ខេត្តកណ្ដាល ៖ ដើម្បីចូលរួមអបអរសាទរព្រះរាជពិធីបុណ្យអុំទូក អកអំបុក និងសំពះព្រះខែ គណៈកម្មការវត្តសត្ថារាម បានរៀបចំពិធីអុំខ្ទះត្នោតដែលជាប្រពៃណីប្រចាំតំបន់នៅក្នុងប្រទេសកម្ពុជាកាលពីថ្ងៃទី២៥ វិច្ឆិកា ស្ថិតនៅក្នុងបរិវេណវត្ត ភូមិស្ថាបតាឱម ឃុំគគីរ ស្រុកកៀនស្វាយ ខេត្តកណ្តាល ។
ព្រះគ្រូបញ្ញាសេរី នូ សុភាន ចៅអធិការវត្តកោះសត្ថារាម មានសង្ឃដីកាថា ការរៀបចំពិធីអុំខ្ទះត្នោតនេះឡើង គឺក្នុងគោលបំណងឱ្យមានការពង្រឹងសាមគ្គីភាពក្នុងស្រទាប់ប្រជាពលរដ្ឋ ឱ្យយុវជនចូលរួមលេងកីឡាដើម្បីបញ្ចៀសនូវបញ្ហាគ្រឿងញៀន ។ ជាពិសេសចង់រក្សាកេរ្តិ៍ដំណែលវប្បធម៌ប្រពៃណីក្នុងតំបន់ និងចូលរួមអបអរសាទរព្រះរាជពិធីបុណ្យអុំទូកនាឆ្នាំនេះផងដែរ ។
បើតាមព្រះចៅអធិការវត្តអង្គនេះមានថេរដីកា ពិធីបុណ្យអុំខ្ទះត្នោតនេះ មិនមានឯកសារច្បាស់លាស់ឡើយ ប៉ុន្តែកាលកន្លងមកពិធីនេះតែងឃើញរៀបចំធ្វើនៅក្នុងខេត្តកំពង់ស្ពឺ និងស្វាយរៀងដែលជាខេត្តសម្បូរទៅដោយដើមត្នោតច្រើន ហើយប្រជាពលរដ្ឋយកខ្ទះនេះដើម្បីកូរធ្វើស្ករត្នោត ។ ព្រះអង្គមានសង្ឃដីកាបញ្ជាក់ថា កាលដើមឡើយព្រះអង្គមានគោលបំណងរៀបចំពិធីអុំទូកត្នោតទេ តែដោយសារទីធ្លាមានលក្ខណៈតូចចង្អៀត ទើបយើងសម្រេចឱ្យមានការអុំជាខ្ទះត្នោតនេះវិញ។
ព្រះគ្រូបញ្ញាសេរី នូ សុភាន បានបន្ថែមថា នេះជាលើកដំបូងហើយដែលវត្តរបស់ព្រះអង្គបានរៀបចំធ្វើ ខណៈពេលកន្លងមកព្រះអង្គត្រឹមតែរៀបចំពិធីអកអំបុក សំពះព្រះខែជារៀងរាល់ឆ្នាំប៉ុណ្ណោះ ហើយបើការរៀបចំទទួលបានជោគជ័យយើងនឹងធ្វើវាជារៀងរាល់ឆ្នាំ ។ ព្រះអង្គបន្តថា យើងរៀបចំលើកដំបូងនេះមានការចូលរួមពីកីឡាករជាង១០០នាក់ ដែលមានខ្ទះចំនួន១០ ក្នុងនោះកីឡាករមានការផ្លាស់ប្តូរគ្នាដើម្បីធ្វើការប្រណាំងក្នុងរយៈចម្ងាយ៥០ម៉ែត្រ ហើយអ្នកឈ្នះជ័យលាភីលេខ១ទទួលបានថវិកា១០ម៉ឺនរៀល មី១កេស និងប្រាក់ឧបត្ថម្ភមួយចំនួនទៀតតាមការផ្តល់ជូនពីសប្បុរសជននានា ។ ចំណែកកីឡាករដែលមិនជាប់ជ័យលាភី គឺយើងមានរង្វាន់លើកទឹកចិត្តផងដែរ ដោយក្នុងកីឡាករម្នាក់ៗទទួលបានថវិកា២ម៉ឺនរៀល និងមី ។
ព្រះគ្រូបញ្ញាសេរី នូ សុភាន បានឱ្យដឹងទៀតថា ការរៀបចំពិធីអុំខ្ទះត្នោតនេះឡើង ក៏ជាការឆ្លើយតបតាមការអំពាវនាវរបស់រាជរដ្ឋាភិបាលកម្ពុជាដែលបានសម្រេចផ្អាកព្រះរាជពិធីបុណ្យអុំទូកនាឆ្នាំនេះ ដោយយោងទៅតាមស្ថានភាពទឹកមិនអំណោយផល ប៉ុន្តែបានអនុញ្ញាតឱ្យអាជ្ញាធរតាមបណ្តាខេត្តនានារៀបចំជាធម្មតាទៅតាមលទ្ធភាពដែលមាន ។ ការរៀបចំកម្មវិធីនេះឡើង គឺបានផ្តល់ភាពសប្បាយរីករាយដល់ប្រជាពលរដ្ឋក្នុងតំបន់ផង និងចង់រក្សាប្រពៃណី គុណតម្លៃនៃថ្ងៃពិធីបុណ្យអុំទូកនេះ ព្រោះក្រៅតែពិធីអុំខ្ទះត្នោតនៅពេលយប់ យើងក៏មានពិធីបណ្តែតប្រទីបខ្នាតតូចដែលប្រជាពលរដ្ឋធ្វើដោយខ្លួនឯង ហើយក៏មានពិធីចម្រើនព្រះបរិត្តផ្តល់ភាពជោគជ័យ សិរីសួស្តី និងការអកអំបុកសំពះព្រះខែ បាញ់កាំជ្រួច រហូតដល់យប់ជ្រៅ ។
គួរបញ្ជាក់ថា ក្នុងពិធីអុំខ្ទះត្នោតនេះមានការចូលរួមទស្សនាពីប្រជាពលរដ្ឋយ៉ាងច្រើនកុះករទាំងប្រជាពលរដ្ឋនៅក្នុងតំបន់ និងប្រជាពលរដ្ឋដែលធ្វើដំណើរតាមដងផ្លូវបានចូលមើលដោយភាពសប្បាយរីករាយផងដែរ ៕
ចែករំលែកព័តមាននេះ