រាជធានីភ្នំពេញ ៖ បន្ទាប់ពីបានសម្ពោធការដ្ឋានសាងសង់នៅថ្ងៃទី១៤ កញ្ញា កន្លងទៅនេះ គម្រោងសាងសង់ខុនដូ PS Crystal Condominium បានសម្រុកសាងសង់សម្រេចបាន៨៥%ហើយ ដែលនឹងឆ្លើយតបទៅតាមការគ្រោងទុករបស់ក្រុមហ៊ុន ។
រាជធានីភ្នំពេញ ៖ បន្ទាប់ពីបានសម្ពោធការដ្ឋានសាងសង់នៅថ្ងៃទី១៤ កញ្ញា កន្លងទៅនេះ គម្រោងសាងសង់ខុនដូ PS Crystal Condominium បានសម្រុកសាងសង់សម្រេចបាន៨៥%ហើយ ដែលនឹងឆ្លើយតបទៅតាមការគ្រោងទុករបស់ក្រុមហ៊ុន ។
លោក អុិត ដារ៉ា ម្ចាស់ភាគហ៊ុននៃគម្រោង PS Crystal Condominium មានប្រសាសន៍ថា ៖ «គិតចាប់ពីថ្ងៃបើកសម្ពោធការដ្ឋានសាងសង់កាលពីថ្ងៃទី១៤ កញ្ញា រហូតមកបច្ចុប្បន្ន គម្រោងសាងសង់ខុនដូរបស់យើងសម្រេចបានប្រមាណ៨៥%ហើយ និងអាចឆ្លើយតបតាមការកំណត់របស់ក្រុមហ៊ុនផងដែរ សូម្បីតែក្នុងថ្ងៃបុណ្យអុំទូក ក៏យើងមិនបានឈប់សម្រាកដែរ ។ ខ្ញុំនឹងធ្វើឲ្យរួចរាល់មុនរយៈពេល៣ខែ ហើយក្នុងអំឡុងពេលរួចរាល់នោះ យើងនឹងរង់ចាំកែលម្អជូនអតិថិជន ប្រសិនបើពួកគាត់យល់ថា ផ្នែកនេះ ឬផ្នែកនោះត្រូវបំពេញបន្ថែម» ។
លោកបន្តថា ៖ «ក្នុងគម្រោងសាងសង់ខុនដូទាំងមូល យើងប្រើរយៈពេល៣៧ខែ បើគិតមកបច្ចុប្បន្ន នៅសល់តែ២៧ខែទៀតប៉ុណ្ណោះនឹងត្រូវបញ្ចប់ការសាងសង់ទាំងមូល ។ ចំណែកការលក់ខុនដូនៃគម្រោងទាំងមូលបានកើនពី៦០%ទៅ៨០% គិតតាំងពីមុនពេលបើកការដ្ឋានសាងសង់ រហូតមកដល់បច្ចុប្បន្ន» ។
លោកបញ្ជាក់ថា ៖ «តាមគោលការណ៍របស់ក្រុមហ៊ុនកំណត់ថា នៅដំណាច់ឆ្នាំ២០១៥នេះ យើងត្រូវលក់ឲ្យគ្រប់១០០% នៃខុនដូទាំងមូល បុ៉ន្តែសន្ទុះនៃការលក់នេះ គឺស្ថិតនៅក្រោមការគ្រោងទុកបន្តិច នៅត្រង់ថារយៈពេលនៅសល់ខ្លី បូករួមនឹងកត្តាដែលធ្វើឲ្យមានការប៉ះពាល់ដល់ការលក់មួយចំនួនដូចជា រយៈពេលចុងក្រោយនេះ ស្ថានភាពនយោបាយមានការឡើងកម្តៅ ម្យ៉ាងទៀតមានគម្រោងថ្មីៗជាច្រើនទៀត ដែលធ្វើឲ្យការប្រកួតប្រជែងមានភាពក្តៅគគុកជាងពេលមុនៗ ហើយមិនមែនប៉ះពាល់តែ PS Crystal Condominium ប៉ុណ្ណោះទេ គឺវាប៉ះពាល់ទាំងអស់សម្រាប់វិស័យអចលនទ្រព្យទាំងមូល គ្រាន់តែស្ថិតក្នុងចំនួនតិចតួច ។
គម្រោង PS Crystal Condominium បានចំណាយទុនវិនិយោគប្រមាណ៥លានដុល្លារ ដែលមានអគារកម្ពស់១៥ជាន់ ហើយតម្លៃលក់ក្នុងមួយយូនីតចាប់ពីជាង៤ម៉ឺនដុល្លារ រហូតដល់ជាង៨ម៉ឺនដុល្លារ» ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ឲ្យដឹងថា ក្នុងរយៈពេល៩ខែដើមឆ្នាំ២០១៥ ទុនវិនិយោគក្នុងវិស័យសំណង់ និងអចលនទ្រព្យនៅកម្ពុជា មានតម្លៃទឹកប្រាក់ចំនួន១.៧៥២លានដុល្លារ កើនទ្បើងពី១.៥៤០លានដុល្លារកាលពីឆ្នាំ២០១៤ ។
គិតចាប់ពីឆ្នាំ២០០០ មកដល់៩ខែដើមឆ្នាំនេះ មានគម្រោងវិនិយោគបរទេសដែលទទួលបានលិខិតអនុញ្ញាតឱ្យសាងសង់ចំនួន២៣៩ គម្រោង ដែលមានទុនវិនិយោគសរុបចំនួនជាង៣.២៩២លានដុល្លារអាមេរិក ។ ក្រៅពីនេះ ជាគម្រោងរបស់វិនិយោគិនក្នុងស្រុក និងគម្រោងរបស់វិនិយោគិនក្នុងស្រុកសហការជាមួយជនបរទេស ៕
ចែករំលែកព័តមាននេះ