ខេត្តសៀមរាប ៖ អាជ្ញាធរជាតិអប្សរាសហការជាមួយគណៈកម្មការយូណេស្កូប្រចាំកម្ពុជា បានធ្វើពិធីបង្ហាញឱ្យក្រុមយុវជន-យុវតីលើកទី១ថ្នាក់តំបន់អាស៊ី ស្តីពីបេតិកភណ្ឌពិភពលោក នៅមជ្ឈមណ្ឌលអាជ្ញាធរជាតិអប្សរា
ខេត្តសៀមរាប ៖ អាជ្ញាធរជាតិអប្សរាសហការជាមួយគណៈកម្មការយូណេស្កូប្រចាំកម្ពុជា បានធ្វើពិធីបង្ហាញឱ្យក្រុមយុវជន-យុវតីលើកទី១ថ្នាក់តំបន់អាស៊ី ស្តីពីបេតិកភណ្ឌពិភពលោក នៅមជ្ឈមណ្ឌលអាជ្ញាធរជាតិអប្សរា ចាប់ពីថ្ងៃទី២៥ វិច្ឆិកា ដល់ថ្ងៃទី៣ ធ្នូ ២០១៥ ដោយមានយុវជនមកពី២១ប្រទេស និងមានអ្នកចូលរួមទាំងអស់ចំនួន៤៥រូបផងដែរ ។
អាជ្ញាធរជាតិអប្សរាកាលពីថ្ងៃទី២៦ខែវិច្ឆិកា ឆ្នាំ២០១៥ បានធ្វើការបង្ហាញឱ្យក្រុមយុវជន-យុវតីយល់ដឹងពីវប្បធម៌របស់ខ្មែរ បានឱ្យដឹងថា ខ្លឹមសារនៃវេទិកានេះគឺផ្តោតទៅលើប្រធានបទពីរសំខាន់ៗគឺ ១-ភាពសម្បូរបែបនៃរចនាប័ទ្មស្ថាបត្យកម្មនៃរមណីយដ្ឋានអង្គរ, ២-កិច្ចការពារ និងភាពប្រឈមក្នុងរមណីយដ្ឋាន ដែលនឹងផ្តោតទៅលើប្រាសាទ ទីតាំងជុំវិញប្រាសាទ ប្រព័ន្ធទឹក បារាយណ៍ ព្រៃ ទេសភាពវប្បធម៌ ទំនៀមទម្លាប់រស់នៅរបស់អ្នកស្រុក ដែលត្រូវបានផ្សារភ្ជាប់ទៅនឹងការគ្រប់គ្រងទេសចរណ៍ ក្នុងគោលដៅអភិវឌ្ឍន៍ប្រកបដោយចីរភាព ។
ប្រភពពីមន្ត្រីអាជ្ញាធរអប្សរាបានឱ្យដឹងសថា វេទិកានេះក៏ត្រូវបានដឹកនាំឧទ្ទេសនាមដោយអ្នកជំនាញការនៃអាយស៊ីស៊ីអង្គរ និងអ្នកជំនាញជាច្រើនរូបទៀតរបស់អាជ្ញាធរជាតិអប្សរា ។ ក្រៅពីនេះក៏មានបន្តដំណើរទៅទស្សនកិច្ចសិក្សានៅតាមបណ្តាប្រាសាទ និងការដ្ឋាននានាក្នុងរមណីយដ្ឋានអង្គរផងដែរ ។ ជាមួយគ្នានេះក្រុមយុវជនដែលចូលរួមទាំង២១ប្រទេសនឹងលើកយកតំបន់រមណីយដ្ឋាននានាដែលមាននៅក្នុងប្រទេសរបស់ខ្លួនមកបង្ហាញ ដើម្បីសិក្សាប្រៀបធៀបឱ្យបានយល់ដឹងពីគ្នាទៅវិញមក ។
ប្រភពដដែលបានបន្តថា នៅចុងបញ្ចប់នៃកម្មវិធីរបស់ក្រុមយុវជននៃវេទិកានេះ ក៏នឹងចូលរួមក្នុងកិច្ចប្រជុំពេញអង្គលើកទី២២ នៃគណៈកម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា អាយស៊ីស៊ី-អង្គរ នៅសាលសន្និសីទអង្គរ នៃអាជ្ញាធរជាតិអប្សរា ខេត្តសៀមរាបផងដែរ ៕
ចែករំលែកព័តមាននេះ