រាជធានីភ្នំពេញ ៖ តារាសម្តែងថ្មីចាស់ជាច្រើននាក់បានរួមគ្នាសម្តែងក្នុងកម្មវិធី «តន្ត្រីសប្បុរសធម៌» សម្រាប់ប្រមូលប្រាក់យកទៅជួយមន្ទីរពេទ្យគន្ធបុប្ជា ។ កម្មវិធីនោះកាលពីល្ងាចថ្ងៃ២២ វិច្ឆិកាឆ្នាំ២០១៥ នៅភោជនីយដ្ឋានចាយ៉ា ស្ថិតនៅតាមបណ្តោយវិថីត្រសក់ផ្អែម រាជធានីភ្នំពេញ ។
លោកតារា រិទ្ធិ អនុប្រធាននៃកម្មវិធីតន្ត្រីសប្បុរសធម៌បញ្ជាក់ថា នេះជាកម្មវិធីប្រមូលតារាទាំងថ្មីទាំងចាស់ដោយមានបំណងស្វែងរកមូលនិធិជួយដល់មន្ទីរពេទ្យគន្ធបុប្ជា ។ នេះជាលើកទី២ហើយ ដែលលោករិទ្ធិ និងក្រុមការងាររៀបចំកម្មវិធីតន្ត្រីសប្បុរសធម៌ដោយលើកទី១ នៅខេត្តសៀមរាបទទួលបានជោគជ័យមានអ្នកគាំទ្រជួយដល់មូលនិធិច្រើន ។ ក្នុងនាមជាកូនខ្មែរមួយរូប លោករិទ្ធិស្រឡាញ់និងចង់ជួយក្មេងៗទាំងអស់ចូលព្យាបាលក្នុងមន្ទីរពេទ្យគន្ធបុប្ជាដែលកំពុងជួបការខ្វះខាត ។ ដោយទឹកចិត្តបែបនេះហើយទើបខិតខំរកប្រាក់សប្បុរសធម៌ជួយឧបត្ថម្ភដោយលើកទី១បានប្រគល់ប្រាក់ជូនមន្ទីរពេទ្យគន្ធបុប្ជាចំនួនជិត១ពាន់ដុល្លារ ។
តារាសម្តែងលោកម៉ាដូណា ដែលចូលរួមសម្តែងនាឱកាសនោះដែរបានថ្លែងអំណរគុណប្រធានក្រុមអឹម ដែលបង្កើតកម្មវិធីតន្ត្រីសប្បុរសធម៌ឡើងដើម្បីប្រមូលប្រាក់ពីទឹកចិត្តសប្បុរសជនជួយដល់កុមារនៅមន្ទីរពេទ្យគន្ធបុប្ជា ។ នេះជាការជួយដែលកើតចេញពីសិល្បករដោយសម្តែងមិនគិតប្រាក់កម្រៃអ្វីឡើយ ។ អ្នកដែលចូលរួមក្រៅពីសម្តែងលើឆាកហើយនោះបានផ្តល់ប្រាក់តាមសទ្ធាជួយកម្មវិធីផងដែរ ។
លោកទុំ សារុត ហៅនាយឃ្លោករំភើបរីករាយដែលក្រុមអឹមមានទឹកចិត្តស្រឡាញ់កុមារដែលខ្វះខាតប្រាក់ព្យាបាល ពិសេសកុមារក្រីក្រពីតាមជនបទ ។ នេះបញ្ជាក់ថា ក្រុមសិល្បករធ្វើសកម្មភាពល្អក្នុងសង្គម និងទាក់ទាញយុវវ័យទាំងអស់ងាកមកចំណាយពេលជួយសង្គមវិញដោយចៀសឆ្ងាយពីគ្រឿងញៀន និងចៀសផុតពីអំពើខុសឆ្គង ។
លោកទុំ សារុត បានឧបត្ថម្ភប្រាក់ផ្ទាល់ខ្លួនចំនួន១០០ដុល្លារ ដោយយល់ថាជាអ្នកកាន់សាសនាព្រះពុទ្ធការបរិច្ចាគធនធានតិចតួចដល់សង្គមជាកាយវិការមួយល្អបំផុត ។
«កុមារនៅមន្ទីរពេទ្យបង្ហាញថាពិតជាត្រវការយើងទាំងអស់គ្នាជួយ។ កុមារជា«ទំពាំងស្នងឫស្សី» ដូច្នេះត្រូវតែជួយ»។ លោកទុំ សារុត ថ្លែងបែបនេះ ៕
ចែករំលែកព័តមាននេះ