អង្គការរដ្ឋអ៊ិស្លាមប្រកាសទទួលខុសត្រូវចំពោះការវាយប្រហារអត្តឃាតមួយចំនួនបណ្តាលឱ្យមនុស្សស្លាប់២២នាក់ កាលពីថ្ងៃទី៦ តុលា នៅទីក្រុងអាដេនភាគខាងត្បូងយេម៉ែន និងនៅរដ្ឋធានី ប្រទេសនោះទីក្រុងសាណាត្រួតត្រាដោយពួកឧទ្ទាមស៊ីអីុតហ៊ូធី ។
នៅក្រុងអាដេន ពួកជីហាដក្រុមរដ្ឋអ៊ិស្លាមវាយប្រហារជាពិសេសលើសណ្ឋាគារមួយប្រើប្រាស់ជាកន្លែងធ្វើការរបស់រដ្ឋាភិបាលយេម៉ែន ព្រមទាំងប្លុកអគារជាទីតាំងរបស់កងកម្លាំងចម្រុះអារ៉ាប់ដែលប្រយុទ្ធប្រឆាំងពួកបះបោរហ៊ូធី ។
បណ្តាអ្នកទទួលខុសត្រូវយេម៉ែនគូសបញ្ជាក់ថា អនុប្រធានាធិបតីយេម៉ែន លោក KHALED BAHAH និងមេដឹកនាំរដ្ឋាភិបាលជាច្រើនរូបទៀតគេចផុតពីគ្រោះថា្នក់ ។ សរុបមានការវាយប្រហារអត្តឃាត៤ដែលមានការសម្របសម្រួលគ្នាសម្លាប់ទាហានយេម៉ែន១១នាក់ និងទាហានអេមីរ៉ាត់អារ៉ាប់រួម៤នាក់ នៅក្រុងអាដេន ដែលកងទ័ពរដ្ឋាភិបាលនិងកងកម្លាំងចម្រុះអារ៉ាប់ដណ្តើមត្រួតត្រានារដូវក្តៅនេះ ។ ក្នុងសេចក្តីប្រកាសមួយក្រុមរដ្ឋអ៊ិស្លាមបញ្ជាក់ថា ការវាយប្រហារទាំងនោះធ្វើឡើងដោយទុក្ករបុគ្គល៤នាក់ សំដៅលើកិច្ចប្រជុំមួយរបស់បណ្តានាយទាហានអារ៉ាប៊ីសាអ៊ូឌីត អេមីរ៉ាត់អារ៉ាប់រួមនិងយេម៉ែន ។
តាមរយៈវីដេអូមួយផ្សាយតាម TWITTER គេឃើញមានការផ្ទុះយ៉ាងខ្លាំងមួយនៅមុខសណ្ឋាគារ KASR ក្រុងអាដេន បន្ទាប់មកឃើញពពកផ្សែងខ្មៅហុយចេញ ។ ការផ្ទុះឯទៀតៗកើតមានក្នុងសង្កាត់ BOURAIKAV ជាកន្លែងបោះទីតាំងរបស់កងកម្លាំងចម្រុះអារ៉ាប់ ។
សណ្ឋាគារ KASR យាមការពារដោយកងទាហានអេមីរ៉ាត់អារ៉ាប់រួមប្រើជាទីស្នាក់ការរដ្ឋាភិបាលរបស់ប្រធានាធិបតីអាបដ៍រ៉ាបបូម៉ាន់សួរ ហាឌី ដែលសមាជិករដ្ឋាភិបាលនោះជាច្រើនរូបបានវិលត្រឡប់ពីភាពនិរទេសនៅអារ៉ាប៊ីសាអ៊ូឌីតវិលត្រឡប់មកយេម៉ែនវិញរយៈពេលប៉ុន្មានសប្តាហ៍ចុងក្រោយនេះ ។
យោងតាមប្រភពព័ត៌មានយោធាមួយថា ពួកជនអត្តឃាតបានប្រើរថយន្តកងទ័ពយេម៉ែនដើម្បីធ្វើការវាយប្រហារ ។
នៅរដ្ឋធានី សាណាវិញការវាយប្រហារអត្តឃាតមួយប្រឆាំងព្រះវិហារ AL NOUR ក្នុងសង្កាត់ AL NAHDA ភាគពាយ័ព្យក្រុងបណ្តាលឱ្យមនុស្សស្លាប់៧នាក់ ។ ក្នុងសេចក្តីប្រកាសមួយដែរក្រុមរដ្ឋអ៊ិស្លាមបញ្ជាក់ថា ពួកហ៊ូធីជាច្រើនសិបនាក់ដែលត្រៀមខ្លួនទៅកាន់រណសិរ្សប្រយុទ្ធបានត្រូវស្លាប់ ឬរបួសដោយសារការផ្ទុះ ៕
ចែករំលែកព័តមាននេះ