រាជធានីភ្នំពេញ ៖ ស្ត្រីម្នាក់ ត្រូវប្តីកំណាចវាយសម្លា.ប់យកសពទៅដាក់ក្នុងពាងរួចចាក់សាំង និងកង់រថយន្ត ម៉ូតូដុត ព្រោះតែប្រចណ្ឌខឹងប្រពន្ធចង់ទៅរួមរស់ជាមួយបុរសជាប្តីមុនវិញ
រាជធានីភ្នំពេញ ៖ ស្ត្រីម្នាក់ ត្រូវប្តីកំណាចវាយសម្លាប់យកសពទៅដាក់ក្នុងពាងរួចចាក់សាំង និងកង់រថយន្ត ម៉ូតូដុត ព្រោះតែកើតរោគប្រចណ្ឌខឹងប្រពន្ធចង់ទៅរួមរស់ជាមួយបុរសជាប្តីមុនវិញ ដែលករណីនេះបានកើតឡើងកាលពីវេលាម៉ោង៩យប់ថ្ងៃទី១៣ វិច្ឆិកា ប៉ុន្តែធ្វើឲ្យប្រជាពលរដ្ឋមានការភ្ញាក់ផ្អើលកាលពីព្រឹកថ្ងៃទី១៤ វិច្ឆិកា នៅផ្ទះមួយកន្លែង ស្ថិតក្នុងភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ ។
លោក ម៉ក់ ហុង អធិការខណ្ឌសែនសុខ បានបញ្ជាក់ថា ស្ត្រីរងគ្រោះ ឈ្មោះ ទឹម សោភា អាយុ៣៤ឆ្នាំ ចំណែកប្តីចិត្តកំណាចឃោរឃៅជាជនសង្ស័យ ឈ្មោះ សុង ទូច អាយុ៤៨ឆ្នាំ ជាមន្ត្រីយោធា ក្រោយពីធ្វើសកម្មភាពបានរត់គេចខ្លួនបាត់ស្រមោល ។
លោក ម៉ក់ ហុង បានបន្តថា បើតាមអ្នកជិតខាងបានឱ្យដឹងថា នៅយប់មុនពេលកើតហេតុនោះ គេឮប្តីប្រពន្ធទាំងពីរនាក់ខាងលើនេះ បានឈ្លោះប្រកែកគ្នាយ៉ាងខ្លាំង ក្រោយមកក៏ឃើញបុរសជាប្តីដើរចេញមកខាងក្រៅ ដោយប្រាប់អ្នកជិតខាងថា គេសម្លាប់ប្រពន្ធបាត់ទៅហើយ ពេលនោះ អ្នកជិតខាងមិនចាប់អារម្មណ៍ឡើយដោយនឹកស្មានថានិយាយលេង ។ បន្ទាប់មកនៅម៉ោង៩យប់ថ្ងៃទី១៣ វិច្ឆិកា ដោយមានការសង្ស័យដូចជាដុតអ្វីម្យ៉ាងនៅក្នុងពាងនៃបរិវេណផ្ទះនោះ ក៏បានហៅសមត្ថកិច្ចមកជួយអន្តរាគមន៍ ព្រោះខ្លាចមានអគ្គិភ័យឆាបឆេះ ពេលសមត្ថកិច្ចមកដល់ ប៉ុន្តែទ្វារផ្ទះត្រូវបានចាក់សោបិទជិត ដូច្នេះសមត្ថកិច្ចមិនអាចចូលទៅក្នុងផ្ទះបានទេ បានត្រឹមតែឃ្លាំមើលអស់មួយយប់ ។ លុះព្រឹកឡើងថ្ងៃទី១៤ វិច្ឆិកា សមត្ថកិច្ចសុំដីកាពីព្រះរាជអាជ្ញាដើម្បីកាត់សោផ្ទះត្រួតពិនិត្យ ស្រាប់តែឃើញមានឆ្អឹងមនុស្សនៅក្នុងពាងដែលដុតនោះ ។
ទោះបីជាយ៉ាងណាក៏ដោយ មកទល់ពេលនេះ សមត្ថកិច្ចបាននិងកំពុងធ្វើការស៊ើបអង្កេត និងស្រាវជ្រាវស្វែងរកចាប់ជនសង្ស័យ ដើម្បីយកមកផ្តន្ទាទោសតាមច្បាប់ ៕
ចែករំលែកព័តមាននេះ