រាជធានីភ្នំពេញ ៖ សមត្ថកិច្ចល្បាតប៉ុស្តិ៍ផ្សារដើមថ្កូវចាប់ខ្លួនជនសង្ស័យជួញដូរគ្រឿងញៀនម្នាក់ ដកហូតបានគ្រឿងញឿន១កញ្ចប់ធំ, យ៉ាម៉ា១៣គ្រាប់ ខណៈជិះម៉ូតូម្នាក់ឯងនៅចំណុចមុខក្រុមហ៊ុនទូរស័ព្ទ QB (013) តាមបណ្ដោយមហាវិថីព្រះមុនីវង្ស ស្ថិតក្នុងសង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង៧ និង០៥នាទីយប់ ថ្ងៃទី២៦ វិច្ឆិកា ២០១៥ ។
ជនសង្ស័យជួញដូរគ្រឿងញៀនដែលត្រូវសមត្ថកិច្ចចាប់ខ្លួនឈ្មោះ ម៉ា ចាន់ថន ភេទប្រុស អាយុ៣០ឆ្នាំ មុខរបររត់ម៉ូតូឌុប ស្នាក់នៅផ្ទះជួលក្នុងសង្កាត់ផ្សារដើមគរ ខណ្ឌទួលគោក ជិះម៉ូតូម្នាក់ឯងម៉ាកហុងដា ឌ្រីម សេ១២៥ ស៊េរីឆ្នាំ២០១១ ពណ៌ខ្មៅ ពាក់ស្លាកលេខ ភ្នំពេញ 1BA-9124 ។
ប្រភពពីសមត្ថកិច្ចបានឲ្យដឹងថា មុនពេលកើតហេតុ ពេលកំពុងល្បាតនៅក្នុងភូមិសាស្ត្ររបស់ខ្លួនក៏ប្រទះឃើញបុរសម្នាក់ជិះម៉ូតូម្នាក់ឯង ខណៈនោះជនសង្ស័យហាក់មានការភិតភ័យបម្រុងជិះគេចខ្លួនធ្វើឲ្យសមត្ថកិច្ចមានការសង្ស័យក៏ប្រដេញតាម និងស្ទាក់ចាប់ធ្វើការឆែកឆេរឃើញគ្រឿងញៀន១កញ្ចប់ធំ, យ៉ាម៉ា១៣គ្រាប់, ជញ្ជីងថ្លឹង១, សម្រាប់ញេចគ្រឿងញៀន១ និងថង់សម្រាប់ច្រកគ្រឿងញៀនមួយចំនួន ព្រមទាំងវត្ថុតាងមួយចំនួនទៀត ។
ក្រោយពេលធ្វើការឃាត់ខ្លួនសមត្ថកិច្ចបញ្ជូនជនសង្ស័យទៅប៉ុស្តិ៍នគរបាលរដ្ឋបាលផ្សារដើមថ្កូវដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ