ខេត្តកំពង់ចាម ៖ ផ្សែងខ្មួលខ្មាញ់បានហុយទ្រលោមទ្បើងទៅលើអាកាស ចេញពីផ្ទះឈើប្រក់ស័ង្កសីមួយខ្នង ដែលសង់ផ្ទាល់ដី ហើយជនជាតិវៀតណាម២នាក់ប្តីប្រពន្ធ បានជួលបើកលក់កាហ្វេយីហោ «៧២» ដែលមានទីតាំងស្ថិតនៅភូមិជ្រោយថ្ម សង្កាត់បឹងកុកក្រុងកំពង់ចាម ។ ហេតុការណ៍ភ្ញាក់ផ្អើលពីការឆេះហាងកាហ្វេនេះ បានកើតទ្បើងកាលពីវេលាម៉ោង៧និង២០នាទីព្រឹក ថ្ងៃទី២៦ វិច្ឆិកា ត្រូវបានលោកឧត្តមសេនីយ៍ទោ បែន រ័ត្ន ស្នងការនគរបាលខេត្តបញ្ជាឱ្យរថយន្តពន្លត់អគ្គិភ័យចំនួន២គ្រឿង ទៅអន្តរាគមន៍បាញ់ទឹកពន្លត់ភ្លាមៗផងដែរ ។
ស្នងការរងនគរបាលខេត្ត លោកវរសេនីយ៍ឯក លាង អេង ប្រាប់ឱ្យដឹងថា ពេលមានគ្រោះអគ្គិភ័យខាងលើកើតទ្បើងបានបន្តិចនោះ ត្រូវបានលោកស្នងការនគរបាលខេត្ត បានចាត់ឱ្យរូបលោកដឹកនាំកម្លាំងជាច្រើននាក់ ចុះទៅជួយអន្តរាគមន៍បាញ់ទឹក ដោយមានកិច្ចសហការជាមួយនគរបាលនៃអធិការដ្ឋាននគរបាលក្រុងកំពង់ចាមជាច្រើននាក់ ។
លោកវរសេនីយ៍ឯកបានឱ្យដឹងទៀតថា ដំបូងភ្លើងបានឆេះចេញពីផ្ទះលក់កាហ្វេឈ្មោះ សុខ ស្រីមុំ មានយីហោ«៧២» ហើយបានឆេះរាលដាលកាន់តែខ្លាំងទ្បើងៗ និងសន្ធោសន្ធៅ ស្របពេលដែលខ្យល់ជំនោររដូវប្រាំងបោកបក់មកពីទិសខាងជើងផងនោះ ។ សកម្មភាពបាញ់ទឹកបានជួយទប់ស្កាត់ មិនឱ្យឆេះរាលដាលទៅដល់ផ្ទះជិតខាងទេ និងធ្វើឱ្យភ្លើងរលត់ទាំងស្រុងអស់ទឹកចំនួន៤រថយន្តធំៗ ហើយក៏មិនមានអ្នកណាម្នាក់រងរបួសដែរ ។
ចំពោះមូលហេតុដែលបង្កឱ្យមានអគ្គិភ័យនេះ កើតទ្បើងដោយសារតែប្តីប្រពន្ធជនជាតិវៀតណាម ម្ចាស់ផ្ទះលក់កាហ្វេហ្វីនបានឈ្លោះប្រកែកគ្នា ។ ដោយសារប្តីមានកំហឹងខ្លាំង ក៏បានចូលក្នុងបន្ទប់ដុតភ្លើងបង្កមហន្តរាយភ្ញាក់ផ្អើលតែម្តង ។ ពេលដុតឱ្យឆេះហើយ២នាក់ប្តីប្រពន្ធ រត់ចែកជើងគ្នាចេញបាត់ទៅ ។ ពេលនេះសមត្ថកិច្ចកំពុងតែតាមចាប់២នាក់ប្តីប្រពន្ធនោះហើយ ។
តាមសាក្សីឈ្មោះ អឹុង ម៉េងហុង ភេទប្រុស អាយុ៣៤ឆ្នាំ មុខរបរបើកលក់កាហ្វេនៅជាប់ហាង«៧២» នោះដែរបាននិយាយពីហេតុការណ៍ផ្ទាល់ភ្នែកប្រាប់ឱ្យដឹងថា ផ្ទះលក់កាហ្វេរបស់ឈ្មោះស្រីមុំនោះ ជាជនជាតិវៀតណាមបន្លំប្រើ ឈ្មោះខ្មែរដាក់ថា អាមុំ បានជួលគេប្រកបរបរលក់កាហ្វេ ។ ភ្លើងបានឆេះចេញពីហាងកាហ្វេនេះ ក្រោយពេលប្តីប្រពន្ធទាស់គ្នា ។
ម៉េង ហុង និយាយថា នៅពេលដែលភ្លើងឆេះខ្លាំងទ្បើងៗក៏រាលដាលមកដល់ផ្ទះរបស់គាត់ ដែលបានជួលគេបើកហាងលក់កាហ្វេដែរ ដោយបានរងការខូចខាតអស់ជញ្ជាំងមួយចំហៀង ហើយក្រុមគ្រួសារគាត់ក៏នាំគ្នាជញ្ជូនទ្រព្យចេញពីក្នុងផ្ទះ ទៅដាក់នៅកន្លែងមានសុវត្ថិភាពបានខ្លះៗដែរ ដូចជានាំគ្នាលើកដបហ្គាសចេញក្រៅបានទាន់ពេលវេលា ។
សូមបញ្ជាក់ថា ផ្ទះត្រៀមដែលជនជាតិវៀតណាមជួលលក់កាហ្វេនេះ គឺទើបតែបាន៣ទៅ៤ខែនេះទេ ។ ជាការកត់សម្គាល់សារជាតិជនជាតិវៀតណាមហៅយួននេះ ច្រើនតែដុតផ្ទះចោលពេលមានការឈ្លោះប្រកែកគ្នាប្តីប្រពន្ធ ហើយហេតុការណ៍បែបនេះ មិនមែនជាលើកទី១ទេ គឺធ្លាប់កើតមានជារឿយៗ ។ ដូច្នេះអ្នកជួលផ្ទះ ឱ្យជនជាតិវៀតណាមស្នាក់នៅ គប្បីមានការប្រុងប្រយ័ត្នផង
ដែរ ៕
ចែករំលែកព័តមាននេះ