ប្រទេសរុស្ស៊ីបានសម្រេចដាក់ពង្រាយប្រព័ន្ធមីស៊ីលការពារអាកាស S-400 នៅប្រទេស៊ីរីជាប្រតិកម្មតបចំពោះការធ្លាក់កាលពីថ្ងៃទី២៤ វិច្ឆិកា នៃយន្តហោះទម្លាក់គ្រាប់បែក S-24 របស់ខ្លួនដោយសារការបាញ់ប្រហាររបស់យន្តហោះប្រដេញ F-16 តួកគីមួយគ្រឿងក្នុងដែនអាកាសស៊ីរី ។
ទូរទស្សន៍អាមេរិក CNN រាយការណ៍ថា បណ្តាយន្តហោះរបស់អូតង់នឹងត្រូវទទួលភ្លើងខៀវរបស់ក្រុងមូស្គូដើម្បីហោះកាត់ស៊ីរី ក្រោយការដាក់ពង្រាយបណ្តាមីស៊ីលដី-អាកាស S-400 TRIUMPH នៅក្នុងប្រទេសនេះ ។
អ្នកឆ្លើយឆ្លងព័ត៌មានរបស់ CNN លោក MATTHEW CHANCE ធ្វើការកត់សម្គាល់ថា មីស៊ីល S-400 មានសមត្ថភាពគ្របដណ្តប់លើដែនអាកាសស៊ីរីទាំងមូលដែលមានន័យថា អាចត្រួតត្រាទាំងស្រុងនូវដែនអាកាសរបស់ប្រទេសនេះដោយក្រុងមូស្គូ ។ រ៉ាដារបស់ប្រព័ន្ធ S-400 អាចចាប់បានក្នុងពេលដំណាលគ្នាគោលដៅដល់៣០០ ហើយមានសមត្ថភាពប្រឆាំងមីស៊ីលទៀតផង ។ មីស៊ីល៧២គ្រាប់អាចបាញ់ចេញដំណាលគ្នា ។
អគ្គសេនាធិការកងទ័ពរុស្ស៊ីប្រកាសកាលពីព្រឹកថ្ងៃទី២៥ វិច្ឆិកា ពីការសម្រេចចិត្តរបស់ខ្លួនដាក់ពង្រាយបណ្តាមីស៊ីលដី-អាកាស S-400 នៅឯមូលដ្ឋានយោធា HMEIMIM ប្រទេសស៊ីរីបន្ទាប់ពីការធ្លាក់យន្តហោះទម្លាក់គ្រាប់បែក SU-24 ដោយសារការបាញ់ប្រហាររបស់យន្តហោះប្រដេញតួកគីមួយគ្រឿងក្នុងដែនអាកាសស៊ីរី ។ ម្យ៉ាងទៀត រុស្ស៊ីបានបញ្ជូននាវាពិឃាតបាញ់មីស៊ីល MOSKVA បំពាក់ដោយប្រព័ន្ធការពារអាកាសនៅជិតខេត្ត LATTAQUIE ភាគពាយ័ព្យស៊ីរី ហើយប្រកាសថា បណ្តាយន្តហោះទម្លាក់គ្រាប់បែករបស់ខ្លួនចាប់ពីពេលនេះទៅ ត្រូវហោះហើរក្រោមកិច្ចការពាររបស់បណ្តាយន្តហោះប្រដេញ ។
អ្នកបើកយន្តហោះ S-24 ថា ពុំមានការព្រមានមុនឡើយ
អ្នកបើកដែលនៅរស់រានមានជីវិតនៃយន្តហោះប្រយុទ្ធរុស្ស៊ី SU-24 ត្រូវតួកគីបាញ់ធ្លាក់គូសបញ្ជាក់កាលពីថ្ងៃទី២៥ វិច្ឆិកា ថា រូបគេពុំបានទទួលការព្រមានជាមុនណាមួយរបស់អាជ្ញាធរតួកគីទាំងសញ្ញា ទាំងវីដេអូ ហើយបដិសេធលទ្ធភាពដែលយន្តហោះរបស់គេហោះរំលោភដែនអាកាសតួកគី ។
អ្នកបើករូបនេះដកស្រង់សម្តីដោយទីភ្នាក់ងារព័ត៌មាន TASS និយាយថា តាមពិតទៅពុំមានការព្រមានណាមួយទាំងតាមរយៈការទាក់ទង វិទ្យុ ទាំងតាមវីដេអូ ។ ពុំមានការទាក់ទងគ្នាណាមួយសោះទេ ។ ប្រសិនបើអាជ្ញាធរតួកគីពិតជាចង់ព្រមានប្រាប់យើងនោះគេអាចបង្ហាញសញ្ញា ឬបើកបរទន្ទឹមគ្នា ក៏ប៉ុន្តែពុំមានអ្វីទាល់តែសោះ ។ ភ្លាមៗគ្រាប់មីស៊ីលមួយបាញ់ត្រូវកន្ទុយយន្តហោះយើង ។ យើងមិនទាំងឃើញយន្តហោះតួកគីព្រមានរួចយើងមិនទាំងបើកគេចគ្រាប់មីស៊ីលផង ។
អ្នកបើកយន្តហោះរុស្ស៊ីរូបនេះបដិសេធលទ្ធភាពនៃការរំលោភបំពានដែនអាកាសតួកគី ព្រោះខ្លួនគេផ្ទាល់ជាអ្នកបញ្ជាយន្តហោះ SU-24 រហូតដល់ផ្ទុះគ្រាប់មីស៊ីលតួកគី ។
កងទ័ពតួកគីថា មិនស្គាល់សញ្ជាតិយន្តហោះដែលខ្លួនបាញ់
បន្ទាប់ពីទទួលការចោទប្រកាន់របស់រុស្ស៊ីថា បង្កហេតុគិតទុកជាមុន កងទ័ពតួកគីអះអាងកាលពីថ្ងៃទី២៥ វិច្ឆិកា ថា ខ្លួនពុំដឹងថា យន្តហោះដែលខ្លួនបាញ់ធ្លាក់មុននេះនៅជិតព្រំដែនស៊ីរីជាយន្តហោះរុស្ស៊ីឡើយ ហើយនិយាយថា ត្រៀមធ្វើរាល់រូបភាពនៃកិច្ចសហប្រតិបត្តិការ ។
ទោះបីមានឧប្បត្តិហេតុនេះ ដែលធ្ងន់ធ្ងរបំផុតរវាងក្រុងមូស្គូ និងក្រុងអង់ការ៉ា តាំងពីចាប់ផ្តើមធ្វើអន្តរាគមន៍យោធារុស្ស៊ី នៅស៊ីរី ក៏មេដឹកនាំនៃប្រទេសទាំង២អះអាងថា ចង់ចៀសវាងភាពតានតឹងខាងយោធាក្នុងតំបន់ដែរ ។
ក្នុងសេចក្តីប្រកាសមួយ កងទ័ពតួកគីអះអាងថា សញ្ជាតិរបស់យន្តហោះពុំត្រូវបានស្គាល់ឡើយ រួចការបាញ់ប្រហារអនុវត្តដោយស្វ័យប្រវត្តិ ។ ឧប្បត្តិហេតុនេះបណ្តាលឱ្យទាហានរុស្ស៊ី២នាក់ស្លាប់ គឺអ្នកបើកយន្តហោះម្នាក់ ក្នុងចំណោមអ្នកបើក២នាក់ និងទាហានម្នាក់ដែលចូលរួមក្នុងប្រតិបត្តិការជួយសង្គ្រោះដែលស្លាប់ បន្ទាប់ពីឧទ្ធម្ភាគចក្ររបស់កងកុំម៉ង់ដូខ្លួនត្រូវបាញ់ធ្លាក់ដែរ ។
មុននេះប្រមុខការទូតរុស្ស៊ី លោកស័រហ្គេយឡាវរ៉ូវ សម្តែងពីការសង្ស័យលើប្រការដែលថានេះជាអំពើគ្រោងទុក ។ លោកចោទប្រកាន់ក្នុងសន្និសីទសារព័ត៌មានមួយថា វាមានលក្ខណៈប្រហាក់ប្រហែលច្រើននឹងការបង្កហេតុមួយ ។ ក៏ប៉ុន្តែលោកអះអាងថា សម្រាប់ពេលនេះ រុស្ស៊ីនឹងមិនធ្វើសង្គ្រាមជាមួយតួកគីឡើយរួច ទំនាក់ទំនងជាមួយប្រជាជនតួកគីពុំបានផ្លាស់ប្តូរទេ ។
នៅក្រុងអង់ការ៉ា ប្រធានាធិបតីតួកគី លោករីសេប តៃយីបអ័រដូហ្គាន ក៏អះអាងដែរថា ពិតជាពុំមានចេតនាណាមួយបង្កឱ្យមានភាពធ្ងន់ធ្ងរក្រោយរឿងនេះដែរ រួចនាយករដ្ឋមន្ត្រីតួកគីលោកអាម៉េដ ដាវូទូក្លូ គូសបញ្ជាក់ថា ក្រុងអង់ការ៉ា ជាមិត្ត និងជាអ្នកជិតខាងរបស់រុស្ស៊ី ។
ទន្ទឹមនឹងសេចក្តីថ្លែងការណ៍ទាំងនេះ ដែលសំដៅសម្រាលភាពតានតឹង កងទ័ពអាកាសតួកគីបានពង្រីកការហោះល្បាតជាមួយយន្តហោះ F-16 ដល់ទៅ១៨គ្រឿង តាមព្រំដែនស៊ីរី ក្រោយឧប្បត្តិហេតុនោះមក ។ ចំណែករុស្ស៊ីវិញបានបង្កើនការវាយប្រហារតាមអាកាសលើតំបន់ដែលយន្តហោះខ្លួនត្រូវបាញ់ធ្លាក់ ៕
ចែករំលែកព័តមាននេះ