ខេត្តកំពង់ធំ ៖ បុរសម្នាក់ត្រូវប្រពន្ធខាំដាច់លិង្គពាក់កណ្ដាលដោយមិនដឹងមូល ខណៈកំពុងដេកលង់លក់កាលពីយប់ថ្ងៃទី១៩ វិច្ឆិកា ២០១៥ នៅលើផ្ទះរបស់ខ្លួននៅភូមិស៊ីវត្ថា ឃុំប្រាសាទ ស្រុកសន្ទុក ខេត្តកំពង់ធំ ។
ប្រភពបានឲ្យដឹងថា ជនរងគ្រោះជាប្តីដែលត្រូវប្រពន្ធខាំដាច់លិង្គពាក់កណ្ដាលឈ្មោះ ប៉ាន់ សេង អាយុ៣២ឆ្នាំ ចំណែកប្រពន្ធដែលខាំលិង្គប្តីឈ្មោះ យិម ឈ័ន អាយុ២៨ឆ្នាំ ។ ទាំង២នាក់មានកូនស្រីម្នាក់អាយុ៦ឆ្នាំ ។
ប្រភពពីបុរសជាប្តីដែលកំពុងសម្រាកព្យាបាលនៅមន្ទីរពេទ្យបានឲ្យដឹងថា មុនពេលកើតហេតុលោកនិងប្រពន្ធកូនរបស់លោកបានពិសាបាយល្ងាច រួចនាំគ្នាចូលសម្រាន្តដូចសព្វមួយដង ខណៈកំពុងដេកលង់លក់ស្កប់ស្កល់ស្រាប់តែប្រពន្ធរបស់គាត់បានខាំលិង្គរបស់គាត់យ៉ាងខ្លាំង ធ្វើឲ្យគាត់ឈឺចុកចាប់រហូតដល់ថ្នាក់រកអ្វីថ្លែងមិនបាន ក៏សម្រេចចិត្តទះកំភ្លៀងប្រពន្ធដើម្បីឲ្យប្រពន្ធលែង តែទោះជាយ៉ាងណាប្រពន្ធរបស់គាត់មិនព្រមលែងសោះ គឺខាំរហូតដាច់ពាក់កណ្ដាលតែម្តង ។ បន្ទាប់មកក៏ត្រូវបងប្អូន និងជិតខាងដឹកយកមកព្យាបាលនៅមន្ទីរពេទ្យតែម្តង ។
បុរសជាប្តីបានបន្តទៀតថា លោកមិនដឹងថា ហេតុអ្វីបានជាប្រពន្ធរបស់គាត់ខាំលិង្គរបស់គាត់រហូតដាច់ពាក់កណ្ដាលបែបនេះទេ ។
ប្រភពពីអ្នកភូមិដែលជិតផ្ទះជនរងគ្រោះបានឲ្យដឹងថា មួយរយៈចុងក្រោយមុនពេលមានហេតុការណ៍ខាំលិង្គប្តីរហូតដាច់ពាក់កណ្ដាលនេះ ស្ត្រីជាប្រពន្ធដូចជាប្លែកៗម៉េចមិនដឹងទេ មើលទៅហាក់ដូចជាមានអ្វីចូលខ្លួនអ៊ីចឹង ៕
ចែករំលែកព័តមាននេះ