ខេត្តស្វាយរៀង ៖ នៅវេលាម៉ោង៩ព្រឹក ថ្ងៃទី២៧ វិច្ឆិកា ២០១៥នេះ លោកឧត្តមសេនីយ៍ត្រី កឹង ឃន ស្នងការនគបាលខេត្តបានបញ្ជាឲ្យលោកវរសេនីយ៍ឯក កុយ សុភាព ស្នងការរង ដឹកនាំកម្លាំងសមត្ថកិច្ចចម្រុះសហការជាមួយអាជ្ញាធរក្រុង-សង្កាត់ ចុះទៅពិនិត្យករណីលោកនាយរងការិយាល័យនគបាលចរាចរណ៍ នៃស្នងការដ្ឋាននគបាលខេត្ត និងក្រុមគ្រួសារ១១គ្រួសារ នាំគ្នាយកបង្គោលថ្មទៅដាំជាប់ទ្វាររបង និងលើកស្លាកគណបក្សបិទផ្លូវ មិនឲ្យលោកយាយ មាស ខាន់ អាយុ៩៧ឆ្នាំ និងកូនស្រីឈ្មោះពោន ទឹព អាយុ៧៥ឆ្នាំ ចាស់ជរា២នាក់ម្តាយកូននៅភូមិវាលយន្ត សង្កាត់ស្វាយរៀង ក្រុងស្វាយរៀង ឲ្យចេញពីផ្ទះមករកផ្លូវថ្នល់ ហើយលោកយាយ និងកូនស្រី បានអំពាវនាវរកការអន្តរាគមន៍ពីសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មេត្តាជួយរកយុត្តិធម៌នោះ ។
សូមរំលឹកផងដែរថា កាលពីថ្ងៃទី២៦ វិច្ឆិកា ២០១៥ «កោះសន្តិភាព» បានចុះផ្សាយនៅលើគេហទំព័រ ថា មាននាយនគបាលថ្នាក់វរសេនីយ៍ទោ នាយរងការិយាល័យនគបាលចរាចរណ៍ នៃស្នងការដ្ឋាននគរបាលខេត្ត និងក្រុមគ្រួសារ យកបង្គោលថ្មដាំជាប់ទ្វាររបង និងលើកស្លាកគណបក្សមកបិតផ្លូវ មិនឲ្យលោកយាយ និងកូនចេញពីផ្ទះទៅរកផ្លូវ ទោះបីលោកអភិបាលរងក្រុងស្វាយរៀងមកអន្តរាគមន៍ក៏ដោយ ក៏ពួកគេមិនអើពើឡើយ នៅតែយកបង្គោលថ្មមកដាំជាប់ទ្វាររបងបិតផ្លូវ ហើយលើកស្លាកគណបក្សពីមុខរបងដោយអយុត្តិធម៌នោះ ។
លោកឧត្តមសេនីយ៍ត្រី កឹង ឃន ស្នងការនគបាលខេត្ត បានឲ្យដឹងថា ចំពោះករណីនេះគឺមិនជាប់ពាក់ពន្ធ័និងអង្គភាពរបស់ស្នងការដ្ឋាននគបាលខេត្តស្វាយរៀងឡើយ គឺជារឿងបុគ្គលសុទ្ធសាធរបស់លោកវរសេនីយ៍ទោ នាយរងការិយាល័យនគបាលចរាចរណ៍ នៃស្នងការដ្ឋាននរបាលខេត្តស្វាយរៀងម្នាក់ឯង ជាមួយក្រុមគ្រួសាររបស់លោក និងប្រជាពលរដ្ឋ១១គ្រួសារ នៅភូមិវាលយន្តនោះ អង្គភាពស្នងការនគរបាលខេត្តពុំបានបញ្ជាឲ្យទៅលើកផ្លាកគណបក្សទេ ដូច្នេះជារឿងបុគ្គលមិនពាក់ព័ន្ធជាមួយអង្គភាពឡើយ ។
ចំពោះករណីយកបង្គោលថ្មទៅដាំជាប់ទ្វាររបង និងលើកស្លាកគណបក្សបិទមិនឲ្យលោកយាយ៩៧ឆ្នាំនិងកូនស្រីបើកទ្វាររបងចេញមករកផ្លូវថ្នល់នោះ អាជ្ញាធរកំពុងពិនិត្យ និងដោះស្រាយជូនលោកយាយហើយ ៕
ចែករំលែកព័តមាននេះ