រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ បន្តសវនាការរឿងក្ដីលោកហុង សុខហួរ រសៀលថ្ងៃទី០៧ តុលា ២០១៥ សមាជិកព្រឹទ្ធសភាមកពីគណបក្សសម រង្ស៊ី។ សវនាការនេះ ធ្វើឡើងនៅចំពោះមុខជនជាប់ គឺបន្តសវនាការកាលពីថ្ងៃទី០២ តុលា ២០១៥ ដែលតុលាការបានផ្អាក ។
តែបន្ទាប់ពីសវនាការចៅក្រមបានប្រកាសចាត់របៀបដោយបង្គាប់ឲ្យមេធាវីការពាររកឯកសារដែលជនជាប់ចោទបានបង្ហោះក្នុងបណ្តាញសង្គម ឬហ្វេសប៊ុកដាក់ចូលតុលាការ។ កាលពីសវនានៅថ្ងៃទី០២ តុលា លោក ហុង សុខហួរ បានសារភាពជាច្រើនមកហើយ ពាក់ព័ន្ធនឹងការរៀបចំកាត់តលិខិតនៃសន្ធិសញ្ញាព្រំដែនកម្ពុជា-វៀតណាម ត្រង់ប្រការ៤ ហើយបង្ហោះលិខិតកាត់តទាំងនោះលើហ្វេសប៊ុកទៀតផង ។
នៅរសៀលថ្ងៃទី០៧ តុលា ក្នុងពេលសវនាការលោកហុង សុខហួរ បានឆ្លើយបំភ្លឺប្រាប់តុលាការថា ក្រោយពីលោកបានបង្ហោះឯកសារតាមហ្វេសប៊ុក ហើយលោកបានទៅកាន់ស្ថានទូតបារាំង ។ នៅពេលចេញមកវិញ ក៏ធ្វើដំណើរដោយម៉ូតូឌុបមកខណ្ឌទួលគោក និងបន្តទៅផ្ទះលោកយន់ ថារ៉ូ ជាទីដែលអាជ្ញាធរចាប់ខ្លួនលោក កាលពីថ្ងៃទី១៥ សីហា ២០១៥។
ក្នុងសវនាការនេះផងដែរ ក្រុមមេធាវីការពារឱ្យលោកហុង សុខហួរ បានបង្ហាញនូវឯកសារសន្ធិសញ្ញាដែលលោកហុង សុខហួរ បានបង្ហោះ ។ ករណីថ្មីនេះ បានធ្វើឱ្យមានការជជែកគ្នាជាថ្មី ដែលលោកតំណាងអយ្យការបានស្នើឱ្យចាត់របៀបស៊ើបអង្កេតថ្មី ។
ចំណែកក្រុមមេធាវីបានទាមទារឱ្យតុលាការភ្ជាប់ប្រព័ន្ធអីុនធើរណេតក្នុងសវនាការ ដើម្បីបង្ហាញពីរបៀបចូលទៅក្នុងប្រព័ន្ធអីុនធើរណេត ដើម្បីទាញយកឯកសារ។ នៅទីបំផុតក្រុមប្រឹក្សាតុលាការបានសម្រេចថយទៅពិចារណា ដើម្បីសម្រេចពីករណីនេះ ។ នៅវេលាម៉ោង១៥និង៤០នាទី ចៅក្រមតុលាការបានសម្រេចចាត់របៀប ដោយឱ្យក្រុមមេធាវីប្រគល់មកតុលាការនូវម៉ាស៊ីនអេឡិចត្រូនិចដែលត្រូវប្រើទាញយកសារឈ្មោះវេបសាយដែលទាញយក ។
តុលាការបានចោទប្រកាន់លោកហុង សុខហួរ ពីបទក្លែងបន្លំឯកសារសាធារណៈ , បទប្រើប្រាស់ឯកសារសាធារណៈក្លែងក្លាយ និងបទញុះញង់ឱ្យប្រព្រឹត្តបទឧក្រិដ្ឋនាំឱ្យមានចលាចលធ្ងន់ធ្ងរដល់សង្គមជាតិ តាមមាត្រា ៦២៩ មាត្រា ៦៣០ និងមាត្រា ៤៩៥ នៃក្រមព្រហ្មទណ្ឌ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ