិសេសរវាងសម្ដេចក្រឡាហោម ស ខេង និងលោក សម រង្ស៊ី ដើម្បីដោះស្រាយបញ្ហាមួយចំនួន ។ ប៉ុន្តែសម្រាប់គម្រោងជួបគ្នានេះត្រូវអវត្តមានលោក សម រង្ស៊ី ហើយបើតាមឲ្យដឹងនោះ លោក កឹម សុខា ប្រធានស្ដីទីគណបក្សសង្គ្រោះជាតិ និងជាប្រធានស្ដីទីក្រុមតំណាងរាស្ត្រភាគតិច នឹងជួសម្ដេចក្រឡាហោម ស ខេង ប្រធានក្រុមភាគច្រើន ។
គណបក្សសង្គ្រោះជាតិ ព្យាយាមចង់ជួបសន្ទនាជាមួយគណបក្សប្រជាជនកម្ពុជាជាថ្មី និងស្របតាមការកំណត់រវាងក្រុមភាគច្រើន និងក្រុមភាគតិចនេះ ធ្វើឡើងស្របពេលស្ថានភាពនយោបាយរវាងគណបក្សជាប់ឆ្នោតទាំងពីរកំពុងប្រេះឆាគ្នានូវការប្រើប្រាស់វប្បធម៌សន្ទនា ដោយជំនួសមកវិញនូវការវាយប្រហារពាក្យសម្ដីគ្នាទាំងពីរទៅវិញទៅមក រវាងមេដឹកនាំគណបក្សទាំង២ ។ ជាងនេះទៀត បញ្ហាដែលធ្វើឲ្យសាធារណជនចាប់អារម្មណ៍ខ្លាំងនោះ គឺព្រឹត្តិការណ៍វាយដំតំណាងរាស្ត្រគណបក្សប្រឆាំងពីររូបកាលពីថ្ងៃទី២៦ ខែតុលា ឆ្នាំ២០១៥ ករណីដកលោក កឹម សុខា ចេញពីអនុប្រធានរដ្ឋសភា ការដកអភ័យឯកសិទ្ធិលោក សម រង្ស៊ី និងការចេញដីកាចាប់ខ្លួនលោក សម រង្ស៊ី ជាបន្តបន្ទាប់ ៕
ចែករំលែកព័តមាននេះ