មេបញ្ជាការកងកម្លាំងឆ្មាំបដិវត្តន៍អីុរ៉ង់ឧត្តមសេនីយ៍ QASSEM SOLEIMANI បានមកកាន់ក្រុងមូស្គូទៀតហើយ ខណៈដែលសភាពការណ៍មានភាពអាក្រក់ខ្លាំងនៅស៊ីរី ដោយកងទ័ពស៊ីរី និងបណ្តាកងជីវពលសម្ព័ន្ធមិត្ត
មេបញ្ជាការកងកម្លាំងឆ្មាំបដិវត្តន៍អីុរ៉ង់ឧត្តមសេនីយ៍ QASSEM SOLEIMANI បានមកកាន់ក្រុងមូស្គូទៀតហើយ ខណៈដែលសភាពការណ៍មានភាពអាក្រក់ខ្លាំងនៅស៊ីរី ដោយកងទ័ពស៊ីរី និងបណ្តាកងជីវពលសម្ព័ន្ធមិត្តត្រូវបាក់ទ័ពស្ទើរគ្រប់រណសិរ្ស ។ ចំណែកទីតាំងរបស់របបស៊ីរីនៅជាប់ឆ្នេរសមុទ្រមេឌីទែរ៉ាណេ ពិសេសតំបន់ LATTAQUIE រងការគំរាមកំហែងជាពិសេស ។ គឺតំបន់នោះដែរដែលមានមូលដ្ឋាននាវាចរណុ៍ TARTOUS ជាមូលដ្ឋាននាវាចរណ៍តែមួយគត់របស់រុស្ស៊ីនៅសមុទ្រមេឌីទែរ៉ាណេ ។
កាលពីដំណាច់ខែកក្កដា ឧត្តមសេនីយ៍ QASSEM SOLEIMANI ក៏បានមកកាន់ក្រុងមូស្គូដែរ ។ ពេលនោះក្រសួងការបរទេសអាមេរិកបានបរិហាររុស្ស៊ីថា រំលោភបំពានលើការហាមឃាត់ផ្តល់ទិដ្ឋាការដែលឧត្តមសេនីយ៍រូបនោះជាកម្មវត្ថុដែរ ក្នុងក្របខ័ណ្ឌនៃទណ្ឌកម្ម អ.ស.ប ប្រឆាំងកម្មវិធីនុយក្លេអ៊ែរអីុរ៉ង់ ខណៈក្រុងតេហេរ៉ង់ និងបណ្តាមហាអំណាចនៅពុំទាន់សម្រេចបានកិច្ចព្រមព្រៀងមួយនៅឡើយ ។ យោងតាមទូរទស្សន៍ FOX NEWS ថា ពេលនោះឧត្តមសេនីយ៍ SOLEIMANI បានជួបជាមួយប្រធានាធិបតីរុស្ស៊ី លោកវ្ល៉ាឌីមៀរ ពូទីន និងរដ្ឋមន្ត្រីការពារប្រទេសលោក ស័រហ្គេយ ឆយហ្គូ ។
ពេលនោះវិមានក្រឹមឡាំងបានបដិសេធរាល់ការជួបជាមួយលោក ពូទីន ។ យោងតាមបណ្តាញផ្សព្វផ្សាយអីុរ៉ង់ថា លោក SOLEIMANI បានលើកឡើងពីបញ្ហាតំបន់ ព្រមទាំងពីការលក់អាវុធជាមួយបណ្តាមន្ត្រីរុស្ស៊ី ។
យោងតាមរ៉យទ័រដែលដកស្រង់ប្រភពព័ត៌មាននានាក្នុងតំបន់ថា ទស្សនកិច្ចលើកនេះរបស់លោក SOLEIMANI ជាដំណាក់កាលដំបូងនៃផែនការបង្កើនការលូកដៃកាន់តែខ្លាំងរបស់រុស្ស៊ីក្នុងសង្គ្រាមនៅស៊ីរី ។ ទស្សនកិច្ចនេះក៏កំណត់ពីការបង្កើតសម្ព័ន្ធភាពថ្មីរុស្ស៊ី-អីុរ៉ង់ជួយទ្រទ្រង់ដល់ប្រធានាធិបតីស៊ីរី លោក បាចា អាល់អាសាដ ។
រុស្ស៊ីចាប់ផ្តើមធ្វើការវាយប្រហារតាមអាកាសនៅស៊ីរីពីថ្ងៃទី៣០ កញ្ញា មក ចេញពីមូលដ្ឋានអាកាសចរណ៍នៅ LATTAQUIE ចំណែកការវាយលុកតាមជើងគោកមួយរបស់កងទ័ពសិ្នទ្ធរដ្ឋាភិបាលស៊ីរី និងសម្ព័ន្ធមិត្តអីុរ៉ង់ ព្រមទាំងក្រុមហេសប៊ុលឡាហ៍លីបង់ហាក់ដូចជាកំពុងរៀបចំ ។
ចំណែកអនុរដ្ឋមន្ត្រីការពារប្រទេសរុស្ស៊ី លោក អាណាតូលី អានតូណូវ ថ្លែងកាលពីថ្ងៃទី៦ តុលាថា កងទ័ពរុស្ស៊ីចង់ពង្រីកកិច្ចសហប្រតិបត្តិការជាមួយក្រុមចម្រុះនាំមុខដោយសហរដ្ឋអាមេរិកនៅស៊ីរី ។ លោកបន្តថា យើងមានការជឿជាក់ថា គ្មានប្រទេសណាមួយអាចប្រឈមមុខតែម្នាក់ឯងចំពោះការគំរាមកំហែងភេរវកម្មឡើយ ទោះបីជាកងទ័ពអាមេរិក អង់គ្លេស ឬអូតង់ ។ អាស្រ័យហេតុនេះហើយបានជាយើងចង់ឱ្យមានកិច្ចសហប្រតិបត្តិការអន្តរជាតិកាន់តែទូលំទូលាយមួយ ។
រីឯអ្នកនាំពាក្យក្រសួងការពារប្រទេសរុស្ស៊ីនិយាយថា ក្រុងមូស្គូអាចធ្វើតាមសំណើនានារបស់អាមេរិក ដែលសំដៅធ្វើការសម្របសម្រួលការវាយប្រហាររបស់ខ្លួននៅស៊ីរី ជាមួយការវាយប្រហាររបស់ក្រុមចម្រុះនាំមុខដោយអាមេរិក ៕
ចែករំលែកព័តមាននេះ