ខេត្តបាត់ដំបង ៖ បុរសម្នាក់ត្រូវកម្លាំងកងរាជអាវុធហត្ថឃាត់ខ្លួន រួមជាមួយថ្នាំញៀនជិត២០០០គ្រាប់ កាលពីវេលាម៉ោង៩ និង១៥នាទីព្រឹក ថ្ងៃទី៧ តុលា ពេលកំពុងធ្វើដំណើរតាមផ្លូវដល់ចំណុចបែងត្រេត
ខេត្តបាត់ដំបង ៖ បុរសម្នាក់ត្រូវកម្លាំងកងរាជអាវុធហត្ថឃាត់ខ្លួន រួមជាមួយថ្នាំញៀនជិត២០០០គ្រាប់ កាលពីវេលាម៉ោង៩ និង១៥នាទីព្រឹក ថ្ងៃទី៧ តុលា ពេលកំពុងធ្វើដំណើរតាមផ្លូវដល់ចំណុចបែងត្រេត ក្នុងភូមិត្រពាំងព្រលិត ឃុំសន្តិភាព ស្រុកសំពៅលូន បន្ទាប់ពីសង្ស័យថា ជននេះមានលាក់ទុកគ្រឿងញៀនជាប់ខ្លួន ។
មន្ត្រីកងរាជអាវុធហត្ថបានឲ្យដឹងថា ជនសង្ស័យឈ្មោះសុខ ធា អាយុ៣០ឆ្នាំ រស់នៅភូមិថ្មី ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។ ជាមួយនឹងការឃាត់ខ្លួនសមត្ថកិច្ចបានឆែកឆេរកឃើញថ្នាំញៀនប្រភេទមេតំហ្វេតាមីន(យ៉ាម៉ា)ចំនួន១សុងធំស្មើនឹង១០កញ្ចប់ ដែលជននេះលាក់ទុកនៅក្នុងខោលីអូ។
មន្ត្រីដដែលបញ្ជាក់ថា សមត្ថកិច្ចបានឃាត់ខ្លួនជននេះដោយចៃដន្យ បន្ទាប់ពីឃើញព្យាយាមគេចវេស ពេលជួបសមត្ថកិច្ចនៅតាមផ្លូវ លុះឆែកឆេរក៏រកឃើញថ្នាំញៀនដ៏ច្រើនសន្ធឹកសន្ធាប់ដែលជននេះលាក់ទុកនៅក្នុងខោលីអូ ក្នុងបំណងនាំទៅកាន់ខេត្តបាត់ដំបង។
បើតាមការស្រង់សំដីដែលសមត្ថកិច្ចបានសាកសួរជំហានដំបូង ឈ្មួញគ្រឿងញៀនឈ្មោះសុខ ធា បានសារភាពទទូលស្គាល់នូវថ្នាំញៀនដែលសមត្ថកិច្ចដកហូតពីខ្លួន តែមិនបានរៀបរាប់អំពីប្រវត្តិរត់ពន្ធគ្រឿងញៀនរបស់ខ្លួននាពេលកន្លងមកទេ ហើយក៏មិនបានប្រាប់អំពីប្រភពនៃថ្នាំញៀនដែលខ្លួនទិញបន្តនោះដែរ។ ប៉ុន្តែសមត្ថកិច្ចអះអាងថា ឈ្មោះសុខ ធា នេះជាមុខសញ្ញាជូញដូរថ្នាំញៀនដ៏ធំ ដែលតែងនាំថ្នាំញៀនពីស្រុកម៉ាឡៃ មកលក់នៅតាមបណ្ដាស្រុកនានាក្នុងខេត្តបាត់ដំបង៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ