ខេត្តកណ្តាល ៖ ដល់ម៉ោងបិទអកកេះតែអ្នករាំមិនទាន់អស់ចិត្តសូមឱ្យលេងបន្ត៤-៥បទទៀតមិនព្រម ក៏នាំគ្នាស្រែកឡូឡាឌឺដងពាក្យសម្តីដាក់ក្រុមអ្នកភ្លេងពីសំណាក់ក្រុមអ្នករាំ ធ្វើឱ្យកូនម្ចាស់អកកេះខឹងដកកាំភ្លើងខ្លីពីចង្កេះបាញ់ឡើងលើ១គ្រាប់ហើយអាម៉េបម្រុងបាញ់ទៀតតែបាញ់អត់ចេញ ក៏ត្រូវកូនម្ចាស់ដើមការដែលជាមន្ត្រីប៉ូលិសប៉ុស្តិ៍មូលដ្ឋាន ស្ទុះទៅចាប់ដកកាំភ្លើងពីដៃយកទៅប្តឹងមេប៉ុស្តិ៍ ។ បន្ទាប់ពីកូនម្ចាស់ដើមការចាប់ដកយកកាំភ្លើងទៅប្តឹងមេប៉ុស្តិ៍ ម្ចាស់អកកេះ និងកូនប្រុសដែលជាម្ចាស់កាំភ្លើងបានដើរចេញមកថ្នល់ជាតិក្រៅរោងការ ក៏ត្រូវក្មេងស្ទាវព្រួតគ្នាវាយបណ្តាលឱ្យរបួសធ្ងន់ទាំង២នាក់ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១១ និង៤០នាទីយប់ ថ្ងៃទី១៥ វិច្ឆិកា ២០១៥ ស្ថិតក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល ។
ជនរងគ្រោះទាំង២នាក់ឪពុកនិងកូន មានឈ្មោះ លី ម៉ន ភេទប្រុស អាយុ៥៨ឆ្នាំ ជនជាតិខ្មែរ ជាថៅកែអកកេះ បានរងរបួសធ្ងន់ផ្នែកក្បាល ត្រូវក្រុមគ្រួសារដឹកយកទៅសង្គ្រោះនៅប្រទេសវៀតណាម និងម្នាក់ទៀតជាកូនឈ្មោះ លី ម៉េង ភេទប្រុស អាយុប្រហែលជាង៣០ឆ្នាំ ជនជាតិខ្មែរ មុខងារជាមន្ត្រីប៉េអឹមលើផ្ទៃប្រទេស ប្រើប្រាស់អាវុធខ្លីម៉ាក៥៤ ផលិតនៅប្រទេសចិន គ្មានលេខ នៅសល់ក្នុងបង់៦គ្រាប់ បានរងរបួសធ្ងន់ផ្នែកក្បាល និងដៃ ត្រូវក្រុមគ្រួសារដឹកយកទៅសង្គ្រោះនៅមន្ទីរពេទ្យរាជធានីភ្នំពេញ ។ ជនរងគ្រោះទាំង២នាក់មានស្រុកកំណើតនៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល ។
បើតាមប្រភពព័ត៌មានពីឈ្មោះ ផាត វុទ្ធី ភេទប្រុស អាយុ៣៤ឆ្នាំ ជនជាតិខ្មែរ មុខងារជាមន្ត្រីប៉ូលិសប៉ុស្តិ៍បន្ទាយដែក ត្រូវជាបងប្រុសបង្កើតកូនកម្លោះ រស់នៅភូមិ-ឃុំខាងលើ និងជាអ្នកចាប់ដកយកកាំភ្លើងពីជនរងគ្រោះបាននិយាយថា នៅថ្ងៃខែឆ្នាំខាងលើ ផ្ទះរបស់គាត់បានរៀបមង្គលការប្អូនបង្កើត ហើយបានជួលតន្ត្រីអកកេះរបស់ឈ្មោះ លី ម៉ន ពីកោះធំមកប្រគំកំដរភ្ញៀវពេលស៊ី និងរាំលេងសប្បាយ ។ រហូតដល់វេលាម៉ោងជាង១១យប់ ក្រុមអកកេះក៏បិទ ប៉ុន្តែក្រុមអ្នករាំចាស់ក្មេងសូមសំណូមពរឱ្យលេង៤-៥បទទៀត តែក្រុមភ្លេងអត់លេងទេ ហើយនិយាយថា បើលេងទៀតសុំលុយថែម ខណៈនោះក្រុមអ្នករាំចាស់ក្មេងក៏ស្រែកឡូឡាឌឺដងដាក់អ្នកលេងអកកេះធ្វើឱ្យកូនថៅកែអកកេះឈ្មោះ លី ម៉េង ដែលជាមន្ត្រីអាវុធហត្ថលើផ្ទៃប្រទេសខឹង បានកាំភ្លើងពីចង្កេះបាញ់ឡើងលើ១គ្រាប់បណ្តាលឱ្យធ្លុះតង់រោង ហើយអាម៉េកាំភ្លើងបម្រុងបាញ់ទៀត តែបាញ់មិនចេញ ក៏ត្រូវខ្លួន(ឈ្មោះផាត វុទ្ធី)ស្ទុះទៅចាប់ដកយកកាំភ្លើង ព្រោះខ្លាចមានគ្រោះថ្នាក់ដល់មនុស្ស ។
ប្រភពបន្តថា ក្រោយដកយកកាំភ្លើងពីឈ្មោះ លី ម៉េង បានហើយគាត់ក៏ឃាត់អ្នករាំទាំងនោះឱ្យឈប់មាត់ ព្រោះដល់ម៉ោងគេបិទហើយ នាំគ្នាទៅផ្ទះទៅ ប៉ុន្តែពួកគេមិនស្តាប់ទេ ។ ដោយមើលឃើញសភាពការណ៍មិនស្រួល ក៏រាយការណ៍ប្រាប់នាយប៉ុស្តិ៍របស់ខ្លួន ។ ខណៈសភាពការណ៍កំពុងច្របូកច្របល់មនុស្សក្មេងចាស់មកកាន់តែច្រើន ស្រាប់តែម្ចាស់អកកេះ២នាក់ឪពុកនិងកូននាំគ្នាដើរឡើងមកលើថ្នល់ជាតិក្រៅរោងការទីកន្លែងងងឹត ក៏ត្រូវក្រុមជនមិនស្គាល់មុខព្រួតគ្នាវាយឱ្យរបួសធ្ងន់តែម្តង ។
ពាក់ព័ន្ធករណីខាងលើនេះ លោកអនុសេនីយ៍ឯក វង សែ អធិការរងនគរបាលស្រុកកៀនស្វាយ ទទួលបន្ទុកផ្នែកព្រហ្មទណ្ឌបានឱ្យដឹងថា ករណីនេះរូបលោកទទួលបានតែពាក្យបណ្តឹងប្រើប្រាស់អាវុធ និងផ្ទុះអាវុធពេលយប់បង្កការភ្ញាក់ផ្អើលទេ ចំណែកករណីបង្ករបួសស្នាមភាគីរងគ្រោះគេប្តឹងទៅប៉េអឹមជាអ្នកធ្វើ ។
ទោះយ៉ាងណានៅព្រឹកថ្ងៃទី១៦ វិច្ឆិកា គេឃើញមានកម្លាំងប៉េអឹមស្រុក-ខេត្តជាច្រើននាក់ដឹកនាំដោយលោក ហេង ផេង ចុះមកអញ្ជើញម្ចាស់ដើមការចំនួន៣នាក់យកទៅសួរនាំនៅរាជអាវុធហត្ថស្រុក ដើម្បីស្រាវជ្រាវស្វែងរកចាប់ខ្លួនជនដៃដល់យកមកផ្តន្ទាទោសតាមនីតិវិធីច្បាប់ ៕
ចែករំលែកព័តមាននេះ