ប្រមុខការទូតកម្ពុជាលោកឧបនាយករដ្ឋមន្ត្រី ហោ ណាំហុង រដ្ឋមន្ត្រី ក្រសួងការបរទេស និងសហប្រតិបត្តិការអន្តរជាតិ បានឆ្លើយតបនឹងព័ត៌មានដែលចេញផ្សាយ លើសង្គមហ្វេសប៊ុកលោក សម រង្ស៊ី
រាជធានីភ្នំពេញ ៖ ប្រមុខការទូតកម្ពុជាលោកឧបនាយករដ្ឋមន្ត្រី ហោ ណាំហុង រដ្ឋមន្ត្រី ក្រសួងការបរទេស និងសហប្រតិបត្តិការអន្តរជាតិ បានឆ្លើយតបនឹងព័ត៌មានដែលចេញផ្សាយ លើសង្គមហ្វេសប៊ុកលោក សម រង្ស៊ី និងសារព័ត៌មានខេមញូស (Camnews) ពាក់ព័ន្ធនឹងការចេញរបាយការណ៍របស់ស្ថានទូតអាមេរិកប្រចាំនៅកម្ពុជា ។
លោកឧបនាយករដ្ឋមន្ត្រី ហោ ណាំហុងបានសរសេរលើបណ្តាញសង្គមហ្វេសប៊ុកផ្លូវការ ដោយឆ្លើយតបទៅនឹងព័ត៌មានដែលបានដាក់ផ្សាយនៅលើទំព័រហ្វេសប៊ុកលោក សម រង្ស៊ី និង Camnews កាលពីថ្ងៃទី២០ វិច្ឆិកា ពាក់ព័ន្ធនឹងរបាយការណ៍របស់ស្ថានទូតអាមេរិក នៅភ្នំពេញ ដែលចេញផ្សាយពីវីគីលីក (Wikileaks) ខ្ញុំសូមចែករំលែកជាមួយមតិសាធារណៈ នូវលិខិតឆ្លើយឆ្លងរវាងខ្ញុំ និងលោកជំទាវ ហ៊ីលឡារី រូដាម គ្លីនតុន (Hillary Rodham Clinton) ដែលពេលនោះ លោកជំទាវជារដ្ឋមន្ត្រីក្រសួងការបរទេសសហរដ្ឋអាមេរិក បានបញ្ជាក់ថា ៖ «ខ្ញុំបានទទួលដោយការបារម្ភជាខ្លាំង នូវលិខិតរបស់ឯកឧត្តម ចុះថ្ងៃទី១៨ កក្កដា ឆ្នាំ២០១១ ដែលក្នុងនោះឯកឧត្តមបានសម្តែងការមិនសប្បាយចិត្ត ចំពោះការផ្សព្វផ្សាយនូវអ្វីដែលគេអះអាងថា ជាសារទូរលេខស្តីពីការចោទ ប្រកាន់ដោយគ្មានប្រភព និងគ្មានការបញ្ជាក់ ពាក់ព័ន្ធនឹងអតីតកាលរបស់ឯកឧត្តម ។ ខ្ញុំទទួលស្គាល់ពីការឈឺចាប់ ដូចឯកឧត្តមបានលើកឡើង ចំពោះការចេញផ្សាយនេះ ហើយមានការសោកស្តាយដែលវាបានបង្ក ឱ្យមានការខ្វល់ខ្វាយដល់ឯកឧត្តម… យើងថ្កោលទោសចំពោះទង្វើនេះ» ។
កាលពីថ្ងៃទី២០ វិច្ឆិកា លោក សម រង្ស៊ី ប្រធានគណបក្សសង្គ្រោះជាតិ បានសរសេរលើបណ្តាញសង្គមហ្វេសប៊ុករបស់លោកថា កាសែតមួយចំនួន បានសួរខ្ញុំថា តើខ្ញុំយល់ព្រមសូមទោសលោក ហោ ណាំហុង ឬទេ ក្នុងគោលបំណងឱ្យគេឈប់ចោទប្រកាន់ខ្ញុំ ពីបទបរិហាកេរ្តិ៍នេះ ។ ចម្លើយខ្ញុំដែលបានចុះផ្សាយក្នុងកាសែត ខេមបូឌាដេលី និងភ្នំពេញប៉ុស្តិ៍ ថ្ងៃនេះ មានដូចតទៅ ៖ «លោក ហោ ណាំហុង ទេ ដែលត្រូវសូមទោសដួងវិញ្ញាណក្ខន្ធ និងក្រុមគ្រួសារជនរងគ្រោះ ដែលត្រូវពួកខ្មែរក្រហមសម្លាប់ បន្ទាប់ពីយកចេញពីគុកបឹងត្របែក នៅចុងទសវត្សឆ្នាំ១៩៧០ ដោយសារតែលោក ហោ ណាំហុង នេះ បានចូលដៃជាមួយពួកខ្មែរក្រហម ហើយបានមួលបង្កាច់ជនស្លូតត្រង់ ដើម្បីយកចិត្តពួកខ្មែរក្រហម ឱ្យរួចខ្លួនចំពោះរូបគាត់ (ហោ ណាំហុង ហៅមិត្តយ៉ែម) និងក្រុមគ្រួសារគាត់» ។
ម្យ៉ាងវិញទៀត មានឯកសារផ្ទៃក្នុងមកពីស្ថានទូតសហរដ្ឋអាមេរិក ប្រចាំប្រទេសកម្ពុជា ដែលទើបតែបានបញ្ចេញជាសាធារណៈ ហើយដែលមានខ្លឹមសារដូចតទៅ ៖ «ហោ ណាំហុង បានវិលត្រឡប់មកប្រទេសកម្ពុជាវិញ បន្ទាប់ពីពួកខ្មែរក្រហមឡើងកាន់អំណាច តែគាត់បានរួចពីការស្លាប់ ពីព្រោះគាត់ធ្លាប់បានរៀនសូត្រ ជាមួយ អៀង សារី ។ គាត់បានក្លាយទៅជាមេជំរំ (គុក) បឹងត្របែក ហើយគាត់ព្រមទាំងភរិយាគាត់ បានសហការជាមួយពួកខ្មែរក្រហម ក្នុងការសម្លាប់មនុស្សជាច្រើន ដែលជាប់ឃុំឃាំងនៅទីនោះ» ។
យោងតាមលិខិតរបស់លោកស្រី ហ៊ីលឡារី រូដាម គ្លីនតុន (Hillary Rodham Clinton) ដែលពេលនោះលោកស្រី ជារដ្ឋមន្ត្រីក្រសួងការបរទេសសហរដ្ឋអាមេរិក (បកប្រែក្រៅផ្លូវការ) បានលើកឡើងថា ជាកត់សម្គាល់យ៉ាងត្រឹមត្រូវ ក្រសួងការបរទេសសហរដ្ឋអាមេរិក មិនបញ្ចេញមតិអ្វីទេ អំពីភាពពិតប្រាកដត្រឹមត្រូវនៃឯកសារដែលបានលេចចេញនេះ ។ ទោះជាយ៉ាងណាក្តី ខ្ញុំសូមបញ្ជាក់ជូនច្បាស់ថា រដ្ឋាភិបាលអាមេរិកមានការសោកស្តាយយ៉ាងជ្រាលជ្រៅ ចំពោះការចេញនូវរាល់ព័ត៌មានណា ដែលត្រូវរក្សាការសម្ងាត់ ។ ការបញ្ចេញផ្សាយដោយ វីគីលីក(Wikileaks) នូវព័ត៌មានសម្ងាត់ គឺជាទង្វើគ្មានការទទួលខុសត្រូវ និងជាការប៉ុនប៉ងខុសច្បាប់ ដើម្បីបង្កភាពច្របូកច្របល់ និងធ្វើឲ្យរង្គោះរង្គើដល់សន្តិសុខពិភពលោក ។ យើងថ្កោលទោសចំពោះទង្វើនេះ ។
ក្នុងលិខិត លោកស្រីបញ្ជាក់ថា «ខ្ញុំមិនអាចបញ្ចេញមតិបាន ទៅលើឯកសារណាមួយដែលចុះតាមបណ្តាញព័ត៌មាន ហើយត្រូវគេអះអាងថា មានប្រភពពីក្រសួងការបរទេសសហរដ្ឋអាមេរិក ។ ជាការធម្មតាណាស់ សេចក្តីរាយការណ៍ពីមូលដ្ឋាន ទៅទីក្រុងវ៉ាស៊ីតោនមានលក្ខណៈបឋម និងនិយាយត្រង់ៗ ហើយជាទូទៅ មានជាព័ត៌មានដើម និងការកត់សម្គាល់មិនគ្រប់ជ្រុងជ្រោយ ។ ការវិភាគដែលលើកឡើងក្នុងទូរលេខ ក៏ប្រហែលជាខុសបរិបទ ឬហួសសម័យ» ៕
ចែករំលែកព័តមាននេះ