រាជធានីភ្នំពេញ ៖ រដ្ឋលេខាធិការដ្ឋានអាកាសចរស៊ីវិល បានរៀបចំពិធីសំណេះសំណាល និងប្រគល់អំណោយជូនមន្ត្រីរបស់ខ្លួនដែលបានចូលនិវត្តន៍ ដើម្បីរូមចំណែកជាជំនួយស្មារតីដល់ពួកគាត់ ដែលកន្លងមកបានបរិច្ចាគកម្លាំងកាយ/ចិត្ត និងចំណេះដឹង ស្មារតីក្នុងការរួមចំណែកការពារ កសាង និងអភិវឌ្ឍន៍ប្រទេសជាតិ ។
លោក គឹម សុភ័ណ អនុរដ្ឋលេខាធិការ រដ្ឋលេខាធិការដ្ឋានអាកាសចរស៊ីវិល បានបញ្ជាក់ថា គោលបំណងនៃការរៀបចំពិធីនេះ គឺដើម្បីសម្តែងមនោសញ្ចេតនា នឹករលឹកនិងសាកសួរសុខទុក្ខ ពិសេស ក្នុងនាមជាអ្នកមានកាតព្វកិច្ចជាមួយគ្នា និងបានបំពេញភារកិច្ចរួមគ្នាកន្លងមករហូតដល់មានអាយុចូលនិវត្តន៍ ។
លោក ហុល ម៉េន តំណាងនិវត្តន៍ជននៃរដ្ឋលេខាធិការដ្ឋានអាកាសចរស៊ីវិល បានសម្តែងនូវមនោសញ្ចេតនាដ៏រំភើបរីករាយ និងកក់ក្តៅជាទីបំផុត ដែលបានថ្នាក់ដឹកនាំ និងមន្ត្រីរាជការគ្រប់ជាន់ថ្នាក់ នៃរដ្ឋលេខាធិការដ្ឋានអាកាសចរស៊ីវិល បង្ហាញនូវកាយវិការនឹករលឹកមិនអាចបំភ្លេចបាន ចំពោះមន្ត្រីរាជការដែលបានចូលនិវត្តន៍ ។ មិនតែប៉ុណ្ណោះថែមទាំងបានរៀបចំជាពិធីជួបជុំសំណេះសំណាល សម្តែងនូវមនោសញ្ចេតនា និងទំនាក់ទំនងរវាងនិវត្តន៍ជន២ដងក្នុងមួយឆ្នាំ គឺក្នុងឱកាសចូលឆ្នាំថ្មីប្រពៃណីជាតិ និងពិធិបុណ្យភ្ជុំបិណ្ឌជារៀងរាល់ឆ្នាំ ។ អំណោយដែលបានចែកជូននាពេលនេះ ម្នាក់ៗទទួលបានអង្ករ៥០គីឡូក្រាម និងប្រាក់ចំនួន៦៣ម៉ឺនរៀលផងដែរ ៕
ចែករំលែកព័តមាននេះ