ខេត្តរតនគិរី ៖ ម៉ូតូដឹកឈើប្រណីតប្រភេទធ្នង់រាប់រយគ្រឿងដែលសមត្ថកិច្ចគ្រប់លំដាប់ថ្នាក់ក្នុងស្រុកអណ្តូងមាស ពិសេសជំនាញរដ្ឋបាលព្រៃឈើបានអនុញ្ញាតឱ្យសម្រុកដឹកជញ្ជូនយកទៅលក់នៅប្រទេសវៀតណាមតាមច្រករបៀងមួយចំនួនដូចជាច្រកផាសតាម ហៅច្រកអូរសាថី, ច្រកតាង៉ា និងច្រកភូមិចង ស្ថិតក្នុងឃុំញ៉ាង ស្រុកអណ្តូងមាស ខេត្តរតនគិរី ។
ជាក់ស្តែងនៅវេលាទៀបភ្លឺព្រឹកថ្ងៃទី៩ វិច្ឆិកា ២០១៥នេះ មានម៉ូតូដឹកឈើមិនក្រោម២០០គ្រឿងឡើយ ដែលសម្រុកដឹកឡើងលើភ្នំញ៉ាង មានទាំងមនុស្សស្រីនិងមនុស្សប្រុសជាអ្នកបើកបរម៉ូតូ ដឹកឈើប្រណីតចេញពីបណ្តាស្រុកមួយចំនួនដូចជាស្រុកវ៉ើនសៃ, ស្រុកអូរជុំ និងស្រុកតាវែង ហើយត្រូវដឹកជញ្ជូនឆ្លងកាត់ដីសម្បទានសេដ្ឋកិច្ចចំការកៅស៊ូក្រុមហ៊ុន ហេង ប្រាឌ័រ និងក្រុមហ៊ុន ហ៊ង អាងម៉ាងយ៉ាង អណ្តូងមាស បន្ទាប់មកចូលទីរួមស្រុកអណ្តូងមាស ឆ្លងកាត់តាមមុខទីបញ្ជាការដ្ឋានកងរាជអាវុធហត្ថស្រុក, អធិការដ្ឋានស្រុក, សិករងស្រុក និងសាលាស្រុកអណ្តូងមាសផងដែរ ហើយឆ្លងតាមសាឡាងបន្តទៀតឆ្ពោះទៅភ្នំញ៉ាង ដោយមិនដែលឃើញមានសមត្ថកិច្ចណាមួយហ៊ានបង្ក្រាបឡើយ ។
យោងតាមប្រភពពីអ្នកដឹកឈើតាមម៉ូតូនោះបានប្រាប់ថា ពេលដឹកជញ្ជូនឈើឆ្លងកាត់ក្រុមហ៊ុនដីសម្បទានខាងលើនោះមានសមត្ថកិច្ចជាច្រើនស្ថាប័ន រួមមាននគបាលប្រឆាំងបទល្មើសសេដ្ឋកិច្ចខេត្ត ក្រសួងមហាផ្ទៃ, កងរាជអាវុធហត្ថ និងយោធា ជាពិសេសរដ្ឋបាលព្រៃឈើចាំទារលុយពីអ្នកដឹកឈើទាំងអស់នោះ ហើយរួមទាំងអ្នកកាសែត និងអង្គការជជុះជាច្រើនទៀតផងដែរ ។
ប្រជាពលរដ្ឋបានធ្វើការរិះគន់ត្រង់ៗថា នៅក្នុងខេត្តរតនគិរីនេះ គេតែងតែសង្កេតឃើញសមត្ថកិច្ចបង្ក្រាបបានតែបទល្មើសដឹកជញ្ជូនឈើតាមរថយន្តណាដែលខូច ដូចជាបែកកង់ ឬក្រឡាប់ទៅមុខលែងរួច និងរថយន្ត ឬម៉ូតូណាដែលមិនបានបង់លុយ ឬបង់មិនគ្រប់ចំនួនកំណត់ឱ្យប៉ុណ្ណោះ ។ ដូចដែលការដឹកជញ្ជូនតាមម៉ូតូយ៉ាងច្រើនត្រៀបត្រាកកកុញនៅជើងភ្នំញ៉ាងនាព្រឹកថ្ងៃទី៩វិច្ឆិការនេះ ក៏មិនមានការបង្ក្រាបពីសមត្ថកិច្ចនោះឡើយដោយសាតែមានការបង់លុយឱ្យគ្រប់ចំនួនអស់ហើយ ទើបដំណើការបានយ៉ាងរលូនបែបនេះ ។
ទាក់ទិននិងករណីខាងលើនេះ ភ្នាក់ងារ«កោះសន្តិភាព» មិនអាចសុំការបំភ្លឺពីសមត្ថកិច្ចណាមួយបានទេនៅព្រឹកថ្ងៃទី៩វិច្ឆិកានេះ ៕
ចែករំលែកព័តមាននេះ