ខេត្តឧត្តរមានជ័យ ៖ បុរស២នាក់ត្រូវបានកងកម្លាំងឯកភាពស្រុកអន្លង់វែងធ្វើការឃាត់ខ្លួនដោយជាប់ពាក់ព័ន្ធនឹងគ្រឿងញៀន ខណៈពេលកម្លាំងចុះត្រួតពិនិត្យអាវុធជាតិផ្ទុះតាមដងផ្លូវជាតិកាលពីវេលាម៉ោង៩យប់ ថ្ងៃទី២៣ វិច្ឆិកា ២០១៥ ស្ថិតក្នុងភូមិស្លែងព័រ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ។
លោកអនុសេនីយ៍ឯក ទុយ ហុងលី ប៉េអឹមស្រុកអន្លង់វែង បានឲ្យដឹងថា កម្លាំងឯកភាពស្រុកបានចុះធ្វើការត្រួតពិនិត្យអាវុធជាតិផ្ទុះដែលស្ថិតនៅតាមដងផ្លូវជាតិមាន២ គោលដៅទី១ដាក់ក្នុងភូមិអូរចិញ្ជៀន ឃុំអន្លង់វែង, ទី២ ដាក់ក្នុងភូមិស្លែងព័រ ឃុំត្រពាំងតាវ សមត្តកិច្ចដកហូតបានស្លាក់លេខ ខ.ម ដោយមិនស្របច្បាប់បានមួយចំនួន ។
លោកបានបន្តថា បន្ទាប់មកសមត្ថកិច្ចមានការសង្ស័យ ហើយបានឆែកឆេរឃើញគ្រឿងញៀន១៣កញ្ចប់តូចជាម្សៅពណ៌ស នៅនឹងម៉ូតូសមត្ថកិច្ចបានឃាត់ខ្លួនបុរស២នាក់ ១-ឈ្មោះ ឡាត ធឿន ភេទប្រុស អាយុ៣៣ឆ្នាំ រស់នៅភូមិស្លែងព័រ ឃុំត្រពាំងតាវ ស្រុកអន្លង់វែង និង ២-ឈ្មោះ ហាន ហួ ភេទប្រុស អាយុ២០ឆ្នាំ រស់នៅភូមិទួលប្រាសាទ ឃុំស្រុកជាមួយជនសង្ស័យខាងលើ ។
លោកបានបញ្ចាក់ថា ជនសង្ស័យទាំង២នាក់កម្លាំងឯកភាពបានប្រគល់ទៅឲ្យសមត្តកិច្ចប៉ូលិសអធិការដ្ឋានស្រុកអន្លង់វែង សាកសួរចម្លើយ និងកសាងសំណុំរឿងជនសង្ស័យ រួមទាំងវត្ថុតាងបញ្ជូនទៅតុលាការអមសាលាដំបូងខេត្តឧត្តរមានជ័យចាត់ការតាមនិតិវិធីច្បាប់ ៕
ចែករំលែកព័តមាននេះ