ខេត្តកំពង់ចាម ៖ ដោយមើលឃើញគ្រោះថ្នាក់ចរាចរណ៍បានកើតឡើងបណ្តាលឲ្យមានមនុស្សស្លា.ប់ជាបន្តបន្ទាប់បង្កក្តីព្រួយបារម្ភនោះ ទើបក្រុមយុវជនកាកបាទក្រហមនិងក្រុមអ្នកស្ម័គ្រចិត្តចំនួន៣២នាក់ ព្រមទាំងកម្លាំងនគរបាលចរាចរចំនួន១៤រូប
ខេត្តកំពង់ចាម ៖ ដោយមើលឃើញគ្រោះថ្នាក់ចរាចរណ៍បានកើតឡើងបណ្តាលឲ្យមានមនុស្សស្លាប់ជាបន្តបន្ទាប់បង្កក្តីព្រួយបារម្ភនោះ ទើបក្រុមយុវជនកាកបាទក្រហមនិងក្រុមអ្នកស្ម័គ្រចិត្តចំនួន៣២នាក់ ព្រមទាំងកម្លាំងនគរបាលចរាចរចំនួន១៤រូប បានចេញយុទ្ធនាការចុះអប់រំ ផ្សព្វផ្សាយ ពីសុវត្ថិភាពចរាចរណ៍ផ្លូវគោក ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ដោយរៀបចំធ្វើឡើងចំនួន២ថ្ងៃជាប់គ្នា គឺថ្ងៃទី៩-១០ តុលា ២០១៥ សំដៅទប់ស្កាត់ឲ្យអ្នកធ្វើដំណើរទាំងទ្បាយត្រូវគោរពច្បាប់ចរាចរណ៍ឱ្យបានគ្រប់ៗគ្នា ។
លោក យូ ស្រ៊ុន ប្រធានសាខាកាកបាទក្រហមកម្ពុជាខេត្ត បានឲ្យដឹងថា សម្រាប់ព្រឹកថ្ងៃទី៩ តុលា ក្បួនយុទ្ធនាការ ត្រូវបានចាប់ផ្តើមចេញដំណើរពីសាខាកាកបាទក្រហមកម្ពុជាខេត្ត ដោយមានម៉ូតូធំរបស់កម្លាំងនគរបាលខេត្តចំនួន២គ្រឿង និងរថយន្តចំនួន៤គ្រឿងនាំមុខ ដោយធ្វើការផ្សព្វផ្សាយតាមមេក្រូ ដើម្បីបំផុសឲ្យអ្នកធ្វើដំណើរតាមម៉ូតូ រថយន្ត… ត្រូវគោរពច្បាប់ចរាចរណ៍ដើម្បីបញ្ចៀសគ្រោះថ្នាក់ដល់អាយុជីវិត ។
លោក យូ ស្រ៊ុន បានបន្តថា សម្រាប់គោលដៅដំបូងត្រូវចេញទៅទីប្រជុំជនផ្សារថ្មគោលចូលមកក្រុងកំពង់ចាម និងបានបន្តទៅស្រុកកំពង់សៀម រួចចូលមកកាន់កន្លែងដើមវិញ ។ សកម្មភាពនេះ គឺមានការផ្តួចផ្តើមដោយសម្ព័ន្ធអន្តរជាតិទប់ស្កាត់ផលប៉ះពាល់នៃការបើកបរក្រោមអឥទ្ធិពលជាតិស្រវឹង (IARD) ។
នៅលើជញ្ជាំងរថយន្តគេឃើញមានសរសេរអក្សរដាក់ថា « ពិសាគ្រឿងស្រវឹងហើយបើកបរ ប្រឈមនឹងជាប់ពន្ធនាគាររហូតដល់៦ខែ និងពិន័យជាប្រាក់៤លានរៀល» ទាំងនេះគឺជាការដាស់ស្មារតីឲ្យអ្នកបើកបរគ្រប់រូបត្រូវប្រុងប្រយ័ត្ន ។
លោកវរសេនីយ៏ទោ ឡុង ម៉េងសែ នាយការិយាល័យចរាចរណ៍ផ្លូវគោកខេត្ត មានប្រសាសន៏ឲ្យដឹងដែរថា ដោយអនុវត្តន៏តាមការណែនាំរបស់លោកឧត្តមសេនីយ៍ត្រី បែន រ័ត្ន ស្នងការនគរបាលខេត្ត កម្លាំងនគរបាលចរាចរគ្រប់ស្រុក មាន ស្រុកស្ទឹងត្រង់ ចំការលើ ព្រៃឈរ ជើងព្រៃ បាធាយ និងស្រុកកងមាស បានចុះយុទ្ធនាការពង្រឹងពីសុវត្ថិភាពច្បាប់ចរាចរណ៍ផ្លូវគោក តាំងពីថ្ងៃដាក់បិណ្ឌវេនទី១ រហូតដល់ថ្ងៃភ្ជុំបិណ្ឌ ។ ក្នុងគោលបំណងកាត់បន្ថយគ្រោះថ្នាក់ចរាចរណ៍ ធ្វើយ៉ាងណាឲ្យកាន់តែតិចទៅៗ ក្រោមកិច្ចសហការជាមួយកាកបាទក្រហមកម្ពុជាខេត្ត ហើយនៅម៉ោង៦និង៣០នាទីល្ងាចថ្ងៃទី៩ តុលា នេះ លោកនឹងដឹកនាំកម្លាំងចុះត្រួតពិនិត្យជាតិអាកុលនៅតាមផ្លូវជាតិលេខ៧ ត្រង់ភូមិបឹងស្នាយ សង្កាត់សំបួរមាស ក្រុងកំពង់ចាម និងបន្តចល័តពីកន្លែងមួយទៅកន្លែងមួយទៀត ដើម្បីពង្រឹងច្បាប់ចរាចរណ៍ផ្លូវគោកឲ្យកាន់តែប្រសើរឡើងថែមទៀត ៕
ចែករំលែកព័តមាននេះ