រាជធានីភ្នំពេញ ៖ លោកជា ចំរើន អតីតសមាជិករដ្ឋសភា និងជាអតីតសមាជិកជាន់ខ្ពស់គណបក្សប្រជាជនកម្ពុជា បានប្រកាសក្នុងសន្និសីទកាសែតកាលពីរសៀលថ្ងៃទី២៥វិច្ឆិកានៅសណ្ឋាគារសាន់វេ រាជធានីភ្នំពេញ ពីការបង្កើតគណបក្សថ្មីមួយឈ្មោះថា«គណបក្សកម្ពុជា សេរីភាព» ។
ការប្រកាសបង្កើតគណបក្សនេះបន្ទាប់ពីលោកជា ចំរើន បានលាលែងពីសមាជិកគណបក្សប្រជាជនកម្ពុជា កាលពីថ្ងៃទី១៨ វិច្ឆិកា ឆ្នាំ២០១៥ ។
នៅក្នុងសន្និសីទកាសែតលោកជា ចំរើន បញ្ជាក់ថា «ខ្ញុំនឹងបង្កើតគណបក្សមួយ មានឈ្មោះថា«គណបក្សកម្ពុជា សេរីភាព» ឬអាចដូរឈ្មោះផ្សេងពីឈ្មោះនេះប្រសិនអ្នកគាំទ្រចង់បាន »។ លោកជា ចំរើន មិនទាន់អាចអះអាងថាមានសមាជិកណាខ្លះពីគណបក្សប្រជាជនកម្ពុជា និងគណបក្សសង្គ្រោះជាតិ ចូលរួមជាមួយលោកនៅឡើយទេ ។
គណបក្សប្រជាជនកម្ពុជា បានចេញលិខិតយល់ព្រមតាមការស្នើសុំលាលែងពីសមាជិកគណបក្សរបស់លោកជា ចំរើន កាលពីថ្ងៃទី២០ ខែវិច្ឆិកា ឆ្នាំ២០១៥ ហើយលិខិតនោះលោកបានបង្ហោះតាមហ្វេសប៊ុកនៅព្រឹកថ្ងៃទី២១ វិច្ឆិកា ។
លោកជា ចំរើន បានលើកឡើងថា គណ បក្សរបស់លោកមិនបានយកទុនពីគណបក្សប្រជាជនកម្ពុជា ដូចការគិតរបស់មនុស្សមួយចំនួនទេ ។ ការបង្កើតគណបក្សនៅពេលនេះលោកអាចមានលទ្ធភាពស្រែក ឬធ្វើអ្វីមួយ ជាជាងលោកម្នាក់ឯងមិនអាចធ្វើអ្វីបានទេ ។
គណបក្សរបស់លោកជា ចំរើន មិនទាន់មានស្នាក់ការ និងក្បាលម៉ាស៊ីនជាផ្លូវការនៅឡើយទេ ។ នៅថ្ងៃទី២៥ ខែធ្នូ ឆ្នាំ២០១៥ លោកនឹងបញ្ជូនឯកសារទៅក្រសួងមហាផ្ទៃ ដើម្បីចុះឈ្មោះជាផ្លូវការ ។
លោកជា ចំរើន បានថ្លែងថា គណបក្សរបស់លោកនឹងចូលរួមបោះឆ្នោតជាតិឆ្នាំ២០១៨។ នៅពេលគណបក្សរបស់លោកមានវាសនាដឹកនាំប្រទេស លោកនឹងដោះលែងអ្នកទោសដែលជាប់គុកពីភាពអយុត្តិធម៌ ជាពិសេសបញ្ហាដីធ្លី តែគណបក្សរបស់លោកនឹងមិនធ្វើកិច្ចការងារព្រំដែនទេទុកជូនគណបក្សប្រជាជនកម្ពុជា និងគណបក្សសង្គ្រោះជាតិ ។
លោកជា ចំរើន បញ្ជាក់ថា គណបក្សលោកនឹងចាប់យកយុវជន និស្សិត កម្មករ និងកសិករជាចំណុចសំខាន់ក្នុងការស្វែងរកការងារឲ្យពួកគេធ្វើ ។ នៅពេលនេះប្រទេសកម្ពុជា បានធ្វើសមាហរណកម្មចូលអាស៊ាន ដូចនេះបញ្ហាឥតការងារ និងបញ្ហាប្រាក់ខែកម្មករ និងទីផ្សារផលិតផលកសិកម្ម វាចាំបាច់ដែលគណបក្សរបស់លោកត្រូវដោះស្រាយជាបន្ទាន់ ៕
ចែករំលែកព័តមាននេះ