កំពូលភេរវករដ៏ល្បីឈ្មោះ ហើយបង្កគ្រោះថ្នាក់បំផុតនៅលើពិភពលោក ត្រូវបានបង្ហាញដោយវ៉េបសាយមួយកាលពីពេលថ្មីៗកន្លងមក ។ កំពូលភេរវករល្បីឈ្មោះទាំងនោះមានចំនួន១០នាក់ ដែលសុទ្ធសឹងតែជាមេដឹកនាំក្រុមបង្កភេរវកម្មនៅប្រទេសនានាលើពិភពលោក ។ កំពូលភេរវករទាំង១០នាក់ នោះមានដូចជា ៖ ១-អូសាម៉ា ប៊ីនឡាដេន ជាមេដឹកនាំក្រុមអាល់កៃដា បច្ចុប្បន្នកំពុងលាក់ខ្លួនយ៉ាងអាថ៌កំបាំងបំផុត ។ អូសាម៉ា ប៊ីនឡាដេន កើតនៅថ្ងៃទី១០ មីនា ឆ្នាំ១៩៥៧ មានដើមកំណើតនៅក្នុងប្រទេសអារ៉ាប៊ី សាអ៊ូឌីត ។ ប៊ីនឡាដេនជាមនុស្សដ៏មានពិសពុលបំផុត គឺបានបង្កើតច្បាប់ឃោរឃៅមួយក្នុងគោលបំណងបញ្ហាឱ្យសំលាប់ពលរដ្ឋអាមេរិក និងជនស៊ីវិល ហើយអ្វីដែលធ្វើឱ្យពិភពលោកមានការភ្ញាក់ផ្អើលបំផុតនោះ គឺប៊ីនឡាដេន បានបើកការវាយប្រហារលើអគារភ្លោះពាណិជ្ជកម្មពិភពលោក (WTC) នៅក្នុងទីក្រុងញូវយ៉ក។ តាមសេចក្ដីរាយការណ៍ថា បច្ចុប្បន្នប៊ីន ឡាដេន នៅរស់ ហើយកំពុងរស់នៅតំបន់ព្រំដែនរវាងអាហ្វហ្គានីស្ថាន និងប៉ាគីស្ថាន ។
២-Khalid Sheikh Mohammed ជាមេផ្ដួចផ្ដើមគំនិតបើកការវាយប្រហារភេរវកម្មរបស់ក្រុមអាល់ដៃដា ។ Khalid Moham-med កើតនៅក្នុងឆ្នាំ១៩៦៤ ដើមកំណើតនៅក្នុងប្រទេសប៉ាគីស្ថាន ។ ជននេះបានផ្ដួចផ្ដើមគំនិតបើកការវាយប្រហារភេរវកម្មជាច្រើនលើកច្រើនសា ដូចជាការវាយប្រហារនៅកោះបាលី និងក្នុងប្រទេសដទៃទៀត ហើយ ត្រូវបានចោទប្រកាន់ថា ជាអ្នកទទួលខុសត្រូវមួយផ្នែកក្នុងការប៉ុនប៉ងលួចធ្វើគត់ស្ដេចសង្ឃកាតូលិកប៉ាបចនប៉ូលទី២ ។
៣-អៃម៉ាន់ អាល់ហ្សាវ៉ាហ៊ីរី ក៏ជាភេរវករដ៏ល្បីឈ្មោះមួយរូបផងដែរ កើតនៅថ្ងៃទី១៩ មិថុនា ឆ្នាំ១៩៥១ ដើមកំណើតនៅក្នុងប្រទេសអេហ្ស៊ីប ។ អៃម៉ាន់ អាល់ហ្សាវ៉ា ហ៊ីរី ត្រូវបានកាត់ទោសកាលពីខែសីហា ឆ្នាំ១៩៩៨ ពីបទចោទប្រកាន់មានតួនាទីក្នុងការដាក់បំផ្ទុះគ្រាប់បែកនៅស្ថានទូតសហរដ្ឋអាមេរិក ប្រចាំទីក្រុងដាអេសសាឡាអាំ ប្រទេសតង់ហ្សានី ។ នៅចុងឆ្នាំ១៩៩៦ រូបគេត្រូវបានចាប់ខ្លួន និងឃុំខ្លួនរួចម្ដង ហើយនៅក្នុងប្រទេសរុស្ស៊ី រយៈពេល៦ខែ ដោយភ្នាក់ងារសន្ដិសុខសហព័ន្ធ (FSB) រុស្ស៊ី ក្រោយពីព្យាយាមជ្រើសរើសពួកជីហាដនៅក្នុងប្រទេសឆេតឆេនី ។
៤-នាង Aafia Siddiqui ជាភេរវករស្ដ្រីនៃក្រុមអាល់កៃដា នាងកើតនៅថ្ងៃទី២ មីនា ឆ្នាំ១៩៧២ មានដើមកំណើតនៅក្នុងប្រទេសប៉ាគីស្ថាន ។ នាងបានរៀបការជាមួយក្មួយប្រុស Khalid Sheikh Mohammed ដែលជាមេផ្ដួចផ្ដើមគំនិតបើកការវាយប្រហារលើអគារភ្លោះពាណិជ្ជកម្មពិភពលោកថ្ងៃទី១១ កញា ឆ្នាំ២០០១ ហើយនាងត្រូវបានរដ្ឋាភិបាលអាមេរិកចាត់ទុកថា ជាភេរវរករស្ដ្រីរបស់ក្រុមអាល់កៃដាដ៏សាហាវបំផុត ។
៥-អាដាម ហ្គាដាន ជាអ្នកប្រតិបត្ដិការជាន់ខ្ពស់របស់ក្រុមអាល់កៃដា ត្រូវបានគេជឿថា បច្ចុប្បន្នកំពុងលាក់ខ្លួននៅតំបន់ព្រំដែនភាគខាងជើងប៉ាគីស្ថាន ។ អាដាមហ្គា ដាន កើតនៅថ្ងៃទី១ កញា ឆ្នាំ១៩៧៨ មានដើមកំណើតនៅសហរដ្ឋអាមេរិក ។
៦-មូឡាម៉ូហាម៉េដ អូម៉ា ជាមេដឹកនាំកំពូលរបស់ពួលតាលីបង់នៅអាហ្វហ្គានីស្ថាន ។ មូឡាអូម៉ា កើតនៅក្នុងរង្វង់ឆ្នាំ ១៩៥៩ មានដើមកំណើតនៅតំបន់ក្បែរទីក្រុងកង់ដាហា ប្រទេសអាហ្វហ្គានីស្ថាន ។ មូឡាអូម៉ា ជាមនុស្សប្រកបដោយគ្រោះថ្នាក់ និងល្បីល្បាញឈ្មោះបំផុត បន្ទាប់ពីអូសាម៉ា ប៊ីនឡាដេន ហើយកាលពីពេលថ្មីៗកន្លងមកមានលេចឮព័ត៌មានថា ត្រូវបានចាប់ខ្លួននៅក្នុងប្រទេសប៉ាគីស្ថាន ។
៧-អាប៊ូនីដាល់ ក៏ជាមនុស្សដ៏មានពិសពុលមួយរូបផងដែរ ។ កើតនៅក្នុងគ្រួសារអភិជនមួយនៅគេប៉ាឡេស្ទីន ។
៨-Baitullah Mehsud ជាមេដឹកនាំកុលសម្ព័ន្ធភ្នំនៅតំបន់ដ៏មានបញ្ហាមួយនៅក្នុងប្រទេសប៉ាគីស្ថាន ហើយមានខ្សែបណ្ដាញ អាល់កៃដា និងជាមេបញ្ជាការក្រុមតាលីបង់ប៉ាគីស្ថាន ។
៩-កាឡូស ហ្សាក់កាល់ ជាភេរវករប្រកបដោយគ្រោះថ្នាក់មួយរូបកើតនៅក្នុងឆ្នាំ១៩៤៩ មានដើមកំណើតនៅក្នុងទីក្រុង ការ៉ាកាស់ ប្រទេសវេណេហ្ស៊ុយអេឡា ហើយធ្លាប់ត្រូវបានបណ្ដេញពីមហាវិទ្យាល័យនៅឆ្នាំ១៩៧០ ។ ក្រោយពីត្រូវបានបណ្ដេញចេញពីមហាវិទ្យាល័យគេបានចូលរួមក្នុងចលនារណសិរ្ស ដើម្បីសេរីភាពបាឡេស្ទីន ហើយក៏បានក្លាយជាភេរវរករល្បីឈ្មោះមួយរូប ។
១០-អានវ៉ាអាល់ អាវឡានី ត្រូវបានចាត់ទុកថាជាអាវុធដ៏សាហាវមួយរបស់ក្រុមអាល់កៃដា ។ ជននេះមានដើមកំណើតនៅសហរដ្ឋអាមេរិក ជាឧបករណ៍ដ៏គ្រោះថ្នាក់បំផុតរបស់អាល់កៃដា ៕
