រាជធានីភ្នំពេញ ៖ សេចក្តីរាយការណ៍បានឱ្យដឹងថា ខណៈនេះ កម្មកររោងចក្រជូយូ អ៊ីនដាស់ស្ទ្រី ខូអិលធីឌី មានទីតាំងនៅភូមិភ្នំពេញថ្មី សង្កាត់ភ្នំពេញថ្មី ប្រមាណជាង៣០នាក់បានលើកគ្នាមកមុខក្រសួងការងារជាថ្មីដើម្បីជម្រុញឱ្យគណៈកម្មការដោះស្រាយកូដកម្ម បាតុកម្មតាមមុខសញ្ញាជួយពន្លឿនការដោះស្រាយ បន្ទាប់ពីពួកគេធ្វើកូដកម្មអស់រយៈពេលប្រមាណជាង១ខែហើយមិនទាន់មានដំណោះស្រាយ។
នៅព្រឹកថ្ងៃទី២៧ វិច្ឆិកា នេះ កម្មករដែលមកតវ៉ាមានកាន់បដាផងដែរ ដើម្បីទាមទារឱ្យក្រុមហ៊ុនបើកប្រាក់ខែឱ្យគ្រប់ និងគ្រោពច្បាប់ការងារ។
បើតាមតំណាងកម្មករដែលមកធ្វើការតវ៉ាបានឱ្យដឹងថា រោងចក្រខាងលើមានកម្មករ៣០០នាក់ បាននាំគ្នាតវ៉ាតាំងពីថ្ងៃទី ២២ តុលា ដើម្បីទាមទារឱ្យក្រុមហ៊ុនអនុវត្តទៅតាមសេចក្តីបង្គាប់របស់ក្រុមប្រឹក្សាអាជ្ញាកណ្តាល និងលក្ខខណ្ឌការងារមួយចំនួន ជាពិសេសឱ្យក្រុមហ៊ុនបើកប្រាក់ឈ្នួលឱ្យកម្មករឱ្យបានត្រឹមត្រូវតាមច្បាប់ការងារ ព្រោះភាគីក្រុមហ៊ុនបានបើកលុយឱ្យកម្មករជំពាក់ និងយឺតជារៀងរាល់ខែ ជាហេតុធ្វើឱ្យកម្មករជួបបញ្ហាជីវភាពយ៉ាងធ្ងន់ធ្ងរ។
តំណាងដដែលបានបន្តថា កម្មករបាននាំគ្នាធ្វើកូដកម្មមុខរោងចក្រ និងលើកគ្នាមកក្រសួងការងារជាបន្តបន្ទាប់រហូតមកដល់ថ្ងៃទី២៧ វិច្ឆិកា នេះ ជាលើកទី៤ហើយ៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ