ខេត្តកំពង់ធំ ៖ នៅជុំវិញបឹងរៀល ក្នុងភូមិសាស្ត្រឃុំកំពង់គោ ស្រុកកំពង់ស្វាយ ខេត្តកំពង់ធំ មានប្រជាពលរដ្ឋធ្វើស្រែប្រាំងមួយចំនួននាំគ្នាប្រតិកម្មថា អាជ្ញាធរមិនឲ្យពួកគាត់នាំគ្នាបូមទឹកបឹងរៀលបញ្ចូលស្រែទេ តែបែរជាឃុបឃិតគ្នាបង្ហូរទឹកបឹងចាប់ត្រីទៅវិញ ។
ពាក់ព័ន្ធនឹងការចោទប្រកាន់នេះ លោក ឡាយ ប៉េងឡុង គណៈកម្មការសហគមន៍នេសាទបឹងរៀលប្រាប់ថា រឿងនេះមិនមែនដូចការចោទប្រកាន់នោះទេ ខាងសហគមន៏ខំប្រឹងរកកម្រៃពីការដាក់របាំងនេះយកលុយមកទប់ទឹក ការហូរទឹកនេះគឺហូរនៅពេលដែលពួកយើងរវល់ទៅស្រែរៀងៗខ្លួនប៉ុណ្ណោះ ។
ចំណែកខាងតំណាងប្រជាពលរដ្ឋដែលមាន លោក សៀ ជាវ អាយុ៥៤ឆ្នាំ រស់នៅភូមិកោះគ្របបាយ ឃុំកំពង់គោ ស្រុកកំពង់ស្វាយ ប្រាប់ថា ពួកគាត់ជាង៤០គ្រួសារមានផ្ទៃដីស្មើនឹង៣០៥ហិតា នៅជុំវិញបឹងរៀល កំពុងត្រូវការទឹកបូមបញ្ចូលស្រែរបស់ពួកគាត់ តែត្រូវបានអាជ្ញាធរឃុំ ស្រុក សហគមន៏ និងខាងជលផលហាមឃាត់ បើហ៊ានបូមទឹក ពួកគេនឹងចាប់ ហើយបែរជានាំគ្នាបង្ហូរទឹកដើម្បីឲ្យត្រីចូលក្នុងឡុករបស់ពួកគេ ដែលបានដាក់នៅមាត់ទឹកបឹងនោះចាប់ត្រីលក់រាល់ថ្ងៃទៅវិញ ។ លោក សៀ ជាវ បញ្ជាក់ថា រូបលោកសុខចិត្តឧបត្ថម្ភ១០០០ដុល្លារក្នុងការចូលរួមចំណែកទប់ទឹកបឹងរៀលនេះ ហើយលោក ផ្លូង ធឿន ជួយ៥០០ដុល្លារ ឲ្យតែបានបូមទឹកបឹងបញ្ចូលស្រែរបស់ពួកគាត់ ។
ជុំវិញបញ្ហានេះលោក សេង ប៊ុនសរ មេឃុំកំពង់គោ និងលោក សៅ វណ្ណសិរីវុទ្ធ នាយសង្កាត់ជលផលកំពង់ស្វាយ បានឲ្យដឹងកាលពីរសៀលថ្ងៃទី២៧ ខែវិច្ឆិកា ឆ្នាំ២០១៥ថា ពួកលោកបានសន្យាជាមួយនឹងលោកអភិបាលខេត្តកំពង់ធំថា នៅឆ្នាំ២០១៥-២០១៦នេះរក្សាទឹកបឹងរៀលនៅចំណុចកណ្តាលបឹងឲ្យនៅត្រឹម០,៨០ម៉ែត្រ ស្មើនឹង៨តឹក កុំឲ្យរីងដូចកាលពីឆ្នាំកន្លងទៅ ធ្វើឲ្យស្លាប់បាត់បង់ជីវចម្រុះជាច្រើននៅក្នុងទឹក ។ កន្លងមកមានក្រុមហ៊ុនមកធ្វើការវិនិយោគដោយបូមទឹកដាក់បញ្ចូលទៅក្នុងបឹងរៀល ហើយឲ្យប្រជាពលរដ្ឋបូមពីបឹងរៀលបញ្ចូលស្រែរបស់ពួកគាត់ ដោយតម្រូវឲ្យបង់លុយថ្លៃប្រេងក្នុង១ហិតា៨០ដុល្លារ ហើយប្រជាពលរដ្ឋមួយចំនួននាំគ្នាបង់លុយឲ្យ ដោយឡែកលោក សៀ ជីវ និងបងប្អូនរបស់គាត់ចំនួន៧គ្រួសារបែរជាមិនព្រមបង់លុយឲ្យក្រុមហ៊ុនទេ ដោយយកលេសថាស្រូវស្កក ជំពាក់ថ្លៃទឹកគេសរុបចំនួន២៣លានរៀល ធ្វើឲ្យក្រុមហ៊ុនខាតបង់ ក៏ផ្អាកការផ្គត់ផ្គង់ទឹកនៅឆ្នាំនេះទៅ រង់ចាំខាងលោក សៀ ជីវ សងលុយសិន នឹងបានរាយការណ៍ជូនខេត្តដែរពីបញ្ហានេះ ដោយភ័យខ្លាចអត់ទឹកបូមបញ្ចូលស្រែ បែរជាចោទថាអាជ្ញាធរឃុបឃិតគ្នាបង្ហូរទឹកចាប់ត្រីនោះ មិនពិតទេ ធម្មតាទឹកបឹងទប់ខាងណេះ ហូរខាងណោះចៀសមិនផុតឡើយ លោកនឹងឲ្យគេទៅទប់ជាបន្ទាន់ ហើយឆ្នាំក្រោយនឹងមានជំនួយពីអង្គការហូមសម្រាប់ធ្វើទំនប់បង្ហៀរហើយ ។
លោក យស់ បញ្ញារិទ្ធ អភិបាលរងស្រុកកំពង់ស្វាយ ទទួលបន្ទុកបញ្ហានេះ ប្រាប់ថា ចំពោះបញ្ហាខាងលើ រូបលោកបានជំរាបដល់លោកអភិបាលខេត្តកំពង់ធំរួចហើយ សុំជួយអន្តរាគមន៍រកម៉ាស៊ីនបូមទឹកមកដាក់ ហើយសុំឲ្យប្រជាពលរដ្ឋដែលធ្វើស្រែប្រាំងនៅជុំវិញបឹងរៀលជួយចេញថ្លៃប្រេង ដើម្បីដោះស្រាយ បញ្ហាជូនដល់ពួកគាត់ ៕
ចែករំលែកព័តមាននេះ