ខេត្តកំពត ៖ ទិវាលើកកម្ពស់អនាម័យជនបទក្រោមប្រធានបទ «អនាម័យល្អ គឺជាការទទួលខុសត្រូវទាំងអស់គ្នា» ត្រូវបានប្រារព្ធធ្វើឡើងកាលពីថ្ងៃទី១២ ខែវិច្ឆិកា កន្លងមកនេះ នៅវត្តគាថាវង្ស ឃុំត្រពាំងសាលាខាងលិច ស្រុកបន្ទាយមាស ក្រោមអធិបតីភាពលោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ ។
ចូលរួមក្នុងពិធីនេះមាន លោករដ្ឋលេខាធិការអនុរដ្ឋលេខាធិការក្រសួងអភិវឌ្ឍន៍ជនបទ អស់លោកជាតំណាងអង្គការSNV និងតំណាងអង្គការជាតិ-អន្តរជាតិ លោក-លោកស្រីប្រធាន-អនុប្រធានមន្ទីរអភិវឌ្ឍន៍ជនបទខេត្ត-រាជធានី អភិបាលខេត្ត អភិបាលស្រុក ប្រជាពលរដ្ឋ និងសិស្សានុសិស្សយ៉ាងច្រើនកុះករ ។
លោក សុក សារ៉ាដ អភិបាលរងខេត្ត មានប្រសាសន៍ថា ទិវាជាតិលើកកម្ពស់អនាម័យជនបទ បានប្រារព្ធធ្វើឡើងលើកទី៦ហើយនៅស្រុកបន្ទាយមាស ដើម្បីចូលរួមអបអរសាទរដែលយើងសម្រេចបានជោគជ័យក្នុងការលើកកម្ពស់អនាម័យល្អនៅក្នុងស្រុកនេះ ។ ជាលទ្ធផលដែលយើងសម្រេចបាននាពេលនេះ គឺផ្ដើមចេញពីកិច្ចសហការជាលក្ខណៈអន្តរក្រសួង និងគាំទ្រអំពីដៃគូអភិវឌ្ឍន៍ទាំងអស់ ក្នុងការជំរុញឱ្យកាន់តែយល់ដឹងកាន់តែខ្ពស់ថែមទៀត ។
លោកអភិបាលរងខេត្ត ថ្លែងទៀតថា ពីមុនស្រុកបន្ទាយមាសមានអត្រាទាបបំផុត ដោយពលរដ្ឋភាគច្រើនមិនបានធ្វើបង្គន់បន្ទោបង់ ប៉ុន្តែប៉ុន្មានខែចុងក្រោយនេះ ស្រុកបន្ទាយមាសបានទទួលជោគជ័យក្នុងការអនុវត្តគម្រោងលើកកម្ពស់អនាម័យជនបទ ។ និយាយរួម គឺប្រជាជននៅស្រុកបន្ទាយមាសឈប់បន្ទោបង់ពាសវាលពាសកាលដូចមុនទៀតហើយ ។ លោក សង្ឃឹមថា អង្គការ SNV នឹងបន្តជួួយដល់ស្រុកផ្សេងៗទៀត នៅក្នុងខេត្តកំពត ។
លោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ ថ្លែងថា ថ្ងៃទី១៣ ខែវិច្ឆិកា គឺជាថ្ងៃដ៏សំខាន់សម្រាប់ទូទាំងប្រទេសកម្ពុជា ដែលបានកំណត់យកថ្ងៃនេះជាថ្ងៃប្រារព្ធទិវាជាតិលើកកម្ពស់អនាម័យជនបទ ហើយរាជរដា្ឋភិបាលកម្ពុជា បានទទួលស្គាល់អំពីភាពចាំបាច់នៃការលើកកម្ពស់អនាម័យជនបទ កំណត់ចក្ខុវិស័យជាគោលនយោបាយជាតិស្ដីពីការផ្គត់ផ្គង់ទឹកស្អាត និងអនាម័យ ។ នៅឆ្នាំ២០២៥ ខាងមុខនេះ ប្រជាជនគ្រប់រូបនៅសហគមន៍ជនបទត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ ។
លោករដ្ឋមន្ត្រី ថ្លែងទៀតថា យោងតាមទិន្នន័យរបស់អង្គការអភិវឌ្ឍន៍ហូឡង់ ក៏ដូចជាក្រសួងផែនការ រួមទាំងមន្ទីរអភិវឌ្ឍន៍ជនបទខេត្តកំពត គឺស្រុកបន្ទាយមាសមានឃុំចំនួន១៥ ជាស្រុកគំរូទូទាំងប្រទេសដែលពលរដ្ឋមានបង្គន់បន្ទោបង់គ្រប់គ្រាន់ ឈប់បន្ទោបង់ពាសវាលពាសកាលដូចមុនទៀតហើយ នេះជាជោគជ័យមួយ ៕
ចែករំលែកព័តមាននេះ