ខេត្តកំពង់ធំ ៖ ស្ទឹងជីនិតគឺជាស្ទឹងមួយដ៏ស្រស់ស្អាតខណ្ឌចែកព្រំប្រទល់រវាងស្រុកសន្ទុក និងស្រុកបារាយណ៍ នៃទឹកដីខេត្តកំពង់ធំ ដែលមានទឹកថ្លាដូចកញ្ចក់គួរជាទីគយគន់ និងចង់ងូតលេងកំសាន្តរបស់មនុស្ស និងសត្វពាហនៈ ។
ខេត្តកំពង់ធំ ៖ ស្ទឹងជីនិតគឺជាស្ទឹងមួយដ៏ស្រស់ស្អាតខណ្ឌចែកព្រំប្រទល់រវាងស្រុកសន្ទុក និងស្រុកបារាយណ៍ នៃទឹកដីខេត្តកំពង់ធំ ដែលមានទឹកថ្លាដូចកញ្ចក់គួរជាទីគយគន់ និងចង់ងូតលេងកំសាន្តរបស់មនុស្ស និងសត្វពាហនៈ ។ ប៉ុន្តែបច្ចុប្បន្ននេះស្ទឹងដ៏ស្រស់ស្អាតនេះកំពុងរងនូវភាពអាប់អួរ បំពុលដល់បរិស្ថានយ៉ាងខ្លាំង ដោយសារតែប្រជាពលរដ្ឋ និងអាជីវករស្រុកសន្ទុក និងស្រុកបារាយណ៍ ខ្វះការពិចារណាឲ្យបានវែងឆ្ងាយ បាននាំគ្នាយកសំរាមទៅចាក់ និងគ្រវែងចោលចូលទៅក្នុងទឹកស្ទឹងជីនិតនេះ បំពុលដល់បរិស្ថាន បង្កផលប៉ះពាល់ដល់មនុស្ស សត្វ និងរុក្ខជាតិ ចំណែកអាជ្ញាធរឃុំ ស្រុក ការិយាល័យជំនាញបរិស្ថាន ដោះសារយករួចខ្លួនរៀងៗខ្លួន ។
ជុំវិញបញ្ហានេះ លោក ឆេង សាវុន ប្រធានការិយាល័យបរិស្ថានស្រុកសន្ទុក និងលោក ជា ផាង ប្រធានការិយាល័យបរិស្ថានស្រុកបារាយណ៍ បានប្រាប់អ្នកសារព័ត៌មានយើងនៅរសៀលថ្ងៃទី១១ ខែវិច្ឆិកា ឆ្នាំ២០១៥ ស្រដៀងគ្នាថា កន្លងមកលោកបានសហការជាមួយនិងលោកមេឃុំ ចុះធ្វើការណែនាំដល់ប្រជាពលរដ្ឋ និងអាជីវករ សូមកុំឲ្យនាំគ្នាយកសំរាមទៅចោលក្នុងស្ទឹង និងបានដាក់បំរាមនៅទីនោះទៀត ក៏ប៉ុន្តែពួកគាត់នៅតែយកទៅចោលក្នុងស្ទឹងដដែល ហើយបច្ចុប្បន្ននេះស្រុកក៏មិនទាន់មានក្រុមហ៊ុនប្រមូលសំរាមនៅឡើយ បានជាមានការលំបាកយ៉ាងដូច្នេះ ។
ចំណែកលោក ពេជ្រ សុធា អភិបាលស្រុកសន្ទុក បានប្រាប់ថា កន្លងមកអាជ្ញាធរបានណែនាំដែរ តែប្រជាពលរដ្ឋ និងអាជីវករនៅតែមិនព្រមស្តាប់ លោកនឹងចាត់ឲ្យមន្ត្រីជំនាញចុះពិនិត្យមើលពីបញ្ហានេះ និងពន្យល់ដល់គាត់បន្ថែមទៀត ។
លោក តុប កក្កដា ប្រធានមន្ទីរបរិស្ថានខេត្ត បានឲ្យដឹងពាក់ព័ន្ធនឹងបញ្ហានេះដែរថា រឿងសំរាមនេះវាពិតជាស្មុគស្មាញណាស់ ទាល់តែប្រជាពលរដ្ឋលោកយល់ដឹង និងចូលរួមសហការទាំងអស់គ្នាជាមួយអាជ្ញាធរ ព្រមទាំងការិយាល័យជំនាញផងដែរ ទើបមានប្រសិទ្ធភាព បើរង់ចាំតែមន្ទីរបរិស្ថានមួយគឺមិនអាចទៅរួចនោះទេ ពីព្រោះតែភាស៊ីបង់ថវិកាឲ្យអាជ្ញាធរ ចំណែកខាងមន្ទីរមានតែកម្លាំងតិចតួច ហើយគ្មានថវិកាផងនោះ បានអ្វីយកទៅធ្វើ សំខាន់គឺប្រជាពលរដ្ឋលោកយល់អំពីគុណប្រយោជន៍នៃបរិស្ថាន ហើយក្រសួងទើបតែមានកញ្ចប់ថវិកាសម្រាប់អនាម័យក្រុងស្ទឹងសែននៅឆ្នាំ២០១៥នេះ បើការអនុវត្តទៅមានប្រសិទ្ធភាពនោះ ក្រសួងនឹងទម្លាក់ថវិកាសម្រាប់ស្រុកណាដែលមានប្រជាពលរដ្ឋជាបន្តទៀត ។ ចំពោះសំរាមខាងលើនេះលោកនឹងឲ្យមន្ត្រីរបស់សហការជាមួយអាជ្ញាធរចាត់វិធានការ ហើយស្រុកទាំង២នេះនៅឆ្នាំ២០១៦ និងមានកន្លែងសម្រាប់ចាក់សំរាមហើយ ៕
ចែករំលែកព័តមាននេះ