ខេត្តក្រចេះ ៖ រាជរដ្ឋាភិបាលដែលមានសម្តេចតេជោជាប្រមុខដឹកនាំកំពុងតែមានយន្តការថ្មី ជាមធ្យោបាយបន្ថែមពីលើអ្វីដែលមានស្រាប់ ដើម្បីរៀបចំជូនយុទ្ឋជនសម្រាប់ជាគុណបំណាច់កន្លងមក ដែលជាអ្នករួមកសាងជាតិ ទាំងកិត្តិយស និងជីវភាព។ នេះជាប្រសាសន៍លើកឡើងរបស់លោកបណ្ឌិត ហ៊ុន ម៉ាណែត នៅក្នុងពិធីប្រកាសសមាសភាពថ្នាក់ដឹកនាំសមាគមន៍អតីតយុទ្ឋជនកម្ពុជាថ្នាក់ខេត្ត ស្រុក ក្រុង និងបើកប្រាក់មរណភាពសង្គ្រោះជូនគ្រួសារសព សមាជិក ស.អ.ក នៅក្នុងសាលមហោស្រពខេត្តក្រចេះ នៅព្រឹកថ្ងៃទី៧ តុលា ។
មេបញ្ជាការរងកងទ័ពជើងគោក និងជាអគ្គលេខាធិការរងសមាគមយុទ្ឋជនកម្ពុជា លោកបណ្ឌិត ហ៊ុន មាណែត បានថ្លែងថា គុណបំណាច់របស់អតីតយុទ្ឋជនក្នុងការចូលរួមចំណែកកសាងជាតិមាតុភូមិ រហូតទទួលបាននូវអ្វីៗដែលមានស្រាប់ដូចសព្វថ្ងៃ គឺរាជរដ្ឋាភិបាលកំពុងតែបង្កើតយន្តការថ្មីបន្ថែមដើម្បីធ្វើឲ្យកិត្តយស និងជីវភាពរបស់យុទ្ឋជនសម្រាប់ក្រុមគ្រួសារតាមរយៈក្រសួងសង្គមកិច្ច និងក្រសួងសេដ្ឋកិច្ច ឲ្យកាន់តែប្រសើរឡើង។
មានប្រសាសន៏លើកឡើងបន្តទៅកាន់យុទ្ឋជននិវត្តជន និងគ្រួសារយុទ្ឋជនមរណៈ ទាំងចំនួន១៥០នាក់ដែលបានអញ្ជើញចូលរួមនាព្រឹកនោះ លោកបណ្ឌិតហ៊ុន មាណែត បានបញ្ជាក់ថា គោលបំណងរបស់ក្រុមការងារសមាគមយុទ្ឋជនកម្ពុជាដែលចុះមកតាមបណ្តារខេត្ត គឺធ្វើឡើងដើម្បីស្វែងយល់លើការប្រឈមខ្លះៗរបស់យុទ្ឋជន និងដើម្បីឲ្យមានការកែសម្រួលឲ្យបានទាន់ពេលវេលា និងមានប្រសទិ្ឋភាពជូនដល់យុទ្ឋជន។
លោកថាក្នុងឆ្នាំកន្លងទៅនេះ សមាគមយុទ្ឋជនកម្ពុជាបានដោះស្រាយបានចំនួន៥ពាន់៥រយករណី ជូនដល់គ្រួសារសមាជិកយុទ្ឋជនដែលទទួលមរណភាព។ ក្នុងពិធីដែលបានប្រព្រឹត្តទៅពេញមួយព្រឹក ក៏មានការប្រកាសសមភាពភាពថ្នាក់ដឹកនាំសមាគមយុទ្ឋជនកម្ពុជាខេត្តក្រចេះ ដោយជ្រើសតាំងលោកសរ ចំរ៉ុង អភិបាលនៃគណៈអភិបាលខេត្តជាប្រធានកិត្តិយស និងមេបញ្ជាការក្នុងជួរកងកម្លាំងប្រដាប់អាវុធទាំងបីប្រភេទជាអនុប្រធានកិតិ្តយស ព្រមទាំងតែងតាំងលោកអភិបាលស្រុក-ក្រុង ជាប្រធាន សមាគម ស្រុក-ក្រុង៕
ចែករំលែកព័តមាននេះ