រាជធានីភ្នំពេញ ៖ មន្ត្រីសាលារាជធានីភ្នំពេញបានឲ្យដឹងថា នៅវេលាម៉ោង៧ព្រឹក ថ្ងៃទី២១ វិច្ឆិកា ស្អែកនេះ លោកប៉ា សុជាតិវង្ស អភិបាលរាជធានីភ្នំពេញ រួមជាមួយព្រះសង្ឃ មន្ត្រីក្រោមឱវាទសាលារាជធានី
រាជធានីភ្នំពេញ ៖ មន្ត្រីសាលារាជធានីភ្នំពេញបានឲ្យដឹងថា នៅវេលាម៉ោង៧ព្រឹក ថ្ងៃទី២១ វិច្ឆិកា ស្អែកនេះ លោកប៉ា សុជាតិវង្ស អភិបាលរាជធានីភ្នំពេញ រួមជាមួយព្រះសង្ឃ មន្ត្រីក្រោមឱវាទសាលារាជធានីភ្នំពេញ យុវជន និងប្រជាពលរដ្ឋប្រមាណ២០០នាក់នឹងធ្វើពិធីប្រោះព្រំ ដាក់ឲ្យប្រើប្រាស់បណ្តោះអាសន្នស្ពានអាកាស និងផ្លូវក្រោមដីតិចណូចាប់ពីពេលនេះតទៅ ។
មន្ត្រីដដែលបានបញ្ជាក់ថា នៅព្រឹកថ្ងៃទី២០ វិច្ឆិកា ២០១៥នេះ ការដ្ឋានស្ពានអាកាស និងផ្លូវក្រោមដីតិចណូ ក្រុមការងារបាននិងកំពុងអ៊ុតកៅស៊ូផ្លូវពង្រីកមហាវិថីសហព័ន្ឋរុស្ស៊ីបន្តពីច្រកចេញផ្លូវក្រោមដីទៅទិសភ្លើងស្តុបនាគវ័ន្ត ដែលមានប្រវែង១៦០ម៉ែត្រ និងទទឹងពី១.៥ម៉ែត្រទៅ២ម៉ែត្រ ។
លោកសាំ ពិសិដ្ឋ នាយកមន្ទីរសាធារណការរាជធានីភ្នំពេញបានឲ្យដឹងថា ការស្ថាបនាស្ពានអាកាស និងផ្លូវក្រោមដីតិចណូ រហូតមកដល់ពេលនេះបាន៩៥%ហើយ ហើយការងារដែលនៅសេសសល់មានលាបគំនូសចរាចរ ស្លាកសញ្ញាចរាចរ ការពង្រីកផ្លូវ ជាប់អាងផ្លូវក្រោមដី ការដំឡើងភ្លើងស្តុបក្រោមស្ពាន តែការងារនេះបាននិងកំពុងធ្វើបានមួយចំនួនហើយ មានន័យថា ប្រជាពលរដ្ឋអាចធ្វើដំណើរបានដោយស្រួលចាប់ពីថ្ងៃទី២១ វិច្ឆិកានេះ តទៅ ។
លោកបានបញ្ជាក់ថា ចំពោះការងារដែលនៅសល់ ក្រុមការងារនឹងបន្តធ្វើមិនមានការរាំងស្ទះដល់ការធ្វើចរាចររបស់ប្រជាពលរដ្ឋឡើយ ហើយការងារជារួមគ្រោងបញ្ចប់នៅដើមខែធ្នូនេះ ៕
ចែករំលែកព័តមាននេះ